បន្ទាប់ពីចាញ់ឆ្នោត តើលោក ប្រាយុទ្ធ នឹងលែងប្រឡូកក្នុងឆាកនយោបាយ​ឬយ៉ាងណា?

រឿងរ៉ាវពាក់ព័ន្ធនឹងជីវិតនយោបាយរបស់លោក ប្រាយុទ្ធ ចាន់អូចា អំពីថាតើលោកនឹងលែងប្រឡូកក្នុងអាជីពមួយនេះឬក៏យ៉ាងណា បន្ទាប់ពីរងបរាជ័យក្នុងការបោះឆ្នោតសកលកាលពីថ្ងៃទី១៤ ខែឧសភា ក្រោមកណ្ដាប់ដៃរបស់បក្សចលនាឆ្ពោះទៅមុខ (MFP) កំពុងផ្ទុះការចង់ដឹងយ៉ាងខ្លាំងពីសំណាក់មហាជនក្នុងប្រទេសថៃ ។

ពាក់ព័ន្ធនឹងបញ្ហានេះដែរ លោក Thanakorn Wangboonkongchana អនុប្រធានគណបក្សថៃរួបរួមជាតិ (UTN) បាននិយាយកាលពីថ្ងៃចន្ទថា លោកនាយករដ្ឋមន្ត្រី ប្រាយុទ្ធ ចាន់អូចា អាចនឹងពិចារណាបញ្ចប់អាជីពនយោបាយរបស់លោក បន្ទាប់ពីការបោះឆ្នោតនេះហើយ ។

លោក Thanakorn បានលើកឡើងថា ទោះបីជាលោកមិនបានជួបពិភាក្សាជាមួយលោក ប្រាយុទ្ធ អំពីផែនការរបស់លោកសម្រាប់អនាគតទៅមុខក៏ដោយ ប៉ុន្តែលោកជឿជាក់ថា លោក ប្រាយុទ្ធ អាចនឹងបញ្ចប់អាជីពនយោបាយ ដោយសារតែអំឡុងពេលលោកកាន់ជានាយករដ្ឋមន្ត្រី លោក​បាន​ធ្វើ​ការឲ្យ​ប្រទេសថៃ​ពេញ​មួយ​ជីវិត​របស់លោកទៅហើយ ជាពិសេសលោកបានបម្រើ​ផលប្រយោជន៍ដល់​ប្រជាជន​ថៃ​ក្នុង​រយៈពេល ៨ ​ឆ្នាំ​មកនេះ ​ដូច្នេះ​វា​គ្រប់គ្រាន់ហើយ​សម្រាប់លោក ប្រាយុទ្ធ ប្រឡូក​ក្នុង​ឆាក​នយោបាយមួយនេះ ។

ទន្ទឹមនោះ បន្ទាប់ពីគណបក្សថៃរួបរួមជាតិ (UTN) ដែលមានលោក ប្រាយុទ្ធ ជាបេក្ខជននាយករដ្ឋមន្ត្រី បានបរាជ័យក្នុងការទទួលបានអាសនៈសភាច្រើនដូចការរំពឹងទុក, លោក Thanakorn បាននិយាយថា លោកនឹងធ្វើតាមការសម្រេចចិត្តណាមួយរបស់លោក ប្រាយុទ្ធ ដោយសារតែលោកបានចូលជ្រកកោនក្នុងបក្សមួយនេះ ក៏ព្រោះតែលោក ប្រាយុទ្ធ ផងដែរ ជាពិសេសលោកនាយករដ្ឋមន្ត្រីរូបនេះ​ស្ថិត​ក្នុង​បេះដូង​របស់​ប្រជាជន​ថៃ​ជា​យូរ​មក​ហើយ ។

ក្នុង​កាលៈទេសៈ​នេះដែរ លោក​បាន​ជូនពរ​លោក ប្រាយុទ្ធ ឲ្យ​មាន​សុភមង្គល​ក្នុង​ជីវិត ព្រោះ​តាំង​ពី​លោក​ឡើង​កាន់​តំណែង​ជា​នាយករដ្ឋមន្ត្រី​មក លោក​មិន​បាន​ទៅ​ណា​ទេ ក្រៅពីផ្ដោតសំខាន់លើការងារដឹកនាំប្រទេសនោះទេ ។

គួរបញ្ជាក់ថា គណបក្សថៃរួបរួមជាតិ (UNT) របស់លោក ប្រាយុទ្ធ មិនទទួលបានអាសនៈសភាច្រើនដូចការរំពឹងទុកនោះទេ ពោលគណបក្សមួយនេះបានត្រឹមតែ ៣៦ អាសនៈប៉ុណ្ណោះក្នុងចំណោមអាសនៈសភាចំនួន ៥០០ អាសនៈ ខណៈបក្សចលនាឆ្ពោះទៅមុខរបស់លោកបេក្ខជននាយករដ្ឋមន្ត្រីថ្មីគឺលោក ភីថា លីមចារើនរ៉ាត់ ទទួលបានរហូតដល់ ១៥១ អាសនៈ តាមពីក្រោយដោយគណបក្សភឿថៃរបស់កូនស្រីលោក ថាក់ស៊ីន ដែលមានចំនួន ១៤១ អាសនៈ ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ លោក ប្រាយុទ្ធ និយាយថា លោកនឹងទទួលស្គាល់លទ្ធផលបោះឆ្នោត

ចុចអាន ៖ មកដឹងគោលនយោបាយដែលនាំ គណបក្សចលនាឆ្ពោះទៅមុខ ឈ្នះការ​បោះឆ្នោតនៅ ថៃ