Park Bom បញ្ចាក់សាថ្មីថា Lee Min Ho ជាគូស្នេហ៍ ខណៈហ្វេនបារម្ភសុខភាពកាន់តែធ្ងន់

នៅកាលពីថ្ងៃទី ១៤ ខែកញ្ញា Park Bom បានបង្ហោះរូបថតថ្មីទៅក្នុងគណនីផ្ទាល់ខ្លួនរបស់នាង ជាមួយនឹងចំណងជើងថា «Park Bom. On the street»។ នៅក្នុងរូបភាពនេះ គេឃើញ សមជិកក្រុម 2ne1 ចេញទៅដើរលេង ដោយស្លៀកពាក់អាវក្រៅពណ៌ខ្មៅ ភ្ជាប់ជាមួយនឹងខ្សែក rosary ព្រមទាំងមួលសក់​រួញ​បន្តិច ​បាន​បន្ថែម​ភាព​ទាក់ទាញ​ពី​ធម្មជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ុន្តែ​អ្វី​ដែល​ទាក់ទាញ​ចំណាប់​អារម្មណ៍​មិន​មែន​មាន​ត្រឹមតែ​រូប​ថត​នោះ​ទេ ពោល​គឺ Park Bom បាន​ដាក់​ស្លាក​តារា​សម្ដែង Lee Min Ho ម្ដង​ទៀត​ក្នុង​ការ​បង្ហោះមួយនោះ។

កាល​ពី​ខែ​កញ្ញា​កន្លង​ទៅ តារាស្រីវ័យ៤១ឆ្នាំបាន​បង្កើត​ពាក្យ​ចចាមអារ៉ាម​ថា ខ្លួន​មាន​ស្នេហា​ជាមួយ Lee Min Ho ដោយ​បង្ហោះ​រូបថត ហើយ​ហៅ​គាត់​ថា ស្វាមីពិតៗ។ នៅពេលនោះ ភ្នាក់ងាររបស់នាងបានច្រានចោលថា វាគ្មានអ្វីក្រៅពី fandom នោះទេ។

ទោះជាយ៉ាងនេះក្ដី កាលពីដើមឆ្នាំនាងបានបង្ហោះរូបថតខ្លួនឯង ជាមួយនឹងតារាសម្ដែង Lee Min Ho នៅលើគណនីបន្ទាប់បន្សំ ជាមួយនឹងការអះអាងដូចគ្នា។ ទោះបីជាភ្នាក់ងាររបស់នាង បញ្ជាក់ម្តងហើយម្តងទៀតថាវាជាអ្នកគាំទ្រក៏ដោយ ប៉ុន្តែ Park Bom បានទទូចថាជាការពិត។ សូម្បីតែការចោទប្រកាន់ថា ការបង្ហោះត្រូវបានលុបដោយក្រុមហ៊ុនរបស់នាង ប្រឆាំងនឹងឆន្ទៈរបស់តារាស្រីក៏ដោយ។

ដោយឡែក ងាកទៅកាន់ភាគីរបស់ Lee Min Ho បានបដិសេធយ៉ាងម៉ឺងម៉ាត់ចំពោះទំនាក់ទំនងណាមួយដោយនិយាយថា ១មិនមានទំនាក់ទំនងផ្ទាល់ខ្លួនជាមួយ Park Bom» ហើយថាពាក្យចចាមអារ៉ាមនេះគឺគ្មានមូលដ្ឋានច្បាស់លាស់ឡើយ។ បន្ទាប់ពីនោះ Park Bom បានបង្ឲ្យមានការព្រួយបារម្ភបន្ថែមទៀតជាមួយនឹងការលើកឡើងដែលច្របូកច្របល់ នៅចំណុចមួយដែលនិយាយថានាងនៅលីវ ប៉ុន្តែក៏បានលើកឡើងថា Lee Min Ho បានស្នើឲ្យនាងបង្ហោះការអះអាងបែបនេះដលសាធារណជនផងដែរ។

ថ្វីដ្បិតតែថ្មីៗនេះ តារាចម្រៀងស្រីសំឡេងផ្អែម បានចូលរួមក្នុងសកម្មភាពក្រុម 2NE1 ជាថ្មីក៏ដោយ ប៉ុន្តែនាងបានប្រកាសផ្អាកកាលពីខែសីហា ដោយសារបញ្ហាសុខភាព។ ក្រុមនេះបន្តការផ្សព្វផ្សាយជាក្រុមដោយមានតែ CL, Dara, និង Minzy ខណៈដែល Park Bom បានរក្សាទំនាក់ទំនងជាមួយអ្នកគាំទ្រតាមរយៈប្រព័ន្ធផ្សព្វផ្សាយសង្គមប៉ុណ្ណោះ។

ជាមួយនឹងការបង្ហោះចុងក្រោយរបស់នាងដែលដាក់ស្លាក Lee Min Ho ម្តងទៀត អ្នកគាំទ្របានសម្តែងការព្រួយបារម្ភជាថ្មី ដោយបញ្ចេញមតិថា តើសុខភាពរបស់សមាជិកក្រុម2ne1 ពិតជាសុខសប្បាយពិតមែនឬយ៉ាងណាំ? ស្របពេលដែឡអ្នកគាំទ្រសង្កេតឃើញថា នាងមើលទៅកាន់តែគួរឲ្យខ្លាចនិងព្រួយបារម្ភជាងមុនទៀត៕

អត្ថបទ៖ សាង ស្រីល័ក្ខ

ចុចអាន៖តារាកំប្លែង Yoo Jae Suk ចាយលុយជាង៥លានដុល្លារ សង់អគារតម្លៃជាង១៤លានដុល្លារ