ឥណ្ឌា​គ្រោង​​កាត់​ពន្ធ​លើ​ទំនិញ​​​រាប់​រយ​មុខ​ ដើម្បី​ជំរុញ​តម្រូវ​ការ​ក្នុង​ស្រុក​ ក្នុងបរិបទពន្ធ ត្រាំ

រដ្ឋាភិបាល​ឥណ្ឌា​បាន​ឱ្យដឹងកាលពីថ្ងៃពុធថា ប្រទេសឥណ្ឌាគ្រោង​នឹងកាត់បន្ថយពន្ធលើទំនិញប្រើប្រាស់រាប់រយមុខ រាប់តាំង​ពីម៉ាស៊ីនត្រជាក់ រហូតដល់រថយន្តធុនតូច ដើម្បីជំរុញការប្រើប្រាស់ក្នុងស្រុក ​​ក្នុងកិច្ចប្រឹងប្រែងទប់ទល់នឹង​ផលប៉ះពាល់នៃពន្ធរបស់សហរដ្ឋអាមេរិក​។ នេះបើតាមការចុះផ្សាយរបស់ទីភ្នាក់ងារសារព័ត៌មាន​ AP។

ការប្រកាសរបស់រដ្ឋាភិបាល​ឥណ្ឌា​ ធ្វើឡើង​ក្រោយ​ប្រធានាធិបតីអាមេរិក លោក ដូណាល់ ត្រាំ​ កាលពីខែមុនបាន​ប្រកាសពន្ធ ៥០ ភាគរយ លើទំនិញនាំចូលពីឥណ្ឌា ដោយសារតែប្រទេសនេះបន្តទិញប្រេងពីរុស្ស៊ី។

រដ្ឋមន្ត្រីក្រសួងហិរញ្ញវត្ថុឥណ្ឌា លោក​ Nirmala Sitharaman បានប្រកាស​នៅថ្ងៃពុធថា គណៈកម្មាការរដ្ឋាភិបាល បានអនុម័តលើអត្រាពន្ធលើទំនិញ និងសេវាកម្ម (GST) ថ្មី ដែលទាបជាងមុន ដោយ​នឹងចូលជាធរមាននៅថ្ងៃទី ២២ ខែកញ្ញា

ប្រព័ន្ធពន្ធថ្មី នឹងមានអត្រា ២ គឺ ៥ ភាគរយ​ និង ១៨ ភាគរយ ជំនួសឱ្យ​រចនាសម្ព័ន្ធចាស់ចំនួន ៤ អត្រា (​៥,១២,១៨, និង ២៨ ភាគរយ)។​

ទំនិញភាគច្រើននឹងមានពន្ធទាប បើទោះបីជាអត្រាខ្ពស់ពិសេស ៤០ ភាគរយ ត្រូវបានស្នើឡើងសម្រាប់ទំនិញមួយចំនួន​ ដូចជា​ រថយន្តប្រណីត គ្រឿងស្រវឹង និងបារីក៏ដោយ។​ ការទិញធានារ៉ាប់រងអាយុជីវិត និងសុខភាព នឹង​មិនជាប់ពន្ធនោះទេ។

គួរគូសបញ្ជាក់ថា ការកាត់បន្ថយពន្ធគឺជាផ្នែកមួយនៃផែនការទូលំទូលាយរបស់នាយករដ្ឋមន្ត្រីឥណ្ឌា លោក ណារិនដ្រា មូឌី ​ក្នុង​ការទប់ទល់ផលប៉ះពាល់សេដ្ឋកិច្ចពីពន្ធ ៥០ ភាគរយ របស់សហរដ្ឋអាមេរិក ដែលរំពឹងថានឹងប៉ះពាល់ដល់ការនាំចេញឥណ្ឌាក្នុងតម្លៃ ៤៨,២ ប៊ីលាន​ដុល្លារ។ ​

លោក ​មូឌី បាននិយាយ​ក្នុងសារដែលបង្ហោះលើបណ្ដាញសង្គម ​X ថា៖ «កំណែទម្រង់ទូលំទូលាយនឹងធ្វើឱ្យជីវិតរបស់ប្រជាពលរដ្ឋរបស់យើងប្រសើរឡើង និងធានាភាពងាយស្រួលនៃការធ្វើអាជីវកម្មសម្រាប់ទាំងអស់គ្នា ជាពិសេសពាណិជ្ជករ និងអាជីវកម្ម​តូចតាច»៕