អាសន្នធំ! ជំងឺផ្សិតខ្មៅឆ្លងកាន់តែខ្លាំង ឥណ្ឌាទប់លែងជាប់ព្រោះអស់ថ្នាំព្យាបាល

ក្រុមគ្រូពេទ្យបាននិយាយកាលពីដើមសប្តាហ៍នេះថា មានអ្នកជំងឺនិងអ្នកជាសះស្បើយពីជំងឺកូវីដ-១៩កាន់តែច្រើនឡើង កំពុងតែឆ្លងជំងឺដុះផ្សិតដ៏សាហាវនិងកម្រ។

ជំងឺ Mucormycosis ឬគេហៅថា “ជំងឺផ្សិតខ្មៅ” ជាទូទៅ ច្រើនតែកើតឡើងចំពោះអ្នកជំងឺ ដែលប្រព័ន្ធភាពស៊ាំរបស់ពួកគេចុះខ្សោយ ដោយសារតែការឆ្លងរោគផ្សេងទៀត។

អ្នកឯកទេសខាងជំងឺឆ្លងនៅទីក្រុង Ahmedabad លោក Atul Patel បានប្រាប់ AFP ថា “ករណីនៃការឆ្លងមេរោគ mucormycosis ចំពោះអ្នកជាសះស្បើយពីជំងឺកូវីដ គឺកើនឡើងខ្ពស់ជាងមុនពេលរោគរាតត្បាតផ្ទុះឡើងដល់ទៅ៤-៥ដងឯណោះ។

ស្របពេលជាមួយគ្នានោះ លោក Khusrav Bajan អ្នកពិគ្រោះយោបល់នៅឯមន្ទីរពេទ្យជាតិ Mumbai’s P.D. Hinduja បាននិយាយថា នៅរដ្ឋភាគខាងលិច Maharashtra, ករណីរហូតដល់ទៅ៣០០ ត្រូវបានរកឃើញ។

រីឯលោក Randeep Guleria នាយកមន្ទីរពេទ្យ AIIMS ក្នុងទីក្រុងដែលីបានព្រមានថា ការឆ្លងមេរោគជាបន្ត ដូចជាជំងឺផ្សិតខ្មៅនេះ កំពុងបន្ថែមលើអត្រាមរណភាពរបស់ប្រទេសឥណ្ឌាកាន់តែធ្ងន់។

រដ្ឋភាគខាងលិច Gujarat បានបញ្ជាឲ្យមន្ទីរពេទ្យរដ្ឋ បង្កើតទីតាំងព្យាបាលដាច់ដោយឡែកពីគ្នា សម្រាប់អ្នកជំងឺ “ផ្សិតខ្មៅ” ស្របពេលមានករណីកើនឡើងខ្លាំង។

ការព្យាបាលជំងឺនេះ គឺត្រូវវះកាត់យកជាលិកាដែលស្លាប់និងឆ្លងមេរោគទាំងអស់ចេញ ហើយត្រូវចាក់ថ្នាំប្រឆាំងនឹងការដុះផ្សិត។

ប៉ុន្តែលោក Yogesh Dabholkar អ្នកជំនាញខាងត្រចៀក ច្រមុះនិងបំពង់កនៅមន្ទីរពេទ្យ DY Patil ក្នុងទីក្រុង Mumbai បានប្រាប់ AFP ថា ថ្នាំដែលប្រើសម្រាប់ព្យាបាលអ្នកឆ្លងមេរោគផ្សិត គឺមានតម្លៃថ្លៃណាស់។

លោកបានបន្ថែមថា ថ្នាំព្យាបាលមួយក្នុងចំណោមថ្នាំព្យាបាលទាំងឡាយ គឺជិតអស់ហើយដោយសារតែការកើនឡើងករណីឆ្លងយ៉ាងគំហុក៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ ចូលរួមសោកស្តាយ! គ្រូពេទ្យឥណ្ឌាជាង ១ពាន់នាក់ ត្រូវបាត់បង់ជីវិតដោយសារកូវីដ