សប្បុរសជន ៣ក្រុម ប្រគល់ស្បៀងអាហារ និងសម្ភារៈការពារជំងឺកូវីដ១៩ ជូនដល់រដ្ឋបាលរាជធានីភ្នំពេញ ដើម្បីជួយឧបត្ថម្ភពលរដ្ឋ

សប្បុរសជនចំនួន៣ក្រុម សហគមធនាគារនៅកម្ពុជា ក្រុមហ៊ុនអង្គរឌែរី ប្រូផាក ខូ អិលធីឌី និងក្រុមហ៊ុនណិកស៍​ជេនើរេសិន ឌីស្ទ្រីប៊្យូសិន បានប្រគល់ថវិកា និងស្បៀងអាហារនិងសម្ភារៈការពារជំងឺ ជូនរដ្ឋបាលរាជធានី ដើម្បីជួយឧបត្ថម្ភពលរដ្ឋ និងទប់ស្កាត់ការរីករាលដាលកូវីដ-១៩។

ពិធីប្រគល់និងទទួលនេះបានធ្វើឡើងនៅរសៀលថ្ងៃទី០៥ឧសភានេះ នៅសាលារាជធានីភ្នំពេញ ក្រោមវត្តមានលោក​ឃួង ស្រេង អភិបាលនៃគណៈអភិបាលរាជធានីភ្នំពេញ នៅសាលារាជធានីភ្នំពេញ ហើយក្រុមហ៊ុន២ទៀត ទទួលដោយអភិបាលរងរាជធានីភ្នំពេញចំនូន២រូបទៀតផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អំណោយរបស់សហគមធនាគារនៅកម្ពុជា ដែលទទួលដោយ លោកឃួង ស្រេង រួមមាន ថវិកា ចំនួន ២,៥០០ដុល្លារ អង្ករចំនួន ២៣តោន ត្រីខ ចំនួន ១,១២៩យួរ មីម៉ាម៉ា ចំនួន ១,២០០កំប៉ុង ម៉ាស់ ចំនួន ៥ ៧០០បអប់ ទឹកជែលលាងដៃ ចំនួន ២,៧០០ដបនិង ទឹកអាល់កុល ចំនួន ១,២០០លីត្រ។

ក្រុមហ៊ុនអង្គរឌែរី ប្រូផាក ខូ អិលធីឌី ទទួលដោយ លោកនួន ផារ័ត្ន អភិបាលរងរាជធានីភ្នំពេញ ប្រគល់ទឹកដោះគោស្រស់ចំនួន១០០០កេសជូនរដ្ឋបាលរាជធានីភ្នំពេញ។

ចំណែកឯ ក្រុមហ៊ុនណិកស៏ជេនើរេសិន ឌីស្ទ្រីប៊្យូសិន បានប្រគល់ជូនអង្គរ៥០០គីឡូក្រាម ត្រីខ ៥០យូរ មី៥០កេស ជូនរដ្ឋបាលរាជធានីភ្នំពេញ តាមរយៈលោកស្រីកែវ សុខពិសី អភិបាលរងរាជធានីភ្នំពេញ ដើម្បីជួយឧបត្ថម្ភជីវភាពជូនប្រជាពលរដ្ឋ និងចាត់វិធានការទប់ស្កាត់ការរីករាលដាលនៃមេរោគកូវីដ-១៩ផងដែរ។

លោកឃួង ស្រេង បានថ្លែងអំណរគុណយ៉ាងជ្រាលជ្រៅចំពោះ សប្បុរសជនទាំង៣ក្រុម ដែលបានឧបត្ថម្ភ ថវិកា ស្បៀងអាហារនិងសម្ភារៈការពារជម្ងឺរាតត្បាត ជូនរដ្ឋបាលរាជធានី ដើម្បីជួយឧបត្ថម្ភជីវភាពជូនប្រជាពលរដ្ឋ និងចាត់វិធានការទប់ស្កាត់ការរីករាលដាលនៃមេរោគកូវីដ-១៩។

តាមរយៈកាយវិការដ៏ល្អប្រពៃ ប្រកបដោយមនុស្សធម៌ និងគុណធម៌ខាងលើនេះ ពិតជាបានរួមចំណែកយ៉ាងសំខាន់ជាមួយ រដ្ឋបាលរាជធានីភ្នំពេញ និងរាជរដ្ឋាភិបាល ស្របតាមការអំពាវនាវរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការចាត់វិធានការទប់ស្កាត់ការរីករាលដាលនៃមេរោគបូវីដ-១៩ នៅរាជធានីភ្នំពេញ ក៏ដូចជានៅទូទាំងព្រះរាជាណាចក្រកម្ពុជា បានទាន់ពេលវេលា។

ទឹកចិត្តសប្បុរសធម៌ដ៏ថ្លៃថ្លាមួយនេះ ស្តែងឱ្យឃើញអំពីការគិតគូរ និងក្ដីអាណិតស្រលាញ់ចំពោះជនរួមជាតិ ដោយ​ឈរ​លើ បុព្វហេតុជាតិ សាមគ្គីជាធ្លុងមួយ ក្នុងស្មារតីជួយគ្នា នៅក្នុងកាលៈទេសៈដែលប្រទេសជាតិបាន និងកំពុងជួបប្រទះនឹងគ្រោះភ័យ នការរាតត្បាតពីមេរោគកូវីដ-១៩ ភ្នំពេញ និងប្រជាជនកម្ពុជាទាំងអស់៕ អត្ថបទ៖ ស្រីរ័ត្ន