អ្នកនាង ខាត់ សុឃីម ផ្តួចផ្តើមគំនិតបង្កើតព្រឹត្តិការណ៍តន្ត្រីបុរាណ «Solo កន្ទ្រឹម» ខណៈកំពុងប្រកាសរកអ្នកឧបត្ថម្ភ

ស្របពេលដែលព្រឹត្តិការណ៍ប្រគំតន្ត្រីចម្រៀងសម័យ របស់តារាចម្រៀងកម្ពុជាជាច្រើន កំពុងរៀបចំធ្វើជាបន្តបន្ទាប់ តារាពហុជំនាញ ខាត់ សុឃីម ក៏ចេញគំនិតផ្តួចផ្តើមមួយ ចង់ឱ្យមានព្រឹត្តិការណ៍តន្ត្រីបុរាណ «Solo កន្ទ្រឹម» និងប្រកាសទទួលការឧបត្ថម្ភផងដែរ។

ជាមួយនឹងគំនិតផ្តួចផ្តើមមិនធ្លាប់មាននេះ អ្នកសិល្បៈ ក៏ដូចជាសាធារណជនជាច្រើន មានការចាប់អារម្មណ៍ និងលើកឡើងថា ពិតជាប្លែក ព្រោះកន្លងមកមិនធ្លាប់មានព្រឹត្តិការណ៍បែបនេះឡើយ ខណៈសាធារណជនខ្លះ បានសុំចូលរួមជាថវិកាតិចតួចជាមួយតារាពហុជំនាញនៃគ្រួសារវង់ភ្លេងបុរាណដ៏ល្បីត្រកូលខាត់នេះផងដែរ។

ក្នុងនោះតួត្លុក មុំវណ្ណ ដាវីន និង រិទ្ធ ដារ៉ូ ក៏បានចូលរួមគាំទ្រ តាមរយៈសាច់រឿងខ្លីផ្សព្វផ្សាយដំណឹងនេះជាសាធារណៈ ដើម្បីជួយស្វែងរកការឧបត្ថម្ភដល់គំនិតផ្តួចផ្តើមបង្កើតព្រឹត្តិការណ៍តន្ត្រីបុរាណ «Solo កន្ទ្រឹម» របស់អ្នកនាង ខាត់ សុឃីម ផងដែរ។

គួរជម្រាបថា កូនស្រីច្បងនៃគ្រួសារតន្រ្តីបុរាណនេះ មានចំណេះជំនាញផ្នែកឧបករណ៍ភ្លេងបុរាណ និងចាប់ផ្តើមចេញច្រៀងភ្លេងបុរាណជាមួយលោកឪពុកដែលជាគ្រូភេ្លង តាំងពីកុមារភាពមកម្ល៉េះ។ ក្រៅពីអាជីពខាងតន្ត្រីបុរាណ អ្នកនាងក៏ធ្លាប់ប្រឡូកអាជីពជាតារាកំប្លែង ក៏ដូចជាធ្លាប់បានសម្តែងភាពយន្តផងដែរ។ លើសពីនេះ អ្នកនាង ខាត់ សុឃីម ក៏មានមុខជំនួញមួយខាងផលិតផលសម្រស់ថែមទៀតផង។

ក្រោយ​ជោគជ័យ​​ក្នុង​វិស័យ​សិល្បៈ​យូរ​​ឆ្នាំ​​មក​នេះ បើ​ក្រឡេក​ទៅ​​មើល​ពី​ជីវិត​​គូរ​របស់​តារា​ស្រី​ពហុ​ជំនាញ ខាត់ សុឃីម រហូត​មក​ដល់​ពេល​បច្ចុប្បន្ន ហាក់កំពុង​មាន​សុភមង្គល​ខ្លាំង​ ខណៈ​អ្នកនាង និង​ស្វាមី​តែងតែ​បង្ហាញ​ពី​ក្ដី​ស្រឡាញ់ និង​ភាព​ផ្អែមល្ហែម​​នៅ​​ក្នុង​គ្រួសារ​​​៕