តារាកំប្លែងហុងកុង Richard Ng ទទួលមរណភាពក្នុងវ័យ ៨៤ ឆ្នាំ

លោក Richard Ng Yiu Hon ដែលគ្រប់គ្នាភាគច្រើនស្គាល់គាត់ថាជាតារាកំប្លែងដ៏ល្បីល្បាញកាលពីជំនាន់មុនបានទទួលមរណភាពកាលពីថ្ងៃអាទិត្យ ទី០៩ ខែមេសា ឆ្នាំ២០២៣ ក្នុងវ័យ ៨៤ ឆ្នាំ បន្ទាប់ពីបេះដូងឈប់ដើរក្នុងមន្ទីរពេទ្យមួយកន្លែង ខណៈគ្រួសាររបស់លោកត្រូវគ្រូពេទ្យផ្ដល់ដំណឹងតាមទូរស័ព្ទដើម្បីមកមើលមុខសពជាលើកចុងក្រោយ ។

យោងតាមប្រភពច្បាស់ការណ៍បានឲ្យដឹងថា Richard បានទទួលមរណភាពនៅមន្ទីរពេទ្យមួយកន្លែង ទោះបីគ្រូពេទ្យព្យាយាមជួយសង្គ្រោះយ៉ាងណាក៏ដោយ ក៏បេះដូងរបស់គាត់លែងលោតហើយ ។

ងាកទៅកាន់ឆ្នាំ ២០២១ វិញ លោក Richard ធ្លាប់ប្រាប់មហាជនថា ក្រលៀនរបស់ខ្លួនដំណើរការត្រឹមតែ ១០ ភាគរយប៉ុណ្ណោះ ហើយថែមទាំងតម្រូវឲ្យលាងឈាមទៀតផង សូម្បីគ្រូពេទ្យប្រចាំរបស់គាត់ក៏ប្រឆាំងនឹងការផ្លាស់ប្ដូរក្រលៀនដែរ ធ្វើឲ្យសុខភាពរបស់លោកមិនអាចត្រឡប់មកដូចដើមឡើយ ។

ដោយឡែកតារាកំប្លែងវ័យ ៨៣ ឆ្នាំខាងលើមានឈ្មោះល្បីដំបូងមកពីការថតរឿងកំប្លែងរបស់លោក Michael Hui ឆ្នាំ ១៩៧៦ គឺរឿង Private Eyes ជាមួយតារាសម្ដែង Sammo Hung និងរឿងដែលល្បីបំផុតគឺ “តារាសំណាង” ឆ្នាំ ១៩៨៣​ ជាមួយ Sammo, Charlie Chin, Stanley Fung និង John Shum ។

លើសពីនេះគាត់បានទទួលពានរង្វាន់ដល់ទៅពីរឯណោះសម្រាប់ “តារាសម្ដែងល្អបំផុត” នៅកម្មវិធីពានរង្វាន់ភាពយន្តហុងកុងសម្រាប់ការដើរតួក្នុងរឿង “តារាសំណាង” និង “Beyond the Sunset ឆ្នាំ ១៩៨៩” ៕

ប្រភព ៖ Asianone

ចុចអាន ៖ លោក Ryuichi Sakamoto តន្ត្រីករអេឡិចត្រូនិកជប៉ុនដ៏ល្បី ទទួលមរណភាពនៅអាយុ ៧១ ឆ្នាំ