ភស្តុតាងថ្មីបង្ហាញថាចាក់វ៉ាក់សាំងបានពេញលេញអាចការពារវីរុសបំប្លែងខ្លួន

ភស្តុតាងជាច្រើនដែលប្រមូលពីប្រទេសអ៊ីស្រាអែលនិងឥណ្ឌាបង្ហាញថា វ៉ាក់សាំងការពារកូវីដ-១៩ ក៏មានប្រសិទ្ធភាពខ្ពស់ប្រឆាំងនឹងវីរុសបំប្លែងខ្លួនបានល្អដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងពេលយុទ្ធនាការចាក់វ៉ាក់សាំង នៅអ៊ីស្រាអែលវីរុសបំប្លែងខ្លួនប្រភេទ B.1.1.7 (វីរុសបំប្លែងខ្លួនអង់គ្លេស) កំពុងតែេរាលដាលនៅក្នុងប្រទេស ប៉ុន្តែការរាតត្បាតមិនបន្តកើនឡើងឡើយ ក្រោយការចាក់វ៉ាក់សាំងបានបញ្ចប់ទៅ។

ទោះបីជាមានវីរុសបំប្លែង B.1.1.7 បានផ្ទុះនៅអ៊ីស្រាអែលក៏ដោយ ប៉ុន្តែក្រោយយុទ្ធនាការចាក់ថ្នាំបង្ការដ៏ធំក្នុងប្រទេស របាយការណ៍ក្នុងស្រុកបង្ហាញថា ៩៥ ភាគរយនៃអ្នកជំងឺបង្កដោយកូវីដបំប្លែងខ្លួនបានធូរស្រាលច្រើនឡើង។ នេះបើតាមការអះអាងពីវេជ្ជបណ្ឌិត Monica Gandhi អ្នកឯកទេសជំងឺឆ្លងនៅសាកលវិទ្យាល័យកាលីហ្វ័រញ៉ា រដ្ឋសាន់ហ្វ្រាន់ស៊ីស្កូ។

អ្នកឯកទេសរូបនេះបន្តថា​ ដោយសារករណីវិជ្ជមានថ្មីៗបន្តធ្លាក់ចុះជាលំដាប់ ដូច្នេះហានិភ័យដែលវីរុសបំប្លែងខ្លួននឹងលេចចេញព្រមទាំងឱកាសនៃការរាលដាលរបស់វាក៏ធ្លាក់ចុះដូចគ្នាដែរ។

ទន្ទឹមគ្នាគ្នាដែរ លោកស្រី Jennifer Horney បណ្ឌិតផ្នែករោគរាតត្បាតនិងជាស្ថាបនិកនៃកម្មវិធីជំងឺរាតត្បាតរបស់សាកលវិទ្យាល័យ Delaware សហរដ្ឋអាមេរិក បានយល់ស្របថា “ប្រសិនបើយើងអាចបន្តកាត់បន្ថយចំនួនករណីថ្មីបាន នោះយើងក៏អាចបញ្ឈប់ការរីករាលដាលនៃវីរុសបំប្លែងខ្លួនក្នុងពេលតែមួយបានដូចគ្នា” ។

ចំណែកការសិក្សាផ្សេងទៀតនាថ្មីៗនេះ ក៏បានអះអាងគាំទ្រដែរថា វ៉ាក់សាំងការពារកូវីដ-១៩ ពិតជាអាចបង្ការការចម្លងនៃវីរុសបំប្លែងខ្លួនបានខ្ពស់ មិនចាញ់គ្នានោះទេ។ ក្នុងនោះក្រុមអ្នកវិទ្យាសាស្រ្តនៅប្រទេសឥណ្ឌាបានលើកឡើងថា វ៉ាក់សាំងកូវីដ-១៩ មានប្រសិទ្ធភាពរហូតដល់ ៩៧ ភាគរយប្រឆាំងនឹងវីរុសបំប្លែងខ្លួនឥណ្ឌា។

យ៉ាងណាក៏ដោយ វាមិនមែនមានន័យថា ជំងឺរាតត្បាតបានចប់ទៅហើយនោះទេ។ ទាំងនេះជាសុទិដ្ឋិនិយមដែលអ្នកជំនាញមាន ត្បិតគ្រប់យ៉ាងមិនទាន់ច្បាស់លាស់នៅឡើយ។

ដូច្នេះដើម្បីការពារខ្លួន គ្រួសារ និងសហគមន៍ យើងគប្បីបន្តអនុវត្តគោលការណ៍ ៣ការពារ ៣កុំ ​ឱ្យបានខ្ជាប់ខ្ជួនគ្រប់ៗគ្នា៕

ប្រែសម្រួល៖ សន្យា

ប្រភព៖ healthline

ចុចអាន៖ វ៉ាក់សាំងកូវីដ-១៩ អាចការពារសុខភាពយើងពីវីរុសបំប្លែងខ្លួនទេ?

ចុចអាន៖ ការសិក្សាបឋម៖ វ៉ាក់សាំង ការពារមិនឲ្យឆ្លងវីរុសបំប្លែងខ្លួនឥណ្ឌា សឹង១០០ភាគរយ