លក់ផ្លែឈើមិនដាច់ តារាកំប្លែងជើងចាស់ តាចេក បញ្ជាក់រឿងលេងកំប្លែងវិញ

ថ្មីៗនេះ តារាកំប្លែងជើងចាស់ លោកតា ចេក បានធ្វើឱ្យអ្នកគាំទ្រមានការអាណិតអាសូរ ក្រោយពីគាត់បានចេញមុខត្អូញត្អែររឿងលក់ផ្លែឈើមិនសូវដាច់ ដែលជាហេតុនាំឱ្យការរកស៊ីត្រូវមួយនេះត្រូវខាតចុងខាតដើម ខណៈអាជីពសិល្បៈក៏ត្រូវខកខាន ព្រោះបញ្ហាជំងឺកូវីដ-១៩។

ដោយឡែកបន្ទាប់លោកតា ចេក បានរៀបរាប់ប្រាប់ពីបញ្ហាការលំបាកសម្រាប់ជីវភាព ក៏ដូចជាការរកស៊ីប្រចាំថ្ងៃនេះហើយឥឡូវលោកតា ចេក ក៏បានប្រកាសដោយបញ្ជាក់ថា សូមឱ្យបងប្អូនបន្តហៅគាត់លេងកំប្លែងនៅតាមបណ្តាកម្មវិធីនានាផង ព្រោះរោងការត្រូវបានបើកឡើងវិញហើយ។

លោកតា ចេក បាននិយាយថា កន្លងមកដោយសារមានការយល់ច្រឡំថា គាត់ឈប់ពីអាជីពលេងកំប្លែងនោះ គឺពុំមែនទេ។ លោកតាបានរៀបរាប់ថា ដល់រដូវកាលរៀបមង្គលការកូនប្រុសស្រីហើយ សូមកុំភ្លេចតា ចេក នៅទទួលភ្លេង កាត់សក់ និងមានទទួលកម្មវិធីផ្សេងៗដដែលទេ ពោលគឺនៅក្នុងក្រុងនឹងតាមបណ្ដាខេត្តផ្សេងៗ។

លោកតា ចេក បានបន្តទៀតថា មានបងប្អូនខ្លះថា ខ្ញុំឈប់លេងមកនៅគីរីរម្យហើយ សូមកុំយល់ច្រឡំមកគ្រាន់​តែ​ជួល​តូប​គេលក់ធម្មតាទេ តែសិល្បៈនៅទទួលរហូត។ សូមជូនពរឲ្យបងប្អូនកូនក្មួយសុខសប្បាយទាំងអស់គ្នា។ យើងរួមគ្នាអនុវត្តន៍តាមការណែនាំ ៣កុំ៣ការពារ ទើបយកឈ្នះកូវិដ-១៩បាន។

សូមជម្រាបថា មុខរបររកស៊ីរបស់តារាកំប្លែងលោកតា ចេក គឺកន្លងមកគាត់បានដាក់លក់ភេសជ្ជៈនៅតាមបណ្ដោយផ្លូវជាតិលេខ២ ផ្លូវទៅទន្លេបាទី (ម្ដុំហួសរង្វង់មូលកួរស្រូវ) ប៉ុន្តែសព្វថ្ងៃនេះ គាត់ក៏បានផ្លាស់ទីតាំងទៅដាក់លក់ផ្លែឈើនៅតាមដងផ្លូវឡើងទៅរមណីយដ្ឋានគិរីរម្យវិញម្តង៕

អត្ថបទ៖ ចាន់រ៉ា