ព័ត៌មានអន្ដរជាតិ

តម្លៃមាសអន្តរជាតិ បន្តបំបែកកំណត់ត្រាខ្ពស់បំផុត ជាង ៣ ៩០០ ដុល្លារ/អោន

បានផុស

៩ ខែ មុន

នៅ

ថ្ងៃអង្គារ ៧ តុលា ២០២៥

ដោយ

តម្លៃមាសអន្តរជាតិបន្តបំំបែកកំណត់ត្រាខ្ពស់បំផុតក្នុងប្រវត្តិសាស្រ្តសម្រាប់ការជួញដូរនៅរសៀលថ្ងៃអង្គារនេះ ដោយសារតែការបន្តបិទដំណើរការនៃរដ្ឋាភិបាលអាមេរិក ដែលហាក់គ្មានដំណោះស្រាយឆាប់ៗ និងលទ្ធភាពកាត់អត្រាការប្រាក់បន្ថែមទៀតរបស់ធនាគារកណ្ដាលសហព័ន្ធអាមេរិក (Fed)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ តម្លៃមាសជួញដូរដោយផ្ទាល់ បានកើនឡើង ០,១ ភាគរយ ដល់ ៣ ៩៦២,៦៣ ដុល្លារ/អោន គិតត្រឹមម៉ោង ២ រសៀល នៅទីក្រុងហុងកុង បន្ទាប់ពីហក់ដល់ ៣ ៩៧៧ ដុល្លារ/អោន ក្នុងវគ្គជួញដូរថ្ងៃដដែលមុននោះ។ ចំណែកឯតម្លៃមាសនាពេលអនាគតរបស់អាមេរិក វិញ បានកើនឡើង ០,២ ភាគរយ ដល់ ៣ ៩៨៥,៣០ ដុល្លារ/អោន។

តម្លៃមាសអន្តរជាតិសម្រាប់ការជួញដូរដោយផ្ទាល់កាលពីថ្ងៃចន្ទ បានកើនឡើងលើស ៣ ៩០០ ដុល្លារ/អោន ដែលជាចំណុចខ្ពស់បំផុតក្នុងប្រវត្តិសាស្រ្តទីផ្សារ។

អ្នកវិភាគទីផ្សារម្នាក់បានប្រាប់រ៉យទ័រ យ៉ាងដូច្នេះថា លទ្ធភាពដែល Fed កាត់អត្រាការប្រាក់នៅខែតុលា និងធ្នូ មានលើសពី ៨០ ភាគរយ។ កត្តានេះ គួបផ្សំនឹងការបន្តបិទដំណើរការរដ្ឋាភិបាល បានជួញជំរុញតម្លៃមាស ចំពេលដែលគណបក្សសាធរណរដ្ឋបន្តរកាំរកូសជាមួយគណបក្សប្រជាធិបតេយ្យលើការអនុម័តថវិកាសហព័ន្ធក្នុងសភាអាមេរិក។

រាប់តាំងពីដើមឆ្នាំមក តម្លៃមាសអន្តរជាតិបានកើនឡើង ៥១ ភាគរយ មកហើយ ដោយសារតែភាពរឹងមាំនៃតម្រូវការពីធនាគារកណ្ដាល កម្សោយប្រាក់ដុល្លារ និងភាពស្រពិចស្រពិលសេដ្ឋកិច្ច ក្នុងបរិបទនៃភាពតានតឹងពាណិជ្ជកម្ម និងភូមិនយោបាយសកល។

ធនាគារ Goldman Sachs កាលពីថ្ងៃចន្ទ បានដំឡើងការព្យាកររបស់ខ្លួនលើតម្លៃមាសសម្រាប់ខែធ្នូឆ្នាំ ២០២៦ ថាឡើងដល់ ៤ ៩០០ ដុល្លារ/អោន ពីការព្យាករចាស់ត្រឹម ៤ ៣០០ ដុល្លារ/អោន ដោយសារតែភាពរឹងមាំនៃលំហូរជួញដូរនៅលោកខាងលិច និងតម្រូវការរបស់ធនាគារកណ្ដាល។

តួលេខពីធនាគារកណ្ដាលចិនបានបង្ហាញថា ចិន ដែលជាប្រទេសទិញមាសដ៏ធំសម្រាប់ទុនបម្រុងរបស់ខ្លួន បានទិសមាសបន្ថែមទៀតនៅខែកញ្ញា ដែលជាការទិញបញ្ចូល ១១ ខែជាប់ៗគ្នា។ ការណ៍នេះ រួមចំណែកសំខាន់ផងដែរ ដល់កំណើនតម្លៃ៕