តុលាការសេអ៊ូលកាត់ទោស អតីតក្រុម B.A.P ជាប់ពន្ធនាគារ៣ឆ្នាំ​ ពាក់ព័ន្ធនឹងរំលោភសេពសន្ថវៈ

នៅថ្ងៃទី ០១ ខែកុម្ភៈ ផ្នែកឧក្រិដ្ឋកម្មនៃតុលាការក្រុង Seoul Western District (ចៅក្រម Kwon Sung Soo) បានកាត់ទោសលោក Kim Himchan​ ឲ្យជាប់ពន្ធនាគាររយៈពេល៣ ឆ្នាំ ដោយពន្យាពេលការសាកល្បងរយៈពេល៥ ឆ្នាំ ពីបទចោទប្រកាន់ពីបទរំលោភសេពសន្ថវៈ និងការរំលោភលើច្បាប់ស្តីពី ការដាក់ទណ្ឌកម្មនៃឧក្រិដ្ឋកម្មផ្លូវភេទ (ការថត ឬចូលរួមក្នុងអំពើអាសអាភាសដោយប្រើកាមេរ៉ា ឬប្រព័ន្ធផ្សព្វផ្សាយទំនាក់ទំនង)។

លើស​ពី​នេះ យោងតាម allkpop បានបញ្ចាក់ដែរថា តុលាការ​បាន​បង្គាប់​ឲ្យ Himchan ឆ្លងកាត់​ថ្នាក់​ព្យាបាល​អំពើ​ហិង្សា​ផ្លូវ​ភេទ​រយៈពេល ៤០ ម៉ោង។ គាត់ក៏នឹងត្រូវទទួលរងការរឹតបន្តឹងរយៈពេល ៣ ឆ្នាំ​លើការងារនៅក្នុងស្ថាប័នទាក់ទងនឹងកុមារ យុវជន និងបុគ្គលពិការផងដែរ។

មុនពេលតុលាការកាត់ទោសអតីតសមាជិកក្រុម B.A.P រូបនេះ ​Himchan ត្រូវបានចោទប្រកាន់ពីបទរំលោភផ្លូវភេទលើជនរងគ្រោះដែលគាត់បានអញ្ជើញទៅផ្ទះគាត់ក្នុងខែឧសភា ឆ្នាំ ២០២២ ដោយថតវាដោយខុសច្បាប់ ហើយបន្ទាប់មកបានផ្ញើខ្លឹមសារនៃឃ្លិបទៅជនរងគ្រោះក្នុងខែមិថុនា។ ក្នុងនោះផងដែរ នៅមុនពេលកើតមានហេតុការណ៍នេះ Himchan ក៏ត្រូវបានចោទប្រកាន់ពីបទបៀតបៀនផ្លូវភេទស្ត្រីពីរនាក់ ខណៈពេលដែលស្រវឹងនៅខាងក្រៅបារមួយក្នុង សង្កាត់ Hannam-dong ទីក្រុងសេអ៊ូល ក្នុងខែមេសា។

ទន្ទឹមនឹងនេះដែរ Himchan ត្រូវបានកាត់ទោសឲ្យជាប់ពន្ធនាគារជាក់ស្តែងនៅក្នុងសាលាឧទ្ធរណ៍សម្រាប់ការរំលោភផ្លូវភេទដោយបង្ខំលើស្ត្រីអាយុ ២០ ឆ្នាំ ដែលមានឈ្មោះហៅកាត់ថា A នៅទីក្រុង Namyang-ju នៃខេត្ត Gyeonggi-do ក្នុងខែកក្កដាឆ្នាំ ២០១៨ ។ បន្ទាប់ពីបានបម្រើរយៈពេល១០ខែ ការកាត់ទោសដែលបានបញ្ចប់កាលពីខែធ្នូឆ្នាំមុន គាត់ត្រូវបានចាប់ខ្លួនម្តងទៀត ហើយត្រូវបាននាំយកទៅកាត់ទោសពីបទឧក្រិដ្ឋកម្មផ្លូវភេទបន្ថែមទៀតផងដែរ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖កន្លងផុតទៅ២០ឆ្នាំ  Lee Young Ae ត្រៀមសម្តែងរឿង “ជីវិតនាងចាំងគីម” វគ្គ២