ត្រាំ គំរាមដាក់​ពន្ធលើអេស្ប៉ាញ ជុំវិញ​ការ​បដិសេធ​​បង្កើន​ចំណាយ​នៅ​ក្នុង​អង្គការ​ណាតូ

ប្រធានាធិបតីអាមេរិក លោក ដូណាល់ ត្រាំ បានគំរាមដាក់ទណ្ឌកម្មពាណិជ្ជកម្ម រួមទាំងពន្ធគយលើ​ប្រទេសអេស្ប៉ាញ ដោយចោទប្រកាន់ទីក្រុងម៉ាឌ្រីដ ពីការមិនគោរពដល់អង្គការណាតូ ដោយបដិសេធ​ការ​បង្កើន​ចំណាយលើវិស័យការពារជាតិដល់៥​ភាគរយនៃផលិតផលក្នុងស្រុកសរុប។

យោង​តាម​ការ​ចុះ​ផ្សាយ​របស់​រ៉យទ័រ លោក ត្រាំ បានប្រាប់អ្នកយកព័ត៌មាននៅឯ​សេតវិមាន​កាលពីថ្ងៃអង្គារ​ទី​១៤​ខែ​តុលា​ថា «ខ្ញុំមិនសប្បាយចិត្តនឹងប្រទេសអេស្ប៉ាញទេ។ ពួកគេគឺជាប្រទេសតែមួយគត់ដែលមិនបានបង្កើនចំនួនរបស់ពួកគេរហូតដល់៥​ភាគរយ… ដូច្នេះខ្ញុំមិនសប្បាយចិត្តជាមួយនឹងប្រទេសអេស្ប៉ាញ»។ លោកបានបន្ថែមថា «ខ្ញុំកំពុងគិតអំពីការផ្តល់​ឲ្យពួកគេនូវការដាក់ទណ្ឌកម្មពាណិជ្ជកម្ម តាមរយៈពន្ធគយដោយសារតែអ្វីដែលពួកគេបានធ្វើ ហើយខ្ញុំគិតថាខ្ញុំអាចធ្វើដូច្នេះ»។

ប្រធានាធិបតីអាមេរិកបានដាក់សម្ពាធជាយូរយារណាស់មកហើយសម្រាប់សម្ព័ន្ធមិត្តណាតូ​ឲ្យ​ចូលរួមចំណែកបន្ថែមទៀតដល់ការការពារសមូហភាព ដោយព្រមានថា ការការពាររបស់ទីក្រុងវ៉ាស៊ីនតោនក្រោមមាត្រា៥មិនអាចធានាបានចំពោះសមាជិកដែលខកខានមិនបានបំពេញតាមគោលដៅចំណាយទេ។ កាលពីសប្តាហ៍មុន លោក ត្រាំ បាននិយាយថា ណាតូ​គួរតែពិចារណាបណ្តេញអេស្ប៉ាញចេញពីសម្ព័ន្ធភាពជុំវិញជំហររបស់ខ្លួន។

អេស្ប៉ាញនៅតែជាសមាជិកតែមួយគត់ក្នុងចំណោមប្រទេសចំនួន​៣២​របស់ណាតូ ដែលមិនយល់ព្រមចំពោះគោលដៅថ្មីចំនួន​៥​ភាគរយ ដែលសម្ព័ន្ធមិត្តនិយាយថាជាការចាំបាច់ ដោយសារការគំរាមកំហែងជាបន្តបន្ទាប់ដែលបង្កឡើងដោយ​ការលុកលុយរបស់រុស្ស៊ីលើអ៊ុយក្រែន។

នាយករដ្ឋមន្ត្រីអេស្ប៉ាញ លោក Pedro Sánchez បាន​ប្រកាស​ថានឹងដំឡើងការចំណាយលើវិស័យការពារជាតិត្រឹមតែ២,១​ភាគរយ នៃផលិតផលក្នុងស្រុកសរុប ដោយហៅតួលេខនេះថា«គ្រប់គ្រាន់ និងជាក់ស្ដែងហើយ»។

ទីក្រុង​ម៉ាឌ្រីដបានការពារជំហររបស់ខ្លួន ដោយលើកហេតុផលថា ទោះ​ថវិកាការពារជាតិរបស់ខ្លួនទាបជាងគេ តែ​ខ្លួន​បានរួមចំណែកយ៉ាងច្រើនតាមរយៈប្រតិបត្តិការរបស់អង្គការណាតូ រួមទាំងការដាក់ពង្រាយកងទ័ពនៅក្នុងប្រទេសឡាតវី ស្លូវ៉ាគី រូម៉ានី ប៊ុលហ្គារី និងតួកគី។

ប្រទេសអេស្ប៉ាញបានចូលរួមជាមួយអង្គការណាតូក្នុង​ឆ្នាំ​១៩៨២ ហើយនៅតែជាអ្នកចូលរួមយ៉ាងសកម្មក្នុងបេសកកម្មសម្ព័ន្ធមិត្ត ទោះបីជា​រដ្ឋ​មួយ​នេះ​បន្តប្រឈមមុខនឹងការរិះគន់ពីទីក្រុងវ៉ាស៊ីនតោនជុំវិញអ្វីដែលលោក ត្រាំ ហៅថា«ការ​ពឹង​ផ្អែក​ដោយ​ឥត​គិត​ថ្លៃ»លើការការពារយោធារបស់សហរដ្ឋអាមេរិក​ក៏​ដោយ៕

ដោយ៖ ឈាង