Johnny Depp បរិច្ចាគប្រាក់ដល់អង្គការសប្បុរសធម៌ ក្រោយទទួលលុយទូទាត់ពី Amber Heard

តារាសម្តែង Johnny Depp បានសម្រេចចិត្តបរិច្ចាគប្រាក់សំណងចំនួន ១ លានដុល្លាររបស់លោកបានមកពីការឈ្នះពាក្យបណ្តឹងអតីតភរិយា Amber Heard ដល់អង្គការសប្បុរសធម៌ចំនួនប្រាំផ្សេងៗគ្នា ។

បន្ទាប់ពីមួយឆ្នាំចាប់តាំងពីរឿងបណ្តឹងដ៏ល្បីក្នុងហូលីវូដរវាង Amber Heard និង Johnny Depp បានកើតឡើង។ តារាសម្តែងប្រុសរូបនេះបានទទួលសំណងចំនួន ១ លានដុល្លារពីអតីតភរិយារបស់លោកយោងតាមប្រភពពី People បានឲ្យដឹងថាលោក Johnny Depp បានសម្រេចចិត្តបរិច្ចាគប្រាក់ទាំងអស់នេះដល់អង្គការសប្បុរសធម៌ ។

ជាពិសេសលោក Johnny Depp បានបែងចែកប្រាក់ទូទាត់នេះ ក្នុងចំណោមអង្គការសប្បុរសធម៌ចំនួន ៥ ផ្សេងៗគ្នា។ អង្គការនីមួយៗនឹងទទួលបានជំនួយចំនួន ២០០,០០០ ដុល្លារអង្គការទាំងនេះ រួមមានមូលនិធិ Make-A-Film, The Painted Turtle, Red Feather, Tetiaroa Society និង Amazonia Fund Alliance ។

កន្លងមក តារាសម្តែងវ័យ ៦០ ឆ្នាំរូបនេះក៏បានប្រកាសថានឹងបរិច្ចាគប្រាក់ទាំងអស់ដែលទទួលបានពី Amber Heard ហើយមិនទុកមួយកាក់ទេ។ ការប្ដឹងតារាស្រីរូបនេះដើម្បីទទួលបានកិត្តិយសរបស់ខ្លួនឡើងវិញ បន្ទាប់ពីអតីតភរិយា Amber Heard បង្ខូចកិត្តិយសរបស់លោក ហើយវាក៏មិនមែនជាទង្វើជំរិតទារប្រាក់ពីអតីតភរិយានោះទេ ។

ដោយឡែក នៅពេលបច្ចុប្បន្ននេះ ១ ឆ្នាំបន្ទាប់ពីបណ្ដឹងបានបញ្ចប់ Johnny Depp និង Amber Heard អ្នកទាំងពីរបានចាប់ផ្ដើមជីវិតថ្មី។ ខណៈពេលដែល Johnny Depp កំពុងតែមមាញឹកជាមួយនឹងគម្រោងភាពយន្តថ្មីរបស់លោក និង Amber Heard បានសម្រេចចិត្តផ្លាស់ប្ដូរទៅរស់នៅក្នុងទីក្រុង Madrid ប្រទេសអេស្ប៉ាញ ៕

ប្រែសម្រួល៖នាងតូច

ចុចអាន៖Hailey Bieber ស្នើឱ្យអ្នកគាំទ្រឈប់រិះគន់ Selena Gomez