កម្ពុជារកចំណូលបានជាង $៣០០ លាន ពីការនាំចេញអង្ករនៅរយៈពេល ៧ ខែ

គិតចាប់ពីខែមករា ដល់ខែកក្កដា ឆ្នាំ ២០២៥ កម្ពុជាបាននាំចេញអង្ករចំនួន ៤២០ ៥៧២ តោន គិតជាទឹកប្រាក់​បានចំនួន ៣០៩.៣២ លានដុល្លារសហរដ្ឋអាមេរិក។ នេះបើយោងតាមទិន្នន័យរបស់សហព័ន្ធស្រូវអង្ករកម្ពុជា​ (CRF)។

ទិន្នន័យរបស់សហព័ន្ធស្រូវអង្ករកម្ពុជា​ (CRF) បង្ហាញថា នៅក្នុងរយៈពេល៧ខែនៃឆ្នាំ២០២៥ កម្ពុជាបាន​នាំចេញ​អង្ករបានចំនួន ៤២០ ៥៧២តោន​ តាមរយៈក្រុមហ៊ុននាំចេញអង្ករចំនួន ៥១ ក្រុមហ៊ុន ទៅកាន់គោលដៅចំនួន ៦៥ ដែលក្នុងនោះ​ទៅកាន់បណ្តាប្រទេស​នៅក្នុងតំបន់អឺរ៉ុប​ចំនួន ​២៦ ​បានបរិមាណអង្ករចំនួន ២០០ ៧៧២ តោន គិតជាទឹកប្រាក់ចំនួន ១៥៦.៩២​ លានដុល្លារ ទៅកាន់ប្រទេសចិន ​និងហុងកុងចំនួន ១០៥ ៦២១ តោន គិតជាទឹកប្រាក់ចំនួន ៦២.១៣ លានដុល្លារ ទៅកាន់ប្រទេសក្នុងអាស៊ានចំនួន ៧ ប្រទេស​បានបរិមាណចំនួន ៥៧ ១៧៩ តោន​ គិតជាទឹកប្រាក់ចំនួន ៤០.១៤ លានដុល្លារ​ និងទៅកាន់គោលដៅ ៣២ ប្រទេស​ផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា  អូស្ត្រាលី ញ៉ូហ្សេឡេន បានចំនួន ៥៧ ០០០ តោន គិតជាទឹកប្រាក់ចំនួន ៥០.១៣ លានដុល្លារ។

លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានប្រាប់ឱ្យដឹងថា ចំពោះប្រភេទអង្ករបាននាំចេញអង្ករក្រអូបចំនួន ៧៧.៦៥% ប្រភេទអង្ករសគ្រាប់វែង ១៥.៦១% អង្ករចំហ៊ុយ ៣.២៧% អង្ករសរីរាង្គចំនួន ២.៦១%  និងអង្ករផ្សេងៗចំនួន ០.៨៦%។

ប្រទេសកម្ពុជាក៏បាននាំចេញស្រូវចំនួន ៣ ៨៧៣ ០៧៨ តោនស្រូវសើម ដែលគិតជាទឹក​ប្រាក់​បានប្រមាណ ៩១៤.២១ លានដុល្លារសហរដ្ឋអាមេរិក៕

អត្ថបទ៖ ឡេង ដេត