សេដ្ឋកិច្ច

រោងចក្រកែច្នៃអាលុយមីញ៉ូមមួយ នឹងមានវត្តមាននៅខេត្តព្រះសីហនុឆាប់ៗនេះ

បានផុស

៩ ខែ មុន

នៅ

ថ្ងៃពុធ ២០ សីហា ២០២៥

ដោយ

លោក ឡុង ឌីម៉ង អភិបាលខេត្តព្រះសីហនុ បានឱ្យដឹងថា គម្រោងវិនិយោគបង្កើតរោងចក្រកែច្នៃអាលុយមីញ៉ូម ដែលនឹងផ្តល់ការងារសរុបប្រមាណ ៥៤០ កន្លែង នឹងមានវត្តមាននៅខេត្តព្រះសីហនុ ក្រោយពីបានសិក្សាហេតុផលប៉ះពាល់បរិស្ថានពេញលេញរួច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជុំវិញគម្រោងវិនិយោគនេះ លោក ឡុង ឌីម៉ង បានគូសបញ្ជាក់ថា រោងចក្រកែច្នៃអាលុយមីញ៉ូមនេះ ត្រូវបានសិក្សា និងពិគ្រោះយោបល់ទៅលើលទ្ធផលនៃការវាយតម្លៃទៅលើផលប៉ះពាល់បរិស្ថានពេញលេញរួច បានឃើញថា រោងចក្រនេះ គឺជារោងចក្រទី១ ស្ថិតនៅតំបន់សេដ្ឋកិច្ចពិសេសខេត្តព្រះសីហនុ ដែលស្ថិតសង្កាត់បិតត្រាង ក្រុងកំពង់សោម ខេត្តព្រះសីហនុ។

លោកក៏បានបញ្ជាក់ដែរថា រោងចក្រនេះ ត្រូវបានសាងសង់ឡើងនៅលើផ្ទៃដីប្រមាណជាង ៤ ហិតា ដែលមានសមត្ថភាពក្នុងការកែច្នៃ និងផលិតទៅជាឧបករណ៍អាលុយមីញ៉ូម ជាពិសេសគឺជាប្រភេទបន្ទះ ក៏ដូចជាឧបករណ៍ផ្សេងៗស្របទៅតាមការចង់បានរបស់អតិថិជន ដែលមានសមត្ថភាពផលិតរហូតដល់ទៅ ១៥ ម៉ឺនតោនក្នុងមួយឆ្នាំ ដោយអាចចាប់ផ្តើមពី ១០ ម៉ឺន ឈានទៅដល់ ១៥ម៉ឺនតោន។

មិនតែប៉ុណ្ណោះ នៅពេលសាងសង់រួចរាល់ រោងចក្រអាលុយមីញ៉ូមមួយនេះ គឺជារោងចក្រមួយដែលធ្វើការផ្គត់ផ្គង់ទាំងទីផ្សារក្នុងប្រទេសកម្ពុជា និងនាំចេញទៅកាន់ទីផ្សារពិភពលោក ដូចជាទីផ្សារអាមេរិក អឺរ៉ុប និងអាស៊ីអាគ្នេយ៍ជាដើម៕

ដោយ៖ ឌិន ថារី