ធ្លាយពាក្យចចាមអារ៉ាមជាថ្មីថា តួមេធាវីខ្វាក់ និងភរិយា លែងលះគ្នា

កាលពីខែសីហា ឆ្នាំ២០២២ កន្លងទៅ តួឯកប្រុសរឿង “យុទ្ធសាស្ត្របំបែកក្ដី” លោក Vincent Wong និងភរិយាអ្នកនាង Yoyo Chen ធ្លាប់លេចឮពាក្យចចាមអារ៉ាមថា ពួកគេបានលែងលះគ្នា បញ្ចប់អាពាហ៍ពិពាហ៍រយៈពេល ១១ឆ្នាំ ដោយបន្សល់នូវចំណងដៃកូនស្រីម្នាក់។

ទោះយ៉ាងណាពេលនោះ តារាសម្ដែង Vincent Wong បានចេញមុខមកបង្ហោះសារនៅលើបណ្ដាញសង្គមផ្ទាល់ខ្លួន ដោយច្រានចោលពាក្យចចាមអារ៉ាមទាំងអស់។ ចំណែកតារាសម្ដែង Yoyo Chen ដែលជាភរិយាបានចេញមុខនិយាយថា នាងនឹងមិនឆ្លើយតបទៅនឹងព័ត៌មានមិនពិតនោះទេ។

ទើបតែថ្មីៗនេះ ពាក្យចចាមអារ៉ាមដដែលរវាងគូស្នេហ៍តារាជួរមុខហុងកុងទាំងពីររូប បានលេចឮម្ដងទៀត ធ្វើឱ្យអ្នកគាំទ្រ​ផ្ទុះការចាប់អារម្មណ៍យ៉ាងខ្លាំង។ ​ព័ត៌មាននៃការលែងលះបានផ្សព្វផ្សាយយ៉ាងផុសផុល ក្រោយពេលវីដេអូរបស់ Yoyo បានបង្ហោះនៅលើបណ្ដាញសង្គម Douyin ជាវីដេអូដែលនាង​បង្ហាញ​ពី​ទីតាំង​ផ្សេងៗ​ក្នុង​ទីក្រុង​ហុងកុង អំឡុងពេល​សម្ដែង​ក្នុង​រឿង​ភាគថ្មី។

នៅពីក្រោមវីដេអូ មានអ្នកគាំទ្រម្នាក់បានចូលទៅខមមិនសួរថា “​តើនាង​នៅ​លីវ​ហើយ​ឬ​នៅ?” ភ្លាមៗគណនីរបស់ Yoyo បានឆ្លើយតបថា ​នាង​និង Vincent បាន​លែង​លះ​គ្នាហើយ។ ចម្លើយនេះបានធ្វើឱ្យអ្នកគាំទ្រនាំគ្នាយកទៅជជែកវែកញែកព្រោងព្រាត អ្នកខ្លះគិតថាមែនទែន ចំណែកខ្លះទៀតកំពុងស្ថិតក្នុងភាពមន្ទិលនៅឡើយ មិនដឹងថា វាជាការនិយាយលេងសើច ឬជាការពិតនោះទេ៕

ប្រែសម្រួល៖ សន្យា

ចុចអាន៖ មកស្គាល់កាន់តែច្បាស់ពីសាវតា Vincent Wong ឬតួមេធាវីខ្វាក់ តារាប្រុសឈ្នះពានច្រើនបំផុត

ចុចអាន៖ ក្រោយមានពាក្យចចាមអារ៉ាមលែងលះប្តីប្រពន្ធ Hyun Bin ព្រមានចាត់វិធានការតាមផ្លូវច្បាប់