របាំព្រះរាជទ្រព្យ ទទួលបានការសាទរលើសលប់ ពីអ្នកទស្សនាចម្រុះជាតិសាសន៍ ក្នុងការសម្តែងនៅប៉ារីស

របាំព្រះរាជទ្រព្យ មរតកវប្បធម៌អរូបីយតំណាងឱ្យមនុស្សជាតិ ដែលត្រូវបានចុះក្នុងបញ្ជីរបស់អង្គការ (UNESCO) កាលពីថ្ងៃទី ៧ ខែវិច្ឆិកា ឆ្នាំ២០០៣ ត្រូវបានយកទៅសម្តែងជាថ្មីម្តងទៀត នៅប្រទេសបារាំង ខណៈទទួលបានការស្វាគមន៍គាំទ្រយ៉ាងក្រៃលែង ពីសំណាក់ភ្ញៀវអន្តរជាតិចម្រុះជាតិសាសន៍។ ខណៈមរតកវប្បធម៌មនុស្សជាតិមួយនេះ អាក់ខានសម្តែងនៅប្រទេសបារាំងប៉ុន្មានឆ្នាំមកហើយ បន្ទាប់ពីការយាងចូលទិវង្គតរបស់សម្តេចរាជបុត្រីព្រះរៀម នរោត្តម បុប្ផាទេវី ។

បើតាមសមាគមសិល្បករខ្មែរ សម្រាប់ឆាកដំបូងនៃការសម្តែងរបាំព្រះរាជទ្រព្យ នៅសារមន្ទីរ Quai Branly នាទីក្រុងប៉ារីស ភ្ញៀវអន្តរជាតិចម្រុះជាតិសាសន៍ដែលអង្គុយទស្សនា បានទះដៃកងរំពងអបអរភាពអស្ចារ្យនៃមរតកមនុស្សជាតិមិនអាចកាត់ថ្លៃមួយនេះ ដែលធ្វើឱ្យយើងក្នុងនាមជាខ្មែរ មានមោទកភាពភាពបំផុត។

ការសម្តែងរបាំព្រះរាជទ្រព្យនៅប្រទេសបារាំង គឺឆ្លុះបញ្ចាំងឱ្យឃើញនូវចំណងវប្បធម៌ដែលផ្សារភ្ជាប់ប្រទេសទាំងពីរ ក៏ដូចជាផ្តល់ឱកាសស្វែងយល់អំពីរបាំមួយ ដែលមានអាយុកាលពាន់ឆ្នាំ អមដោយសម្លៀកបំពាក់និងគ្រឿងលម្អប្រណិត និងកាយវិការរាំដ៏ទន់ភ្លន់ក្រៃលែងរបស់នាដការី។

តួយ៉ាង ក្នុងដំណើរបេសកកម្មនាំយកមរតកវប្បធម៌ដ៏ថ្លាថ្លៃមួយនេះ ទៅកាន់ប្រទេសបារាំង គឺមានប្រធានសមាគមសិល្បករខ្មែរ លោកជំទាវ អ្នកឧកញ៉ា ម៉ៅ ចំណាន អមដំណើរលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ក្រោមព្រះរាជវត្តមានសម្តេចរាជបុត្រីព្រះអនុជនរោត្តម អរុណរស្មី ។ បើតាមការបញ្ជាក់ ក្នុងដំណើរដឹកនាំប្រតិភូ និងសិល្បករកម្ពុជាទៅសម្តែងនៅប្រទេសបារាំង គឺរយៈពេល៧ថ្ងៃ ពោលគឺចាប់ពីថ្ងៃទី០៦ ដល់ ថ្ងៃទី១២ ខែមីនា ឆ្នាំ២០២៥ ។

ក្នុងនោះ មានការសម្តែងពិសេសចំនួន ៣ គ្រោងធ្វើឡើងនៅសារមន្ទីរ Muséed u quai Branly – Jacques Chirac នាក្រុងប៉ារីស៍។ ខណៈការសម្តែងពីរទៀត គ្រោងនឹងធ្វើនៅតាមខេត្ត ពោលគឺនៅ Opéra National de Bordeaux បន្ទាប់មកនៅ Cité musicale-Metz ។ នេះបើតាមការបញ្ជាក់ឱ្យដឹង ពីស្ថានទូតបារាំងប្រចាំកម្ពុជា ៕