អៀ ម៉េងលិ បញ្ជាក់ថា ក្តីស្រលាញ់ពិតប្រាកដមិនមែនត្រូវការមានលុយហ៊ឺហារទេ

គេចាំបានថាតារាសម្តែងស្រីរូបស្រស់កញ្ញា អៀ ម៉េងលិ កាលពីថ្មីៗកន្លងទៅនេះបានប្រកាសពីការបែកបាក់ស្នេហាជាមួយអតីតសង្សាដែលធ្លាប់ស្រលាញ់គ្នាប្រមាណ៥ឆ្នាំបង្កការភ្ញាក់ផ្អើលដល់មហាជនគ្រប់គ្នា។

យ៉ាងណាមិញក្រោយពេលរឿងរ៉ាវស្នេហាត្រូវបានបញ្ចប់តាមរយ:ការចែកផ្លូវគ្នាដើររៀងៗខ្លួននោះ តារាស្រី អៀ ម៉េងលិ មកទល់ពេលនេះគេមិនទាន់ដឹងទេថា នាងអាចទទួលយកបុរសណាម្នាក់ដើម្បើស្អំបេះដូងនៅឡើយទេ ខណ:កន្លងមកមានការបង្ហើបថា កំពុងមានបុរសជាច្រើនតាមលួងលោកសុំស្នេហ៍ពីតារាស្រីរូបនេះ។

ដោយឡែករឿងរ៉ាវដែលអ្នកគាំទ្រកាន់តែចាប់អារម្មណ៍ថែមទៀតកាលពីប៉ុន្មានថ្ងៃមុននេះ ស្រាប់តែគេឃើញស្រីស្អាត អៀ ម៉េងលិ ទម្លាយរូបថតស្និទ្ធស្នាលជាមួយបុរសសង្ហាម្នាក់ដែលគេសង្ស័យថា ទំនងជាគូស្នេហ៍ថ្មីរបស់នាងទៀតផង។ ប៉ុន្តែមិនទាន់មានការបញ្ជាក់ច្បាស់ពីកញ្ញា អៀ ម៉េងលិ នៅឡើយទេជុំវិញរឿងនេះ គ្រាន់តែនាងសរសេរភ្ជាប់នឹងខ្លឹបសារដូច្នេះថា ក្តីស្រលាញ់ពិតប្រាកដមិនមែនត្រូវការមានលុយហ៉ឺហារនោះទេ សូមត្រឹមតែស្មោះត្រង់ផ្តល់តម្លៃអោយគ្នាទៅវិញទៅមកទៅគ្រប់គ្រាន់ហើយ។

អៀ ម៉េងលិ ក៏បានបញ្ចេញមតិនៅក្នុងខមមិនទៀតថា ខ្លាចហើយនិយាយមែន ពួកមនុស្សមួយចំនួន ទោះគេមានក៏គេមិនយកមកអោយខ្ញុំដែរ ខ្ញុំចង់និយាយទោះថ្ងៃក្រោយមនុស្សប្រុសដែលខ្ញុំកាន់ដៃ និងនៅចំណុចណាក៏ខ្ញុំនៅតែកាន់ដៃគាត់រហូតពាក្យថា ស្រលាញ់គឺស្រលាញ់ហើយ ទោះទៅជាយ៉ាងណាក៏ខ្ញុំនៅតែស្រលាញ់។

គួររម្លឹកថា កាលពីថ្ងៃទី២៩ ខែកក្កដា ឆ្នាំ២០២២ កន្លងទៅ ស្រីស្អាត អៀ ម៉េង​លិ បានប្រកាសដំណឹងនៃការបែកបាក់ស្នេហ៍ជាមួយអតីតសង្សារបស់ខ្លួនដែលស្រលាញ់គ្នាជាង៥ឆ្នាំដោយគ្មានការស្តាយស្រណោះឡើយ៕

អត្ថបទ៖ ចាន់រ៉ា