កូវីដ-១៩

ការធ្វើតេស្ត២ថ្ងៃទៅលើអាជីវករផ្សារកំប្រង់ មកទល់ល្ងាចនេះរកឃើញវិជ្ជមាន៤៥នាក់

បានផុស

៥ years មុន

នៅ

ថ្ងៃសុក្រ ១៦ កក្កដា ២០២១

ដោយ

បាត់ដំបង ៖ រយៈពេល២ថ្ងៃ ចាប់ពីថ្ងៃទី១៥ និង១៦ ខែកក្កដា នៃការធ្វើតេស្តទៅលើក្រុមអាជីវករដែលលក់ដូរនៅក្នុងផ្សារកំប្រង់ ក្រុមគ្រូពេទ្យបានរកឃើញបន្ថែមទៀតរហូតដល់ ៤៥ នាក់ ទៅលើអាជីវករចំនួន ៤៧៥ នាក់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា អាជ្ញាធរស្រុកកំរៀងសម្រេចធ្វើការបិទខ្ទប់ភ្លាមៗ ទៅលើទីតាំងផ្សារកំប្រង់ បន្ទាប់ពីមានការសង្ស័យ និងបន្ទាប់ពីក្រុមគ្រូពេទ្យចុះយកសំណាកលើអាជីវករតាមរយៈតេស្តរហ័សព្រមទាំងបានរកឃើញវិជ្ជមានជាបន្តបន្ទាប់ ទើបអាជ្ញាធរសម្រេចធ្វើការបិទខ្ទប់ផ្សារនេះតែម្តង។

ការបិទខ្ទប់នេះបានធ្វើឡើងយ៉ាងបន្ទាន់នៅវេលាម៉ោង ៤ និង ១០ នាទីល្ងាច ថ្ងៃទី១៥ ខែកក្កដា ឆ្នាំ២០២១ ដែលផ្សារនេះស្ថិតក្នុងភូមិកំប្រង់ ឃុំតាក្រី ស្រុកកំរៀង ខេត្តបាត់ដំបង។

នៅល្ងាចនោះដែរ អាជ្ញាធរបានបញ្ជូនអ្នកវិជ្ជមានទៅកាន់វិទ្យាល័យស្រុកកំរៀង ដើម្បីព្យាបាល តែម្តង ចំណែកទីតាំងសាលាបឋមសិក្សាកំប្រង់គឺជាកន្លែងយកសំណាក ដោយមានអាជីវករចូលពិនិត្យជាហូរហែ បើគិតមកទល់នឹងម៉ោង ៥ ល្ងាច ក្រុមគ្រូពេទ្យបានរកឃើញអ្នកផ្ទុកមេរោគកូវីដ-១៩ ចំនួន ៣៦ នាក់ នៅក្នុងចំណោមអាជីវករចំនួន២៥០នាក់។

លោក រស់ កប មេឃុំតាក្រីបានបញ្ជាក់ប្រាប់កម្ពុជាថ្មីថា នៅថ្ងៃទី១៦ ខែកក្កដានេះក្រុមការងារនៅតែបន្តធ្វើតេស្តទៅលើអាជីវករទាំងអស់ ដោយមកទល់នឹងល្ងាចនេះ គឺមានអ្នកវិជ្ជមានចំនួន ៩ នាក់ បន្ថែមទៀត ក្នុងចំនួនអាជីវករ ២២៥ នាក់ សរុបគឺមានអ្នកផ្ទុកមេរោគកូវីដ-១៩ក្នុងផ្សារកំប្រង់សរុបចំនួន ៥៤ នាក់ ដោយឡែកសម្រាប់ក្រុមគ្រូពេទ្យនៅតែបន្តយករហូតលុះត្រាតែអស់ ទាំងអ្នកផ្ទាល់ និងអ្នកពាក់ព័ន្ធប្រយោល ព្រោះនៅល្ងាចនេះក្រុមអាជីវករនៅសល់ប្រហែល៥០នាក់ទៀតដែលមិនទាន់បានយកសំណាក ៕

ដោយ ៖ សោ និយមរ័ត្ន