FDA ថៃ រកឃើញថ្នាំបំប៉នមួយប្រភេទ បង្កគ្រោះថ្នាក់ដល់ស្លាប់ភ្លាមៗ

យោងតាម thethaiger រដ្ឋបាលចំណីអាហារ និងឱសថក្នុងប្រទេសថៃ (FDA) កាលពីថ្ងៃទី ៧ ខែតុលា ឆ្នាំ២០២៥ បានចេញផ្សាយលទ្ធផលនៃការពិនិត្យអាហារបំប៉នមួយប្រភេទ វាជាគ្រាប់ថ្នាំគ្រប់គ្រងពិសេសនិងព្យាបាលបញ្ហាងាប់លិង្គ ដែលមានឈ្មោះថា Sildenafil ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដ្បិតថាយ៉ាងនេះក្ដី FDA បានចាត់ថ្នាក់ថ្នាំបំប៉នមួយនេះ គឺពុំមានសុវត្ថិភាពឡើយ ពោលគឺអ្នកប្រើប្រាស់អាចជួបប្រទះផលប៉ះពាល់ពីថ្នាំនេះ រួមទាំងការឈឺក្បាល សម្ពាធឈាមទាប ការគាំងបេះដូង ការកើនឡើងសម្ពាធក្នុងសរសៃឈាម ការបាត់បង់ការស្តាប់ និងក្នុងករណីខ្លះរហូតដល់ស្លាប់ភ្លាមៗ។

ការវិភាគលើផលិតផលនេះដោយនាយកដ្ឋានវិទ្យាសាស្ត្រវេជ្ជសាស្ត្រ បានបង្ហាញពីវត្តមានរបស់ឱសថ sildenafil ដែលត្រូវបានចាត់ថ្នាក់ជាថ្នាំគ្រប់គ្រងពិសេសមួយ។ ឱសថនេះទៀតសោត ត្រូវបានប្រើដើម្បីព្យាបាលបញ្ហាងាប់លិង្គរបស់បុរស និងតម្រូវឲ្យមានវេជ្ជបញ្ជាត្រឹមត្រូវតែប៉ុណ្ណោះ។

មិនតែប៉ុណ្ណោះ FDAថៃ បានគូសបញ្ចាក់ទៀតថា ប្រភេទថ្នាំបំប៉ននេះវាមានការបំពុលដោយសារធាតុដែលអាចបង្កគ្រោះថ្នាក់ដល់សុខភាព និងគ្មានសុវត្ថិភាពសម្រាប់ការប្រើប្រាស់ឡើយ។ បច្ចុប្បន្ន FDA និងភ្នាក់ងារពាក់ព័ន្ធកំពុងចាត់វិធានការតាមផ្លូវច្បាប់ចំពោះជនល្មើស ព្រមទាំងដាស់តឿនដល់សាធារណជនឲ្យមានការប្រុងប្រយ័ត្ននៅពេលទិញ ឬប្រើប្រាស់ផលិតផលអាហារមួយនេះ៕

អត្ថបទ៖ សាង ស្រីល័ក្ខ

ចុចអាន៖ផ្សារទំនើបមួយនៅ ថៃ ប្រែជាស្ងាត់ជ្រងំពុំធ្លាប់មាន ខណៈហាងបើកទ្វារ តែគ្មានភ្ញៀវចូល