ថ្ងៃអាទិត្យសប្តាហ៍នេះ! ហ្វីយ៉ាតា នឹងចេញទៅប្រកួត MUI នៅថៃ ខណៈត្រៀមរថយន្ត ៤គ្រឿង រួចស្រេច សម្រាប់អ្នកគាំទ្រ

នៅថ្ងៃអាទិត្យ ទី០២ ចុងសប្តាហ៍នេះ ម្ចាស់មក្កុដ Miss Universe Cambodia ថៃ នារីសុជាតា (ហ្វីយ៉ាតា) នឹងចាកចេញពីកម្ពុជា ក្នុងនាមតំណាងកម្ពុជាចេញទៅប្រកួតបវរកញ្ញាចក្រវាល តាមជើងហោះហើរនៅព្រលានយន្តហោះអន្តរជាតិតេជោ វេលាម៉ោង ៩ព្រឹក ខណៈបានរៀបចំឡានក្រុងចំនួន ៤គ្រឿង សម្រាប់អ្នកគាំទ្រដែលមានបំណងចង់ទៅជូនដំណើរខ្លួនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុនមានកិច្ចព្រមព្រៀងសន្តិភាពរួមគ្នាកាលពីថ្ងៃទី២៦ តុលា ហ្វីយ៉ាតា បានប្រាប់ពីមូលហេតុដែលជំរុញចិត្តខ្លួន ដាច់ខាតត្រូវតែទៅប្រកួតឆាកអន្តរជាតិ នៅប្រទេសថៃ ម្តងរួចទៅហើយ ខណៈមួយរយៈកន្លងមកនេះ ក៏តែងហ្វឹកហាត់ដុះខាត់សមត្ថភាពខ្លួនជាប់ជានិច្ច និងថែមទាំងបានចូលរួមសកម្មភាពផ្សារភ្ជាប់នឹងការផ្សព្វផ្សាយសិល្បៈ-វប្បធម៌ជាហូរហែរផងដែរ។

ម្ចាស់មក្កុដ Miss Universe Cambodia បញ្ជាក់ឱ្យដឹងដែរថា អ្វីដែលខ្លួនខ្វះមិនបាន មុននឹងចាកចេញពីមាតុភូមិក្នុងនាមតំណាងកម្ពុជា គឺវត្តមានរបស់អ្នកគាំទ្រ។ ហេតុនេះហើយ ហ្វីយ៉ាងតា ក៏បានត្រៀមរៀបចំមធ្យោបាយសម្រាប់អ្នកមានបំណងចូលរួមលើកទឹកចិត្តខ្លួន មុនចេញធ្វើដំណើរទៅកាន់ប្រទេសថៃផងដែរ។

បើតាមបញ្ជាក់ ក្រុមការងារ QUEEN បានរៀបចំឡានក្រុងចំនួន ៤គ្រឿងចតចាំអ្នកចូលរួមលើកទឹកចិត្ត ដោយតម្រូវឱ្យមកជួបជុំគ្នានៅអគារ CONNEXION កោះពេជ្រ វេលាម៉ោង ៧ព្រឹកគត់ (យឺតបំផុត) ព្រោះត្រូវរៀបអីវ៉ាន់ និងរៀបចំឱ្យហ្វេនទាំងអស់គ្នាចូលឡានឱ្យបានរួចរាល់ ដើម្បីរូតរះចេញដំណើរម៉ោង ៨គត់ ទៅកាន់ព្រលានយន្តហោះអន្តរជាតិតេជោទាំងអស់គ្នា។

គួររំលឹកថា ហ្វីយ៉ាតា ធ្លាប់បានប្រាប់ពីមូលហេតុដែលជំរុញចិត្តរបស់ខ្លួន ត្រូវតែទៅប្រកួតផងដែរ ដោយបានរៀបរាប់ថា “ចាប់តាំងពីចូលមកប្រកួតយើងដឹងហើយថាកម្មវិធីនឹងប្រព្រឹត្តនៅប្រទេសណា ហើយខ្ញុំតែងតែប្រាប់ខ្លួនឯងថា បើសិនជាខ្ញុំឈ្នះមកុដ ឆាកអន្តរជាតិទាំងមូលអត់អាចខ្វះទង់ជាតិរបស់ប្រទេសកម្ពុជាយើងបានទេ ហើយពាក្យហ្នឹងគឺនៅក្នុងខួរក្បាលខ្ញុំវិលទៅវិលមករហូត។ ហើយពេលនេះ ខ្ញុំអាចឈ្នះបានមកុដតំណាងឱ្យប្រទេសកម្ពុជាហើយ ហេតុអីបានខ្ញុំអត់អាចយកទង់ជាតិខ្មែរយើងទៅលើឆាកហ្នឹងបាន អ៊ីចឹងខ្ញុំគិតថា ទោះបីជាមានឧបសគ្គធំនៅខាងមុខ ឬក៏មិនមាន ឬណាយ៉ាងណាក៏ដោយ តែការប្ដេជ្ញាចិត្តរបស់ខ្ញុំដែលត្រូវយកទង់ជាតិកម្ពុជាទៅលើឆាកអន្តរជាតិត្រូវតែបន្ត”។

បវរកញ្ញាពេញដោយសមត្ថភាពរូបនេះ នឹងតំណាងកម្ពុជាដើម្បីចូលរួមប្រកួតលើឆាកអន្តរជាតិ Miss Universe ឆ្នាំ២០២៥ ដែលត្រៀមរៀបចំធ្វើឡើងនៅប្រទេសថៃ ខែវិច្ឆិកាខាងមុខនេះ ខណៈកំពុងបន្តហ្វឹកហាត់ ដុះខាត់សមត្ថភាពខ្លួនដើម្បីត្រៀមតំណាងជាតិ៕