ជីវិតកម្សាន្ដ

ផ្តាច់ខ្លួនចេញពីអាជីពសម្ដែង តួប៉ាវចិនត្រូវរស់នៅ តស៊ូជាមួយជំងឺរាប់ឆ្នាំ

បានផុស

៣ ខែ មុន

នៅ

ថ្ងៃអង្គារ ២៤ ធ្នូ ២០២៤

ដោយ

Jin Chao-chun កើតនៅឆ្នាំ ១៩៥១ គាត់មានភាពល្បីល្បាញដោយសារតួនាទីជាតុលាការមុខដែកមានឈ្មោះថា ប៉ាវចិន ដ៏ល្បីល្បាញបំផុតនៅលើអេក្រង់។ តារាសម្ដែងរូបនេះ មានអាជីពដ៏លំបាក និងឆ្លងកាត់រឿងរ៉ាវជាច្រើន ពីបុរសមិនស្គាល់មុខ រហូតក្លាយជាតារាក្នុងវិស័យសិល្បៈចិន។

តាំងពីក្មេងមកលោកមិនមានលក្ខខណ្ឌអំណោយផលច្រើនទេ។ រូបរាងធម្មតា និងរូបរាងកាយមិនធម្មតារបស់គាត់បានធ្វើឲ្យគាត់ជួបប្រទះការលំបាកជាច្រើននៅពេលចូលក្នុងឧស្សាហកម្មកម្សាន្តដែលមានការប្រកួតប្រជែង។ បន្ទាប់ពីបញ្ចប់ការសិក្សា Jin Chao-chun បានចូលបម្រើការងារនៅស្ថានីយទូរទស្សន៍មួយ ប៉ុន្តែនៅតែមិនអាចគេចផុតពីការលំបាកផ្នែកហិរញ្ញវត្ថុ។ គាត់រស់នៅក្នុងស្ថានភាពលំបាក គ្មានផ្ទះផ្ទាល់ខ្លួន ហើយត្រូវប្រឹងប្រែងរកប្រាក់ចិញ្ចឹមជីវិត។

ទោះជាយ៉ាងណា ចំណង់ចំណូលចិត្តការសម្ដែងរបស់លោកនៅតែមិនថមថយឡើយ។ គាត់ប្រមូលបទពិសោធន៍ដោយស្ងៀមស្ងាត់ ហើយតែងតែត្រៀមខ្លួនទទួលយកឱកាស។ រហូតដល់ឆ្នាំ ១៩៩៣ ដែលអាជីពរបស់លោកមានចំណុចរបត់ដ៏សំខាន់មួយ។ នៅពេលដែលគាត់បានឮអំពីគម្រោងភាពយន្ត Justice Pao ផលិតដោយតៃវ៉ាន់ គាត់ដឹងថានេះគឺជាឱកាសដ៏ល្អមួយដើម្បីផ្លាស់ប្តូរជោគវាសនានិងការបញ្ជាក់ពីទេពកោសល្យ។

ភាពយន្ត Justice Pao ឆ្នាំ ១៩៩៣ ទទួលបានជោគជ័យគួរឲ្យភ្ញាក់ផ្អើល។ ដំបូងឡើយ ផលិតករគ្រោងនឹងថតត្រឹមតែ ១៥ភាគប៉ុណ្ណោះ ប៉ុន្តែក្រោយមកការងារនេះ បានទទួលការស្រលាញ់ពីមហាជន និងបន្តរហូតដល់ ២៥០ភាគ។

តារាសម្ដែងវ័យចំណាស់បាននិយាយថា ទោះបីជាលោកដើរតួមួយចំនួនផ្សេងទៀតក្នុងអាជីពរបស់គាត់ក៏ដោយ ប៉ុន្តែបន្ទាប់ពីបានដើរតួជាប៉ាវចិន គាត់លែងចាប់អារម្មណ៍នឹងតួអង្គផ្សេងទៀតទៀតហើយ។ រហូតមកដល់ពេលនេះលោក បានថតរឿង Justice Pao ដល់ទៅជាង ៧០០ ភាគ។

ទោះជាយ៉ាងនេះក្ដី Jin Chao-chun ទទួលរងពីជំងឺជាច្រើនក្នុងជីវិតចុងក្រោយរបស់គាត់ រួមទាំងសម្ពាធឈាមខ្ពស់ ជំងឺជាតិស្ករក្នុងឈាម ភាពធាត់ និងការគេងមិនដកដង្ហើម។ នៅឆ្នាំ ២០១៧ គាត់បានទទួលការវះកាត់ដុំសាច់ក្នុងខួរក្បាល ហើយសុខភាពស្រាប់តែធ្លាក់ចុះ។ លើកចុងក្រោយដែលលោកបង្ហាញខ្លួនគឺនៅឆ្នាំ ២០២០ តារាសម្តែងត្រូវប្រើឈើច្រត់ ហើយពិបាកដើរពេលទៅចូលរួមបុណ្យសពអ្នកដឹកនាំរឿងដ៏ល្បីល្បាញ។ តារាសម្ដែងរូបនេះត្រូវបានគេរាយការណ៍ជាបន្តបន្ទាប់ថាបានទទួលមរណភាព។ ប៉ុន្តែប្រព័ន្ធផ្សព្វផ្សាយបានដឹងតែពីស្ថានភាពជំងឺរបស់គាត់តាមរយៈ Fan Hung-hsuan។

យ៉ាងណាមិញ ទោះបីជាជីវិតបច្ចុប្បន្នរបស់គាត់មិនដូចពីមុនក៏ដោយ ប៉ុន្តែការរួមចំណែករបស់គាត់ក្នុងវិស័យភាពយន្តចិន និងរូបភាពរបស់ Bao Zheng នឹងនៅតែចងចាំនៅក្នុងបេះដូងទស្សនិកជនជានិច្ច៕