ប្រទះឃើញគ្រោងឆ្អឹងតារាសម្ដែងជនជាតិអង់គ្លេសម្នាក់ នៅតំបន់ភ្នំកាលីហ្វ័រញ៉ា

នាយកដ្ឋានតម្រួតប្រចាំតំបន់ San Bernardino នៃសហរដ្ឋអាមេរិក បានបញ្ជាក់ថា គ្រោងឆ្អឹងមនុស្សដែលគេរកឃើញនៅតំបន់ភ្នំរដ្ឋកាលីហ្វ័រញ៉ា គឺជារបស់តារាសម្តែងជនជាតិអង់គ្លេស Julian Sands ដែលបាត់ខ្លួន ។

ការរកឃើញកើតឡើង ចាប់តាំងពីតារាវ័យ ៦៥ ឆ្នាំរូបនេះ ត្រូវបានគេរាយការណ៍ថាបាត់ខ្លួននៅក្នុងតំបន់ Mount Baldy នៃភ្នំ San Gabriel កាលពីជាង៥ខែមុន។

អ្នកឡើងភ្នំបានប្រទះឃើញគ្រោងឆ្អឹងមនុស្ស កាលពីព្រឹកថ្ងៃសៅរ៍ ទី២៤ ខែមិថុនា ឆ្នាំ២០២៣ ក្រោយធ្វើកោសល្យវិច័យ ពេលនេះច្បាស់ហើយថា វាជារបស់លោក Sands ពិតប្រាកដមែន ។

នាយកដ្ឋានតម្រួតប្រចាំតំបន់បន្តថា ​ការ​ស្លាប់របស់ Sands ​កំពុង​ស្ថិត​ក្រោម​ការ​ស៊ើបអង្កេត​នៅឡើយទេ ដូច្នេះ​រង់ចាំ​លទ្ធផល​តេស្ត​បន្ថែម​ទៀតដើម្បីដឹងកាន់តែច្បាស់ពីមូលហេតុ ។

គួររំលឹកថាលោក Julian Sands ជាអ្នកចូលចិត្តឡើងភ្នំ គាត់បាត់ខ្លួនតាំងពីថ្ងៃទី ១៣ ខែមករា ដើមឆ្នាំ២០២៣ មកម្ល៉េះ ។ ណាមួយនៅរដ្ឋកាលីហ្វ័រញ៉ាភាគខាងត្បូងគ្រានោះបានរងការវាយប្រហារដោយព្យុះបណ្ដាលឲ្យភ្នំលិចលង់ក្នុងព្រិល និងទឹកកក ដូច្នេះវាគ្រោះថ្នាក់ខ្លាំងណាស់ សូម្បីតែអ្នកឡើងភ្នំដែលមានបទពិសោធន៍ក៏មិនអាចរួចខ្លួនដែរ ៕

ប្រែសម្រួល៖ វារី

ប្រភព៖ skynews

ចុចអាន៖ តារាសម្ដែងលោក Julian Sands បាត់ខ្លួនមួយសប្ដាហ៍ហើយ