វៀតណាមវ៉ាដាច់ថៃដោយទទួលភ្ញៀវទេសចរចិន​ច្រើនបំផុត ចំពេល​ទេសចរណ៍ថៃបន្តធ្លាក់ចុះ

វៀតណាមបានវ៉ាដាច់ប្រទេសថៃ ​ក្លាយជាគោលដៅកំពូលក្នុងតំបន់សម្រាប់ភ្ញៀវទេសចរចិនគិតត្រឹមខែសីហា ចំពេលដែល​ថៃបន្តកត់ត្រា​ការធ្លាក់ចុះនៃ​ការមកដល់របស់ភ្ញៀវពីបរទេស ដែលជាសញ្ញានៃវិបត្តិទេសចរណ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរយៈពេល ៨ ខែដើមឆ្នាំ វៀតណាម​បាន​ទទួល​ភ្ញៀវទេសចរចិន​ដីគោកប្រមាណ ៣,៥ លាននាក់ ដោយ​កើនឡើង ៤៤ ភាគរយ ធៀប​នឹង​រយៈពេលដូចគ្នាកាលពីឆ្នាំមុន។ មែនទែនទៅ នេះគឺជា​ឆ្នាំប្រវត្តិសាស្ត្រសម្រាប់វៀតណាម ដោយ​​ទទួលភ្ញៀវទេសចរបរទេស ១៤ លាននាក់ គិតត្រឹមខែសីហា ដែលជាចំនួនច្រើនបំផុតក្នុងកំណត់ត្រាវៀតណាម។

ផ្ទុយទៅវិញ ភ្ញៀវទេសចរអន្តរជាតិ​ទៅថៃបាន​ធ្លាក់ចុះជាបន្តបន្ទាប់ រហូតដល់ ៧,១ ភាគរយ គិតត្រឹមពាក់កណ្ដាលខែកញ្ញានេះ ដល់ ២៣ លាននាក់។ ការមកដល់របស់ភ្ញៀវចិន​បាន​ធ្លាក់ចុះជាគំហុកប្រហែល​ ៣៥ ភាគរយ មកត្រឹម ៣,២៣ លាននាក់ ដោយសារតែកង្វល់សុវត្ថិភាព​ ជាពិសេសពាក់ព័ន្ធនឹង​ប្រតិបត្តិការមជ្ឈមណ្ឌលឆបោក និង​ការបាត់ខ្លួនជនជាតិចិន ជាបន្តបន្ទាប់ក្នុងករណីជួញដូរមនុស្សទៅមីយ៉ាន់ម៉ាកាលពីដើមឆ្នាំនេះ។

យោងតាមទិន្នន័យរបស់ក្រុមហ៊ុន​ China Trading Desk ដែលជំនាញខាង​ត្រួតពិនិត្យការធ្វើដំណើរ និងការចំណាយរបស់ជនជាតិចិន ​ការធ្លាក់ចុះនៃភ្ញៀវទេសចរចិន​ អាចធ្វើឱ្យ​ថៃបាត់បង់ប្រាក់ចំណូលរហូតដល់ ៣,៥ ប៊ីលានដុល្លារ។ ​ប្រាក់ទាំងនោះ អាច​ហូរទៅ​វៀតណាម និងបណ្ដាប្រទេសជិតខាង​វិញ ចំពេល​​ដែល​​ទេសចរចិន​កាន់តែច្រើន​ ផ្លាស់ប្ដូរទៅលេង​ទិសដៅទេសចរណ៍​ផ្សេងៗ​ក្រៅពីថៃ។

សារព័ត៌មាន Bloomberg បានរាយការណ៍ថា បច្ចុប្បន្ន រដ្ឋាភិបាលវៀតណាម និងប្រតិបត្តិករទេសចរណ៍ឯកជន កំពុងបង្កើនកិច្ចខិតខំប្រឹងប្រែងដើម្បីទាក់ទាញភ្ញៀវទេសចរបរទេសកាន់តែច្រើន ជាពិសេសពី​ចិន។ ជាឧទាហរណ៍ ខេត្ត Quang Ninh ដែលមានព្រំប្រទល់ជាប់​ចិន អាជ្ញាធរក្នុងតំបន់បានធ្វើការជាមួយអាជីវកម្ម ដើម្បីចាប់ផ្តើមពិធីបុណ្យ​លោតឆ័ត្រយោង និងលេងបាឡុងខ្យល់ក្តៅវ ដើម្បីលើកទឹកចិត្តឱ្យមានការស្នាក់នៅបានយូរ។​

ក្រៅពីនេះ វៀតណាម​ក៏បាន​អភិវឌ្ឍគោលដៅទេសចរណ៍ជាច្រើន រាប់តាំងហេដ្ឋារចនាសម្ព័ន្ធ និងសេវាកម្ម ទាំងទីក្រុង​ តំបន់ភ្នំ និងឆ្នេរសមុទ្រ ដើម្បីមាន​ជម្រើសកាន់តែច្រើនសម្រាប់ភ្ញៀវទេសចរ បន្ថែមពីលើការពន្លឿនគោលនយោបាយផ្សេងៗ ដូចជាអន្តោប្រវេសន៍ ឬការលើកលែងទិដ្ឋាការជាដើម។

​គេព្យាករថា វៀតណាម​នឹង​ទទួល​ភ្ញៀវបរទេសចំនួន ២២,៦ លាននាក់នៅឆ្នាំនេះ ដោយ​កើនឡើងដល់កម្រិតខ្ពស់បំផុតក្នុងកំណត់ត្រា ឆ្នាំ ២០១៩ ​ត្រឹមប្រមាណ ១៩ លាននាក់។​ ផ្ទុយទៅវិញ ថៃកាត់បន្ថយការព្យាកររបស់ខ្លួនជាបន្តបន្ទាប់មកត្រឹម ៣៣ លាននាក់នៅឆ្នាំនេះ ទាបជាងឆ្ងាយធៀបនឹងកម្រិត ៤០ លាននាក់នៅឆ្នាំ ២០១៩ និង ៣៥ លាននាក់នៅឆ្នាំមុន៕