ទេព បូព្រឹក្ស ផ្តាំអ្នកជ្រុលនិយមថៃថា បើចង់បានសម្បត្តិខ្មែរខ្លាំង គួរធ្វើបុណ្យផ្សងកើតជាខ្មែរ

តារាចម្រៀងស្រីល្បីឈ្មោះអ្នកនាង ទេព បូព្រឹក្ស កាលរសៀលថ្ងៃទី១៣ ខែមិថុនានេះ បានបង្ហោះសារដ៏មានអត្ថន័យមួយដោយផ្តាំទៅថៃដូច្នេះថា “បើចង់បានខ្លាំងណាស់ឯងខំធ្វើបុណ្យផ្សងថាពេលខ្ញុំស្លាប់ទៅសូមជាតិក្រោយកើតជាខ្មែរ”។

តារាចម្រៀងអ្នកនាង ទេព បូព្រឹក្ស បានរៀបរាប់ភ្ជាប់វីដេអូនៃបទចម្រៀងខ្លួនថា ដោយលើកខ្លឹមសារពោរពេញដោយអត្ថន័យថា “ជារបស់ខ្មែរទោះស្លាប់មិនប្រែថែឲ្យបានដល់ទីបញ្ចប់ គ្មានឈាមជាខ្មែរអ្នកមិនអាចក្បែរមិនអាចដោះសោរកំណប់”។

ទន្ទឹមនឹងខ្លឹមសារខាងលើ អ្នកនាង ទេព បូព្រឹក្ស បានដាក់ចំៗទៅកាន់អ្នកជ្រុលនិយមថៃថា “យើងប្រាប់ឯងមួយ បើចង់បានខ្លាំងណាស់ ឯងត្រូវខំធ្វើបុណ្យឲ្យច្រើនហើយផ្សងថា ពេលខ្ញុំស្លាប់ទៅសូមឲ្យជាតិក្រោយកើតជាខ្មែរ”។ ការលើកឡើងនេះ ត្រូវបានសាធារណជនរបញ្ចេញមតិពីគាំទ្រផងដែរ។

គួររម្លឹងដែរថា កាលពីអំឡុងឆ្នាំ២០២៤ តារាចម្រៀង ទេព បូព្រឹក្ស បានលើកឡើងខ្លឹមសារភ្ជាប់បទចម្រៀងបទ “ទេវរាជ “​ ថា ពួកយើងគួរតែដើរដល់ចំណុចមួយដែលមិនចាំបាច់កាប់ថ្ម ឬចំហរទ្រូងប្រាប់អ្នកណាថានេះជារបស់យើង ព្រោះវត្ថុដែលយើងកំពុងមាន ដែលយើងកំពុងរក្សាទាំងអស់នេះគឺជាទីប្រាថ្នា ចង់បានចង់ដូច ចង់ប៉ង ចម្លង ចង់ពាល់ អន្ទះសារចង់ដល់នូវដំណែលនេះ ។

តារាចម្រៀងរូបនេះបន្ថែមថា “ដូច្នោះហើយចូលបងប្អូនកូនចៅរួមគ្នាជាធ្លុង រក្សាឱ្យគង់ កុំឱ្យវៀចវេរ សុរិយាអស្ចារ្យរន្ទឺអាគ្នេយ៍ បន្សល់ទុកកេរ្តិ៍ ខ្មែរតជំនាន់។ យើងខ្ញុំជាអ្នកដល់នូវឧបនិស្ស័យសូមចែករំលែកស មិទ្ធផលនេះជូនជនរួមជាតិ សូមទទួលយកដោយក្តីស្រលាញ់និងមោទនភាព”៕ ចាន់រ៉ា