ពេលស្គាល់ប្រវត្តិច្បាស់ ទើបដឹងថា កូនស្រី Jonny Depp ជាមនុស្សមិនធម្មតា

ដោយសារទេពកោសល្យល្អពីកំណើត និងសម្រស់ស្រស់ស្អាតស្រាប់ពីធម្មជាតិ កូនស្រី Johnny Depp ទទួលជោគជ័យក្នុងវិស័យសិល្បៈយ៉ាងត្រចះត្រចង់ តាំងតែពីវ័យទើប ១៦ឆ្នាំមកម្ល៉េះ។

ក្រោយករណីបណ្ដឹងរវាង Johnny Depp និងអតីតភរិយាក្លាយជាប្រធានបទក្តៅគគុកពាសពេញអ៊ីនធឺណិត ប្រព័ន្ធផ្សព្វផ្សាយនានាចាប់ផ្តើមយកចិត្តទុកដាក់កាន់តែខ្លាំងចំពោះជីវិតអាពាហ៍ពិពាហ៍របស់តារាប្រុសរូបនេះ។ ក្នុងនោះដែរ គេក៏បានលើកអំពីកូនស្រីរបស់ Johnny Depp មកជជែកផងដែរ។

កូនស្រីសំណព្វចិត្តរបស់តួប្រុសក្នុងរឿង “Pirates of the Caribbean” មានឈ្មោះពេញថា Lily Rose Melody Depp ឬហៅម្យ៉ាងទៀតថា Lily Rose កើតក្នុងឆ្នាំ១៩៩៩ ។ Lily Rose គឺជាចំណងដៃចុងក្រោយរវាង Johnny Depp និងកំពូលតារាម៉ូឌែល Vanessa Paradis ។ បច្ចុប្បន្ននេះ ថ្វីត្បិតទើបមានវ័យ ២៣ឆ្នាំក៏ដោយ ប៉ុន្តែ Lily Rose ទទួលជោគជ័យក្នុងអាជីពជាតារាបង្ហាញម៉ូដ និងសម្តែងយ៉ាងខ្លាំង។

តារាស្រីវ័យក្មេងរូបនេះ ទទួលបានប្រជាប្រិយរន្ទឺសុះសាយ មិនមែនដោយសារនាងមានឪពុកម្ដាយជាតារាល្បី ឬតារាហូលីវូដនោះទេ។ ផ្ទុយទៅវិញ Lily Rose ប្រឹងប្រែងខ្លាំងណាស់ ​ក្នុងវិស័យសិល្បៈ ពោលគឺនាងប្រើសមត្ថភាពខ្លួនឯងសុទ្ធសាធ។

Lily Rose ចាប់ផ្តើមអាជីពសម្ដែង តាំងពីអាយុ ១៥ឆ្នាំ ដោយដើរតួនៅក្នុងរឿង Tuck ។ បន្ទាប់ពីនោះមក នាងបន្តលេចមុខក្នុងរឿងផ្សេងៗទៀតដូចជា My Last Lullaby, The Dancer និង Voyagers។ល។ គួរឲ្យកត់សម្គាល់ Lily Rose ធ្លាប់បានបង្ហាញខ្លួនក្នុង MV “All around the world” របស់តារារ៉េបប្រុស Rejjie Snow ដោយមានអ្នកទស្សនាជាងមួយលានដង។

ទន្ទឹមនឹងជោគជ័យក្នុងវិស័យភាពយន្ត Lily Rose ក៏មានឥទ្ធិពលខ្លាំងក្នុងពិភពម៉ូដផងដែរ។ នាងត្រូវបានគេចាត់ទុកជាតារាមួយរូបដែលមានស្ទីលផ្ទាល់ខ្លួនគួរឱ្យចាប់អារម្មណ៍ មិនចាញ់ម៉ូឌែលល្បីៗដូចជា Hailey Baldwin និង Kendall Jenner ឡើយ។

នៅអាយុ ១៦ឆ្នាំ Lily Rose បានក្លាយជាអ្នកតំណាងនៃម៉ាកយីហោ Coco Chanel និងបានចូលរួមកម្មវិធីកម្រាលព្រំក្រហមធំៗដូចជា Met Gala និង Cannes ជាដើម។ លើសពីនេះ Lily Rose ត្រូវបានម្ចាស់ប្រេនចាត់ទុកជាតារាបង្ហាញដែលមានផ្ទៃមុខដ៏កម្រ និងត្រូវបាន Coco Chanel ចុះផ្សាយដោយភ្ជាប់ជាមួយនឹងចំណងជើងថា “Princess of Chanel”។

មិនតែប៉ុណ្ណោះកូនស្រី Johnny Depp រូបនេះ ត្រូវគេចាត់ទុកជាតារាស្រីជំនាន់ថ្មី ដែលមានអ្នកស្វែងរកជាបន្តបន្ទាប់ដើម្បីផ្សាយម៉ាកសម្លៀកបំពាក់លំដាប់ខ្ពស់ៗ។ នាងក៏តែងតែបង្ហាញមុខលើក្របទស្សនាវដ្តីម៉ូដល្បីៗដូចជា Vogue, Elle, Glamour ហើយក្នុងឆ្នាំ២០២០ Lily Rose ត្រូវបានបោះឆ្នោតដោយ Harper’s Bazaar ជារូបតំណាងម៉ូដអន្តរជាតិមួយក្នុងចំណោម៉ូឌែល ១៥នាក់លើពិភពលោក។

អាច​និយាយ​បាន​ថា ​អាជីព​របស់​តារា​ម៉ូដែលវ័យ ២៣ឆ្នាំរូប​នេះ​ មានភាពជោគជ័យខ្ពស់ ព្រោះ​នាងបុគ្គលិកលក្ខណៈផ្ទាល់ខ្លួន ស្ទីលមិនចម្លងគេ និងមានទេពកោសល្យ ក៏ដូចជាសម្រស់ល្អពីកំណើត។ Lily Rose ត្រូវបានគេរំពឹងថា នឹងមានភាពល្បីល្បាញមួយកម្រិតបន្ថែមទៀតនាពេលអនាគត៕

ប្រែសម្រួល៖ សន្យា

ចុចអាន៖ ប្រវត្តិស្នេហារបស់ Johnny Depp និងអតីតភរិយា មុនមានរឿងក្ដីក្ដាំ