ណុប ដាណេ ៖ ទំពាំងដ៏ល្អរបស់កម្ពុជា ក្នុងវិស័យរ៉េប “ព្រះអាទិត្យ ព្រះចន្ទ”

ក្រោយមានភ្នក់ផ្សែងនៃសង្គ្រាម Disstrack ក្នុងវិស័យតន្ត្រីរ៉េបជាថ្មី រវាង G-Devith និង Vannda មហាជនក៏ដូចជាអ្នកស្ថិតក្នុងរង្វង់សិល្បៈមួយចំនួន បាននាំគ្នាជ្រើសរវាងតារារ៉េបទាំងពីរ។ ខណៈអ្នកសិល្បៈនិងបុគ្គលល្បីៗដទៃផ្សេងទៀត ក៏បានចេញមកបង្ហាញការយល់ឃើញរៀងៗខ្លួន ក្នុងន័យមិនចង់ឱ្យការផ្សះផ្សាររវាងអ្នកទាំងពីរ កាលពីពេលកន្លងមក ប្រែជាឥតន័យនោះឡើយ។

ដោយមិនចង់មើលឃើញសង្គ្រាម Disstrack គ្នារវាងតារារ៉េបឆ្នើមរបស់កម្ពុជាទាំង ២ដួង អ្នកច្នៃម៉ូដល្បីឈ្មោះ ណុប ដាណេ បានបង្ហាញរូបថតខ្លួនជាមួយ G-Devith និង Vannda ភ្ជាប់ជាមួយនឹងខ្លឹមសារ “ទំពាំងដ៏ល្អរបស់កម្ពុជា ក្នុងវិស័យរ៉េប ព្រះអាទិត្យ ព្រះច័ន្ទ” ដែលហាក់បង្កប់ន័យដ៏ជ្រាលជ្រៅ ប្រដូចតារារ៉េបទាំងពីរទៅនឹងព្រះអាទិត្យ-ព្រះចន្ទ។

ក្នុងន័យនេះ មហាជនយល់ថា គាត់ទំនងជាចង់សំដៅដល់ការដែលមហាជន បានទទួលស្គាល់សមត្ថភាពនិងទេពកោសល្យរបស់អ្នកទាំងពីរ ក្នុងវិស័យតន្ត្រីរ៉េប ដោយចាត់ទុកថា អ្នកទាំងពីរ ជាយុវជនជំនាន់ក្រោយដ៏ឆ្នើមដូចគ្នា ហើយមានគុណតម្លៃរៀងៗខ្លួនបីដូចព្រះអាទិ្យ និងព្រះចន្ទ ដែលពិភពនៃចម្រៀងរ៉េបមួយនេះ មិនអាចខ្វះនរណាម្នាក់បាន។

បើនិយាយពីសមត្ថភាព និងទេពកោសល្យរបស់តារារ៉េបល្បីឈ្មោះរបស់កម្ពុជាទាំងពីរ អ្នកផលិតមាតិកាដ៏មានប្រជាប្រិយ Doctor Sem Ratana ទទួលស្គាល់ថា ខ្លាំងដូចគ្នា និងអាចរក្សាឈ្មោះក្នុងប្រវត្តិសាស្ត្រចម្រៀងរ៉េប។ ជាក់ស្តែង តារារ៉េបទាំងពីរ សុទ្ធតែជាអ្នកជួយជ្រោងឱ្យពិភពលោកបានស្គាល់ភាពខ្លាំងរបស់កម្ពុជា តាមរយៈចម្រៀងដែលខ្លួនបង្ហាញចេញទៅ ពិសេសបទមហានគរ របស់ G-Devith និងបទ Time to Rise របស់ Vannda ជាដើម។

ពិតណាស់ បណ្តាអ្នកគាំទ្រក៏ដូចជាអ្នកសិល្បៈមួយចំនួន ហាក់មិនចង់មើលសង្គ្រាម Disstrack គ្នារវាងតារារ៉េបទាំងពីរកើតឡើងវិញក៏ពិតមែន ប៉ុន្តែអ្នកមួយចំនួនបែរជាយល់ថា រាល់ពេលមានសង្គ្រាម Disstrack រវាងអ្នកទាំងពីរកើតឡើង ធ្វើឱ្យបទចម្រៀងដែលចេញមក រន្ថើនដល់អារម្មណ៍អ្នកគាំទ្រ ក៏ព្រោះតែម្នាក់ៗប្រឹងបង្ហាញសក្តានុពលអស់ពីខ្លួន៕