ឈុតរបស់ Chompoo ប្លែកពេក អ្នកគាំទ្រស្មានថានាងដណ្ដប់ភួយដើរម៉ូដនៅប៉ារីស

កាលពីប៉ុន្មានថ្ងៃមុននេះ តារាស្រីជួរមុខក្នុងប្រទេសថៃ Chompoo Araya បានហោះហើរទៅក្រៅប្រទេសដើម្បីចូលរួមព្រឹត្តិការណ៍ម៉ូដលំដាប់ពិភពលោក​ CHANEL ជាមួយនឹងឈុតសំលៀកបំពាក់ Spring/Summer 2024​haute couture collection ដែលមានឈ្មោះថា​ The Button បានប្រព្រឹត្តទៅនៅ GRAND PALAIS ÉPHÉMÈRE ក្នុងទីក្រុងប៉ារីស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពពីគេហទំព័រថៃ Sanook បានបង្ហោះនូវរូបភាពអ្នកម្ដាយហៃសូ Chompoo ក្នុងសំលៀកបំពាក់ថ្មីស្រឡាងមួយឈុតទៀត ក្នុងពេលមើលដំបូងដូចជានាងកំពុងតែដណ្ដប់ភួយ ដើរបង្អួតសម្រស់ក្នុងទឹកដីប៉ារីស។ ថ្វីដ្បិតតែជាម៉ូដមួយមើលទៅរាងរញ៉េរញ៉ៃក៏ពិតមែន ប៉ុន្តែនៅពេលតារាសម្ដែងរូបនេះបើកក្រណាត់ដែលនាងដណ្ដប់ចេញពីរាងកាយ ទើបដឹងថា តាមពិត Chompoo លាក់ភាពសិចស៊ីនៅខាងក្នុង។

ដោយសារតែសម្រស់ដ៏ឆើតឆាយនៃឈុតចម្លែកដូចភួយពណ៌ផ្ទៃមេឃស្រាលរបស់ Chompoo បានធ្វើឲ្យទស្សនិកជនដែលនិយមតាមដាននាងចូលមកបញ្ចេញមតិព្រាត ទាក់ទិននឹងសំលៀកបំពាក់នេះមិនខុសពីសព្វដងនោះទេ។ ជាពិសេស ឈុតដ៏ស្មុគស្មាញគ្មានពីរនេះ មានតែនាងប៉ុណ្ណោះហ៊ានស្លៀកចេញក្រៅ ហើយក៏សក្តិសមនឹងរាជិនីម៉ូដក្នុងឧស្សាហកម្មកម្សាន្តផងដែរ។

ទោះយ៉ាងណាក៏ដោយ សំលៀកបំពាក់ប្លែកៗដែលតារាសម្ដែងមានស្វាមីជាសេដ្ធីរូបនេះស្លៀកចូលរួមកម្មវិធីក្រៅប្រទេសមិនមែនជារឿងប្លែកភ្នែករបស់អ្នកគាំទ្រតាំងពីដើមទីមកម្ល៉េះ។ កាលពីប៉ុន្មានថ្ងៃមុន នាងទើបតែលេងខ្លួនក្នុងឈុតពណ៌ក្រហមចាំភ្នែកដល់ថ្នាក់ទស្សនិកជនប្រៀបផ្ទឹមនាងដូចមនុស្សភពក្រៅថែមទៀត៕

សូមទស្សនារូបភាពខាងក្រោម៖

អត្ថបទ៖ សាង ស្រីល័ក្ខ

ចុចអាន៖Bella ត្រូវ​ជនមិនស្គាល់មុខ​​បង្កើត​ Facebook ក្លែងក្លាយបន្លំសុំលុយពីហ្វេន