តម្លៃមាសអន្តរជាតិកើនលើស ៣ ៤០០ ដុល្លារ/អោន ជាថ្មី ​

តម្លៃមាសអន្តរជាតិ​បាន​កើនឡើងលើស ៣ ៤០០ ដុល្លារ/អោន ជាថ្មី ដោយសារតែកម្សោយ​នៃប្រាក់ដុល្លារ និងកង្វល់ពាក់ព័ន្ធនឹង​ឯករាជ្យភាព​របស់ធនាគារកណ្ដាលសហព័ន្ធអាមេរិក​ក្រោមការគំរាមកំហែងរបស់ប្រធានាធិបតី ដូណាល់ ត្រាំ។

គិតត្រឹមម៉ោង ១០ ព្រឹក ម៉ោងទៅទីក្រុងហុងកុង តម្លៃមាសជួញដូរដោយ​ផ្ទាល់ បាន​កើនឡើង ០,៤៤ ភាគរយ ដល់ប្រមាណ ៣ ៤១១ ដុល្លារ/អោន ក្រោយ​កើនដល់ប្រមាណ ៣ ៤១៦ ដុល្លារ/អោន ដែលជាតម្លៃខ្ពស់បំផុតជាង ១ ខែ ក្នុងវគ្គមុននោះ។

តម្លៃមាសនាពេលអនាគតរបស់អាមេរិក បាន​បញ្ចប់ការជួញដូរនៅតម្លៃ ៣ ៤៦៦ ដុល្លារ/អោន។

កំណើនតម្លៃមាសនេះ កើតឡើងក្រោយ​សន្ទស្សន៍ប្រាក់ដុល្លារបានធ្លាក់ចុះប្រមាណ ០,៥ ភាគរយ (​សម្រាប់​ការ​ជួញដូរថ្ងៃព្រហស្បតិ៍ នៅសហរដ្ឋអាមេរិក) ដែល​ធ្វើឱ្យ​មាសមាន​តម្លៃធូរសម្រាប់វិនិយោគិនពី​បរទេស។​

ប៉ុន្តែអ្នកជំនាញក៏បាន​លើកឡើងផងដែរពីកង្វល់ជុំវិញ​ឯករាជ្យភាព​របស់​ធនាគារ​កណ្ដាលសហព័ន្ធអាមេរិក​ (Fed) ដោយសារតែសម្ពាធរបស់លោក ត្រាំ ដែលទាមទារឱ្យ​ស្ថាប័នឯករាជ្យមួយ​នេះ​កាត់បន្ថយអត្រាការប្រាក់។

ក្រៅពីនេះ ​ភាព​តានតឹងជុំវិញឯករាជ្យរបស់ Fed កាន់តែខ្លាំង ក្រោយ​ទេសាភិបាល​ Fed លោកស្រី​ Lisa Cook បានប្តឹងលោក​ ត្រាំ ​​ចំពោះការប៉ុនប៉ងបណ្តេញលោកស្រីចេញពីតំណែង ដោយ​ចោទប្រកាន់លោកស្រីថា​ជាប់ពាក់ព័ន្ធនឹងការឆបោក​ក្នុងករណីកម្ចី​អចលនទ្រព្យ។

យ៉ាងណាមិញ អ្នកជំនាញលើកឡើងផងដែរថា ភាព​ស្រពិចស្រពិលនៃដំណោះស្រាយសន្តិភាពនៃជម្លោះអ៊ុយក្រែន-រុស្ស៊ី ខណៈវិនិយោគិន​ក៏រងចាំមើលទិន្នន័យ​សន្ទស្សន៍តម្លៃនៃការប្រើប្រាស់ផ្ទាល់ខ្លួន (PCE) របស់ Fed ដែលជារង្វាស់អតិផរណាដ៏សំខាន់សម្រាប់ធនាគារកណ្តាលអាមេរិក និងគ្រោងចេញនៅថ្ងៃសុក្រនេះ៕

​

​