ប្រទេស ៣ នៅអាស៊ីខាងត្បូង ជិតអស់ វ៉ាក់សាំង ចាក់ដល់ពលរដ្ឋ ក្រោយឥណ្ឌាហាមឃាត់ការនាំចេញ ហើយកំពុងរកចិន និងរុស្ស៊ី ជួយ

ប្រទេសបង់ក្លាដែស នេប៉ាល់ និងស្រីលង្កា ជិតនឹងអស់វ៉ាក់សាំងការពារជំងឺកូវីដ ១៩ ហើយសង្ឃឹមថា ចិន និងរុស្ស៊ី នឹងជំរុញកិច្ចខិតខំប្រឹងប្រែង នៅតំបន់អាស៊ីខាងត្បូង ដើម្បីទប់ទល់នឹងរលករាតត្បាត ដ៏សាហាវនេះ ។

បច្ចុប្បន្ន ករណីឆ្លង និងស្លាប់ដោយជំងឺកូវីដ ១៩ បានឈានដល់កម្រិតមួយ គួរឲ្យកត់សម្គាល់នៅទូទាំងប្រទេសឥណ្ឌា និងប្រទេសជិតខាងរបស់ខ្លួន ក្នុងប៉ុន្មានសប្តាហ៍ថ្មីៗនេះ ហើយពួកគេទាំងអស់កំពុងតែពឹងផ្អែកលើ យុទ្ធនាការចាក់វ៉ាក់សាំង ដើម្បីបញ្ឃប់រលកឆ្លងថ្មី ។

ប៉ុន្តែគោលការណ៍របស់ប្រទេសឥណ្ឌា កាលពីខែមុនក្នុងការហាមឃាត់ការនាំចេញវ៉ាក់សាំង ដោយសារតែកង្វះខាតក្នុងប្រទេស បានធ្វើឲ្យប៉ះពាល់យ៉ាងធ្ងន់ធ្ងរ ដល់បណ្តាប្រទេសដទៃទៀត ហើយប្រទេសអាស៊ីខាងត្បូងទាំងបី បានបន្ថយយុទ្ធនាការចាក់វ៉ាក់សាំងរបស់ពួកគេ នៅពេលវ៉ាក់សាំងកំពុងខ្វះខាត លើទីផ្សារអន្តរជាតិសម្រាប់ស្តុកថ្មី ។

ប្រទេសបង់ក្លាដែស មានវ៉ាក់សាំង Covishield របស់ក្រុមហ៊ុន AstraZeneca និងវ៉ាក់សាំងចិន Sinopharm ប្រហែល ១ លានដូស ហើយត្រូវបានគេរំពឹងថា នឹងចាក់វ៉ាក់សាំង Pfizer ចំនួន ១០០,០០០ ដូស ប៉ុន្តែថ្នាំទាំងអស់នឹងត្រូវបាត់ទៅវិញក្នុងរយៈពេលប៉ុន្មានថ្ងៃទៀតនេះ ។

ប្រទេសដែលមានប្រជាជនចំនួន ១៦៨ លាននាក់មួយនេះ បានរាយការណ៍ថា មានករណីឆ្លងជំងឺកូវីដ ១៩ ចំនួន ៨០០,០០០ នាក់ និងមានអ្នកស្លាប់ ១២,២០០ នាក់ ។ ដូចនៅក្នុងប្រទេសអាស៊ីខាងត្បូងដទៃទៀតដែរ អ្នកជំនាញនិយាយថា ចំនួនពិតប្រាកដគឺមានច្រើនជាងនេះ ។

ប្រទេសបង់ក្លាដែសមានកិច្ចព្រមព្រៀងក្នុងការទិញវ៉ាក់សាំង Covishield ចំនួន ៣០ លានដូស ពីវិទ្យាស្ថាន Serum នៃប្រទេសឥណ្ឌា ដែលជាក្រុមហ៊ុនផលិតវ៉ាក់សាំង ធំបំផុតនៅលើពិភពលោក ប៉ុន្តែមានតែ ៧ លានដូសប៉ុណ្ណោះត្រូវបានចែកចាយ នៅពេលដែលប្រទេសឥណ្ឌា បានបញ្ឈប់ការនាំចេញកាលពីខែមុន ។

ចាប់តាំងពីពេលនោះមក ប្រទេសនេះបានទាក់ទងប្រទេសចិន និងរុស្ស៊ី ដើម្បីទទួលបានវ៉ាក់សាំងរបស់ពួកគេ និងបណ្តាប្រទេសលោកខាងលិច ដែលអាចមានវ៉ាក់សាំង AstraZeneca ខណៈកិច្ចព្រមព្រៀងមួយជាមួយប្រទេសចិន សម្រាប់ចំនួនមិនជាក់លាក់ នៃវ៉ាក់សាំង Sinopharm ត្រូវបានអនុម័តកាលពីថ្ងៃពុធ ។

ចំណែកប្រទេសនេប៉ាល់ មានប្រជាជនប្រមាណ ១.៥ លាននាក់ ដែលកំពុងរងចាំការចាក់វ៉ាក់សាំង Covishield ជាលើកទី ២ ក៏កំពុងឈរជើងផងដែរ បន្ទាប់ពីមានការហាមឃាត់ ការនាំចេញវ៉ាក់សាំងរបស់ឥណ្ឌា ខណៈបច្ចុប្បន្នប្រទេសនេះកំពុង ប្រើប្រាស់វ៉ាក់សាំង Sinopharm ដែលត្រូវបានផ្តល់ឲ្យដោយប្រទេសចិន ដូចប្រទេសបង់ក្លាដែស ។

ទន្ទឹមនោះ ប្រទេសស្រីលង្កា ដែលមានប្រជាជនចំនួន ២១ លាននាក់ មានវ៉ាក់សាំងប្រហែល ១១៥,០០០ ដូស ហើយបានបន្ថយល្បឿនយុទ្ធនាការចាក់របស់ខ្លួនត្រឹម ១៥,០០០ ដូសក្នុងមួយថ្ងៃ ខណៈដែលប្រទេសនេះក៏ចរចាជាមួយប្រទេសផ្សេងទៀតផងដែរ ។

ប្រទេសស្រីលង្កា ឥឡូវនេះបានទទួលនូវអំណោយវ៉ាក់សាំង Sinopharm ចំនួន ៦០០,០០០ ដូស ហើយសង្ឃឹមថានឹងទទួលបានវ៉ាក់សាំងបន្ថែមចំនួន ២៦ លានដូស ពីប្រទេសរុស្ស៊ី និងចិន ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ យុទ្ធនាការចាក់ វ៉ាក់សាំង កូវីដ របស់ទ្វីបអាហ្រ្វិក កំពុងឈរជើង បន្ទាប់ពីឥណ្ឌាហាមឃាត់ការនាំចេញទៅឲ្យ COVAX យូរទៅៗ

ចុចអាន ៖ COVAX ផ្ដល់វ៉ាក់សាំងកូវីដ ១០០ លានដូសដល់ប្រទេសក្រីក្របំផុតនៅលើពិភពលោក