តម្លៃមាសអន្តរជាតិ ​កើនខ្ពស់បំផុតក្នុងរយៈពេល ៤ ខែ

តម្លៃមាសអន្តរជាតិ​បាន​កើនឡើងខ្ពស់បំផុតក្នុងរយៈពេលជាង ៤ ខែ សម្រាប់ការជួញដូរនៅថ្ងៃចន្ទដើមសប្ដាហ៍នេះ ចំពេលដែលអ្នកវិនិយោគិនរំពឹងទុកកាន់តែខ្ពស់លើការកាត់បន្ថយអត្រាការប្រាក់របស់ធនាគារកណ្ដាលសហព័ន្ធអាមេរិក (Fed)។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

គិតត្រឹមម៉ោង ១ រសៀលនៅទីក្រុងហុងកុង តម្លៃមាសជួញដូរដោយ​ផ្ទាល់ ០,៧ ភាគរយ ដល់ ៣ ៤៧០ ដុល្លារ/អោន ដែលនេះគឺជាតម្លៃខ្ពស់បំផុតរាប់តាំងពីថ្ងៃទី ២៣ ខែមេសា។ ចំណែកឯតម្លៃមាសនាពេលអនាគតរបស់អាមេរិកវិញ បាន​កើនឡើង ០,៨ ភាគរយ ដល់ ៣ ៥៤៣ ដុល្លារ/អោន។

​អ្នកជំនាញបើកលើកឡើងថា កំណើននៃតម្លៃមាសសម្រាប់ការជួញដូរ​នៅលើទីផ្សារអាស៊ីនាពេលនេះ គឺដោយសារតែកំណើននៃក្ដីរំពឹងថា Fed អាចនឹង​កាត់បន្ថយអត្រាការប្រាក់ ២៥ ពិន្ទុ (០,២៥ ភាគរយ) បន្ថែមទៀតនារយៈពេលប៉ុន្មានសប្ដាហ៍ខាងមុខ ក្នុងខែកញ្ញា នេះ​។

ផ្នែកសង្រ្គាមពាណិជ្ជកម្ម​វិញ សហរដ្ឋអាមេរិក​នៅតែបន្តការចរចាលើព័ត៌មាន​លម្អិតពាក់ព័ន្ធនឹង​ពន្ធ ទោះបីជា​តុលាការឧទ្ធរណ៍មួយ​របស់សហរដ្ឋអាមេរិក សម្រេចថាពន្ធបដិការរបស់ ត្រាំ ខុសច្បាប់ក៏ដោយ។ នេះមានន័យថា ភាពស្រពិចស្រពិលសម្រាប់សេដ្ឋកិច្ចពិភព​លោក​ដោយសារតែពន្ធនៅតែបន្ត។ កម្សោយនៃប្រាក់ដុល្លារ និងការរំពឹងទុកពីទិន្នន័យទីផ្សារការងាររបស់អាមេរិក ក៏ជះឥទ្ធិពលលើកំណើនតម្លៃមាសអន្តរជាតិផងដែរ៕