ជីវិតកម្សាន្ដ

វីជេ អាណូ ត្រូវបានបញ្ជូនសង្គ្រោះបន្ទាន់នៅមន្ទីរពេទ្យកាល់ម៉ែត ក្រោយប៉ងបញ្ចប់ជីវិត

បានផុស

៣ years មុន

នៅ

ថ្ងៃចន្ទ ១៤ សីហា ២០២៣

ដោយ

អតីតតារាចម្រៀងអ្នកនាង សួន ភក្ដី ហៅ វីជេ អាណូ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត បន្ទាប់ពីនាងប៉ងបញ្ចប់ជីវិតខ្លួនឯង កាលពីយប់ថ្ងៃទី ១៣ ខែសីហា ឆ្នាំ ២០២៣ យប់មិញ ដោយសារវិបត្តិរងសម្ពាធផ្លូវចិត្តធ្ងន់ធ្ងរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមតារាភេទទី ៣ លោក ម៉ា ដូណា បានបញ្ជាក់ថា «វីជេ អាណូ ពេលនេះ ត្រូវបានបញ្ជូនចូលសង្គ្រោះនៅមន្ទីរពេទ្យកាល់ម៉ែតហើយ»។ លោកបន្តថា «មកដល់កាល់ម៉ែតហើយ ឃើញហើយពិតជាមិនយល់ ហេតុអ្វីដល់ថ្នាក់ហ្នឹង សង្ឃឹម និងយល់ពីគាត់ផង និងផ្ដល់ឱកាសឲ្យគាត់បានរស់ផង សុំចិត្តកុំទាន់ដាក់សម្ពាធគាត់»។

តារាសម្ដែងភេទទី ៣ លោក ម៉ា ដូណា បានស្នើដល់សិល្បៈ និងបណ្ដាអ្នកសារព័ត៌មានដែរថា «សូមអំពាវនាវដល់បងប្អូន និងសិល្បៈ ជួយគាត់តាមសិទ្ធា សុំចិត្តអ្នកសារព័ត៌មានកុំទាន់អាលមកសម្ភាសន៍គាត់នៅពេលនេះ ព្រោះគាត់មានបញ្ហាផ្លូវចិត្តធ្ងន់ធ្ងរ»។

សូមជម្រាបថា មហាជនអ្នកគាំទ្រ បង្ហាញការភ្ញាក់ផ្អើល និងព្រួយបារម្ភគ្រប់គ្នា បន្ទាប់ពីអតីតតារាចម្រៀងអ្នកនាង សួន ភក្ដី ហៅ វីជេ អាណូ បានធ្វើការឡាយវីដេអូរៀបរាប់ពីទុក្ខសោកដែលនាងកំពុងតែជួបបញ្ហាផ្លូវចិត្តធ្ងន់ធ្ងរ។ ក្នុងនោះ វីជេ អាណូ ថែមទាំងមានកាំបិតនៅក្នុងដៃប៉ុនប៉ងចាក់សម្លាប់ខ្លួនឯងទៀតផង។

ដោយឡែកបើតាម វីជេ អាណូ បាននិយាយថា «ខ្ញុំរងសម្ពាធ ខ្ញុំទៅមុខទៀតអត់រួចសោះ ខ្ញុំអត់សមធ្វើជាម្ដាយគេទេ ខ្ញុំពិបាកក្នុងខ្លួនខ្លាំងណាស់ ហេតុអ្វីខ្ញុំមកជួបរឿងបែបនេះ… ប៉ុន្មានថ្ងៃនេះខ្ញុំខំទៅរកការងារធ្វើ តែរងពាក្យមើលងាយថា មីនឹងវាចេញមកទៀតហើយ ពេលមានបញ្ហាវារត់រកឲ្យគេជួយ.. ខ្ញុំខំប្រឹងដោយកម្លាំងខ្លួនឯងហើយ គ្រាន់តែចង់រកស៊ីចិញ្ចឹមកូនហេតុអ្វីក៏ខ្ញុំត្រូវរងពាក្យសម្ដីប្រមាថមើលងាយច្រើនយ៉ាងនេះ?»។ អ្នកនាង បន្តថា ហេតុអ្វីត្រូវរងសម្ពាធដូច្នេះ ហើយចាំបាច់និយាយពាក្យអសុរោះ ហៅអញ ងែងៗ ទើបធ្វើឲ្យនាងទទួលយកមិនបានដែលដក់ជាប់នៅក្នុងខួរក្បាលតែម្ដង។

វីជេ អាណូ បញ្ជាក់ថា ព្រោះតែការរងនូវសម្ពាធផ្លូវចិត្តខ្លាំងទើបបានជាលែងចង់រស់តទៅទៀត ខណៈនាងថា កន្លងមកខ្លួនធ្លាប់ប៉ងសម្លាប់ខ្លួន ២ ដងរួចមកហើយ ដោយការលេបថ្នាំ និងចង.ក ប៉ុន្តែអត់ស្លាប់៕

អត្ថបទ ៖ ចាន់រ៉ា