ហង្ស ម៉ានីតា ផ្តើមចែករំលែកក្តីស្រលាញ់ដល់ក្មេងកំព្រា និងពលរដ្ឋខ្វះខាតអតីតគំនរសំរាមស្ទឹងមានជ័យ

ម្ចាស់មកុដបរវកញ្ញាចក្រវាឡកម្ពុជា២០២២ (Miss Univeres Cambodia2022) គឺកញ្ញា ហង្ស ម៉ានីតា និងកញ្ញា រតនា សុខាវត្តី ដែលជា Miss EcoInternational Cambodia 2022 បានសហការគ្នាធ្វើកិច្ចការងារដ៏សំខាន់មួយដើម្បីចូលរួមចំណែកជួយដល់សង្គមធ្វើឲ្យអ្នកគាំទ្រសរសើរគ្រប់គ្នា។

តាមរយ:ការបង្ហាញសកម្មភាពសប្បុរសធម៌នេះបានធ្វើអោយក្រុមការងារក៏ដូចជាសាមីខ្លួនមានភាពត្រេកអរ និងសប្បាយចិត្តខ្លាំងដែលបានចុះផ្ទាល់ និងបង្ហាញភាពស្និតស្នាលជាមួយបងប្អូនជួបនូវការខ្វះខាត។ អ្នកគាំទ្រដឹងថា Miss Universe Cambodia 2022 កញ្ញា ហង្ស ម៉ានីតា និងកញ្ញា រតនា សុខាវត្តី, Miss Eco International Cambodia 2022 បានចុះទៅផ្ទាល់ និងបានចែកសំភារៈសិក្សា សាប៊ូ និងគ្រឿងឧបភោគបរិភោគមានដូចជា,ត្រីខកំប៉ុង មី ទឹកដោះគោ និងនំផ្សេងៗដល់កុមារក្នុងគ្រួសារខ្វះខាត និងក្មេងកំព្រានៅក្បែរតំបន់ចាក់សំរាមនៅក្នុងសង្កាត់ស្ទឹងមានជ័យ២ រាជធានីភ្នំពេញ។

ជាមួយគ្នានោះកញ្ញា ហង្ស ម៉ានីតា ដែលជាម្ចាស់មកុដ Miss Universe Cambodia 2022 បានបង្ហាញក្តីរំភើបនិងសប្បាយរីករាយនៅពេលបានចុះមកផ្ទាល់ដើម្បីជួយប្អូនៗ ដែលជាកុមារ និងកំពុងកំព្រានៅតំបន់ជាអតីតគំនរសំរាមស្ទឹងមានជ័យ។ ទោះជាសម្ភារៈសិក្សា និងអំណោយមួយចំនួនទៀតមិនច្រើនក្ដី តែនេះទឹកចិត្តស្រលាញ់ និងការជួយគាំទ្រផ្នែកគំនិតមួយផ្នែកទៀតដើម្បីឱ្យប្អូនៗជាកុមារកំព្រាមានទឹកចិត្ត និងបង្កើតក្ដីស្រលាញ់កាន់តែច្រើនថែមទៀតដល់ពួកគេ។

ចំណែកកញ្ញា រតនា សុខាវត្តី ដែលជា Miss EcoInternational Cambodia2022 ក៏បានបង្ហាញពីទឹកចិត្តសប្បាយរីករាយផងដែរនៅពេលនាងមានឱកាសដើម្បីជួបប្អូនៗ ដែលជាកុមារកំព្រា និងខ្វះខាតរស់នៅតំបន់គំនរសំរាមស្ទឹងមានជ័យជាមួយសំភារ: និងអំណោយមួយចំនួនជាការផ្ដល់កម្លាំងចិត្ត និងបង្កើតបរិយាកាសសប្បាយរីករាយបន្ថែមទៀតជូនដល់ពួកគេ។

សូមបញ្ជាក់ដែរថា បវរកញ្ញាទាំងពីររូបនេះ ក្រោយបំពេញកិច្ចការសង្គមចប់រួចរាល់អស់ហើយពួកគេម្នាក់ៗ នឹងមានបេសកកម្មរៀងៗខ្លួនដើម្បីចូលរួមប្រកួតលើឆាកអន្តរជាតិក្នុងពេលដ៏ឆាប់។ ខណ: ហង្ស ម៉ានីតា ត្រៀមនឹងហោះទៅប្រទេសហ្វីលីពីន ដើម្បីជួបគ្រូជំនាញហ្វឹកហាត់សមត្ថភាពឲ្យបានល្អពេលប្រកួតបវរកញ្ញាចក្រវាឡពិភពលោក៕

អត្ថបទ៖ ចាន់រ៉ា