ពូទីន សារភាពថា ពិតជាពាក់ព័ន្ធការធ្លាក់យន្តហោះដឹកអ្នកដំណើរអាស៊ែរបៃហ្សង់មែន ប៉ុន្តែបន្ទោសអ៊ុយក្រែន

ទីបំផុតប្រធានាធិបតីរុស្ស៊ី វ្ល៉ាឌីមៀរ ពូទីន ព្រមទទួលស្គាល់ហើយថា ទីក្រុងមូស្គូ ពិតជាពាក់ព័ន្ធការបាញ់ធ្លាក់យន្តហោះដឹកអ្នកដំណើរអាស៊ែរបៃហ្សង់ Embraer 190 ដែលបណ្តាលឲ្យមនុស្សស្លាប់៣៨នាក់ និងរបួស២៩នាក់ មែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការទទួលស្គាល់នេះធ្វើឡើងក្នុងអំឡុងជំនួបជាមួយប្រធានាធិបតីអាស៊ែរបៃហ្សង់ Ilham Aliyev ក្នុងទីក្រុង Dushanbe នៃប្រទេសតាហ្ស៊ីគីស្ថាន កាលពីថ្ងៃព្រហស្បតិ៍ទី៩ខែតុលាឆ្នាំ២០២៥។

តាមការផ្សាយរបស់ Al Jazeera, លោកពូទីនសារភាពអំពីការរួមចំណែកក្នុងការធ្លាក់យន្តហោះ ប៉ុន្តែទន្ទឹមនោះ លោកបានស្តីបន្ទោសទៅអ៊ុយក្រែនថា ដោយសារតែដ្រូនទីក្រុងកៀវហោះមកលុកលុយដែនអាកាសរុស្ស៊ី នាពេលកើតហេតុនោះ។

លោកនិយាយថា ជើងហោះហើរ 8243 របស់ក្រុមហ៊ុន AZAL ត្រូវរងគ្រោះបន្ទាប់ពីខែលការពារដែនអាកាសរុស្ស៊ី តាមដានដ្រូនចំនួន៣គ្រឿងដែលឆ្លងកាត់ព្រំដែនរុស្ស៊ីនៅយប់កើតសោកនាដកម្ម។ មូលហេតុមួយទៀត គឺបញ្ហាបច្ចេកទេសនៅក្នុងប្រព័ន្ធការពារដែនអាកាសរុស្ស៊ី។ មីស៊ីលពីរគ្រាប់ត្រូវបាញ់ចេញ ប៉ុន្តែវាមិនមែនវាយប្រហារយន្តហោះដោយផ្ទាល់ទេ។ មីស៊ីល​ទំនង​ជាបំផ្ទុះ​ខ្លួន​ឯងនៅ​ចម្ងាយ​ប្រហែល១០ម៉ែត្រ​ពី​យន្តហោះ ដូច្នេះយន្តហោះនោះប្រហែលត្រូវបំណែករបស់មីស៊ីល។

ទន្ទឹមនោះដែរ មេដឹកនាំវិមានក្រឹមឡាំងប្រកាសថា រុស្ស៊ីនឹងផ្តល់សំណងសមរម្យដល់អាស៊ែរបៃហ្សង់ និងធានាឲ្យមានការវាយតម្លៃសមរម្យលើឧប្បត្តិហេតុនោះ។

សូមជម្រាបជាថ្មី សោកនាដកម្មនេះកើតឡើងនៅថ្ងៃទី២៥ខែធ្នូឆ្នាំ២០២៤ ជិតទីក្រុង Grozny នៃប្រទេសរុស្ស៊ី ក្នុងដំណើរដែលយន្តហោះចាកចេញពីទីក្រុង Baku ឆ្ពោះទៅ Grozny។

ក្រោយត្រូវមីស៊ីលបាញ់ អាកាសយានិកយន្តហោះដឹកអ្នកដំណើរ Embraer 190 បានព្យាយាមបង្វែរជើងហោះហើរដែរ ប៉ុន្តែទីបំផុតវាបានធ្លាក់នៅជិតទីក្រុង Aktau នៃប្រទេសកាហ្សាក់ស្ថាន៕

អត្ថបទ៖ សុខ សុវណ្ណ

ចុចអាន៖ រុស្ស៊ី​គំរាម​វាយ​មូលដ្ឋាន​អង្គការ​ណាតូ បើ​អាមេរិក​បញ្ជូន​មីស៊ីល Tomahawk ឲ្យ​អ៊ុយក្រែន