ជីវិតកម្សាន្ដ

លីវ ជីលី ត្រូវការកម្លាំងចិត្តពីអ្នកគាំទ្រដើម្បីពង្រឹងសមត្ថភាពចេញទៅប្រកួតឆាប់ៗនេះ

បានផុស

៣ years មុន

នៅ

ថ្ងៃពុធ ៣ កុម្ភៈ ២០២១

ដោយ

កញ្ញា លីវ ជីលី ដែលត្រូវបានឡើងមកកាន់តំណែងMiss Grand 2020ជំនួសអតីតកញ្ញាឯក សេង រដ្ឋា បានប្រកាសស្នើដល់មហាជនពិសេសអ្នកគាំទ្រវិស័យកញ្ញាឯកជួយផ្តល់ជាកម្លាំងចិត្ត និងបញ្ចេញ មតិក្នុងន័យកែលម្អជាជាងការរិះគន់បែបជាន់ពន្លិច ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើសុំរបស់កញ្ញា លីវ ជីលី នេះគឺបានធ្វើឡើងក្នុងពិធីផ្ទេរតំណែងកាលពីថ្ងទី០១ ខែកុម្ភ: ឆ្នាំ២០២១ម្សិលមិញដែលរៀបចំដោយភាគីក្រុមហ៊ុនមហាហង្ស។ ម្ចាស់មកុដកញ្ញាឯក Miss Grand 2020 ត្រូវបានផ្ទេរទៅឲ្យកញ្ញាឯករងលំដាប់ទី២កញ្ញាលីវ ជីលី ខណៈជ័យលាភីលំដាប់រងទី៣ត្រូវឡើងមកលំដាប់រងទី១ និងលំដាប់រងទី៤ត្រូវឡើងមកលំដាប់រងទី២វិញ។

កញ្ញា លីវ ជីលី ជាអតីតម្ចាស់ជ័យលាភីរងលំដាប់ទី២ និងជាអតីតបេក្ខភាពតំណាងខេត្តបន្ទាយមានជ័យ នាងមានអាយុ២៤ឆ្នាំ កម្ពស់១,៧០ម៉ែត្រ បញ្ចប់ការសិក្សាត្រឹមឆ្នាំទី៣នៃជំនាញហិរញ្ញវត្ថុធនា គារ ។ នាងធ្លាប់ទទួលបានការចាប់អារម្មណ៍ខ្លាំងក្នុងវគ្គបង្ហាញសមត្ថភាពលើកដំបូងជាមួយនឹងដើមទ្រូងដ៏ទ្រលុកទ្រលន់ខណៈសាមីខ្លួនអះអាងថា ពេញមួយតួខ្លួនរបស់នាងគឺពិតមិនបានកែច្នៃឡើយ ។

កញ្ញា លីវ ជីលី បាននិយាយថាវាពិតជាលឿន និងមិននឹកស្មានដល់ព្រោះនាងមិនដែលបានគិតដល់ចំណុចនេះទេ។ នាងថា រយៈពេល១ខែគឺពិតជាខ្លី ហើយអ្វីដែលនាងប្រឹងប្រែងខ្លាំងគឺការហ្វឹកហាត់ដើរដើម្បីកាន់តែបន្ថែមទំនុកចិត្តដែលនាងមានស្រាប់។ នាងថាក្រោយបញ្ចប់ការប្រកួតនាងមិនបានធ្វើការហ្វឹកហាត់អ្វីឡើយទើបតែចាប់ផ្តើមនាពេលនេះ ដែលនាងនឹងប្រឹងប្រែងឲ្យអស់ពីលទ្ធភាព។

ជាមួយគ្នានេះ នាងក៏បានស្នើឲ្យមហាជនពិសេសអ្នកគាំទ្រវិស័យកញ្ញាឯកជួយផ្តល់ជាកម្លាំងចិត្តបញ្ចេញមតិក្នុងន័យកែលម្អជាជាងការរិះគន់បែបជាន់ពន្លិច និងបញ្ចប់ការគិតថាត្រឹមតែជាការចេញទៅប្រកួតដើម្បីជាការអមឆាក ខណៈដែលពេលនេះនាងក៏ត្រូវការកម្លាំងចិត្តដើម្បីបន្តពង្រឹងសមត្ថភាពឲ្យកាន់តែល្អប្រសើរតាមតែអាចធ្វើទៅបាន។

ដោយឡែកលោក អ៊ិន សុភិន ដែលជាថៅកែផលិតកម្មមហាហង្ស ថ្លែងថាក្រុមហ៊ុនបានត្រៀមគ្រប់សព្វដើម្បីថែទាំហ្វឹកហាត់ទាំងការដើរបង្ហាញម៉ូដឆ្លើយសំណួរ និងសកម្មភាពផ្សេងៗដើម្បីប្រាកដថានឹងអាចក្លាយជាបេក្ខនារីតំណាងជាតិចេញទៅប្រកួតលើឆាកអន្តរជាតិបាន។

លោកបន្តថាបញ្ហាដែលកើតឡើងកន្លងមកនឹងក្លាយជាបទពិសោធន៍ថ្មីសម្រាប់ការផលិតកម្មវិធីលើកក្រោយ ហើយបើទោះបីជានៅសល់ពេលមិនច្រើនក្តីប៉ុន្តែផលិតកម្មនឹងខិតខំពង្រឹងសមត្ថភាពកញ្ញាឯកតំណាងជាតិតាមលទ្ធភាពនិងដើម្បីបញ្ចប់ការគិតថាត្រឹមតែជាបេក្ខនារីអមឆាក៕

អត្ថបទ ៖ ចាន់រ៉ា