ព័ត៌មានអន្ដរជាតិ

តម្លៃមាសអន្តរជាតិបំបែកកំណត់ត្រាខ្ពស់បំផុតថ្មី លើស ៣ ៨០០ ដុល្លារ/អោន

បានផុស

៧ ខែ មុន

នៅ

ថ្ងៃចន្ទ ២៩ កញ្ញា ២០២៥

ដោយ

តម្លៃមាសអន្តរជាតិបន្តបំបែកកំណត់ត្រាខ្ពស់បំផុតក្នុងប្រវត្តិសាស្រ្ត ដោយកើនលើស ៣ ៨០០ ដុល្លារ/អោន សម្រាប់ការជួញដូរនារសៀលថ្ងៃចន្ទនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃមាសជួញដូរដោយផ្ទាល់ បានកើនឡើង ៥៤,២៩ ដុល្លារ ឬ ១,៤៤ ភាគរយ ដល់ ៣ ៨១៤,១៥ ដុល្លារ/អោន គិតត្រឹមម៉ោង ៥ និង ៣០ នាទី នៅទីក្រុងហុងកុង។

កំណើនតម្លៃមាសអន្តរជាតិបច្ចុប្បន្នជំរុញដោយការធ្លាក់ចុះប្រាក់ដុល្លារអាមេរិក ចំពេលដែលវិនិយោគិននៅថ្ងៃចន្ទនេះ រងចាំមើលកិច្ចប្រជុំសភាអាមេរិក រួមទាំងជាមួយប្រធានាធិបតី ដូណាល់ ត្រាំ ដើម្បីសម្រេចលើថវិកាប្រើប្រាស់សម្រាប់រដ្ឋាភិបាលសហព័ន្ធក្នុងរយៈពេលខ្លី។ បើគ្មានការសម្រេចទេ នោះ រដ្ឋាភិបាលអាមេរិកនឹងត្រូវបិទដំណើរការជាបណ្ដោះអាសន្ន ហើយអាចពន្យារពេលចេញទិន្នន័យសំខាន់ៗដូចជា របាយការណ៍ស្ដីពីការងារនៅថ្ងៃសុក្រ។

លទ្ធភាពនៃការបិទរដ្ឋាភិបាលអាមេរិក បន្តធ្វើឱ្យប្រាក់ដុល្លារធ្លាក់ចុះ ដែលជាហេតុធ្វើឱ្យតម្លៃមាសកើនឡើង។

ជាមួយគ្នានោះ លទ្ធភាពដែលទិន្នន័យការងារអាមេរិកមិនសូវល្អ អាចជួយជំរុញឱ្យធនាគារកណ្ដាលសហព័ន្ធអាមេរិក (Fed) កាត់បន្ថយអត្រាការប្រាក់ជាថ្មីនៅខែតុលាខាងមុខ ដែលជាកត្តារុញតម្លៃមាសផងដែរ។ ក្រៅពីនេះ កត្តាផ្សេងៗទៀតរួមទាំងឯករាជ្យភាពរបស់ Fed ជុំវិញសម្ពាធឱ្យបន្ថែមការកាត់អត្រាការប្រាក់ពីលោក ត្រាំ និងរដ្ឋបាលរបស់លោក។

រាប់តាំងពីដើមឆ្នាំមក តម្លៃមាសអន្តរជាតិបានកើនឡើងប្រហែល ៤៥ ភាគរយ រួចមកហើយ ដោយសារតែសង្រ្គាមពាណិជ្ជកម្មពន្ធគយរបស់លោក ត្រាំ តម្រូវការពីធនាគារកណ្ដាល និងភាពតានតឹងភូមិសាស្រ្តនយោបាយជាដើម៕