ធ្ងន់ធ្ងរ! ថៃ ព្រមានថា អ្នកឆ្លងកូវីដ អាចកើនដល់ជិត ៣ម៉ឺនករណី ក្នុងមួយថ្ងៃ

មន្ត្រីសុខាភិបាលជាន់ខ្ពស់ថៃ បានព្រមានថា មនុស្សជាង២៨,០០០នាក់ អាចឆ្លងជំងឺកូវីដ-១៩ ក្នុងមួយថ្ងៃនៅខែក្រោយ ប្រសិនបើមិនមានវិធានការទប់ស្កាត់អំឡុងពេលនៃការផ្ទុះឡើងនាពេលបច្ចុប្បន្ននេះទេនោះ។

មជ្ឈមណ្ឌលគ្រប់គ្រងស្ថានភាពជំងឺកូវីដ-១៩របស់ប្រទេសថៃ (CCSA) បានរាយការណ៍ពីករណីជំងឺកូវីដ-១៩ ចំនួន ៩៦៧ករណីកាលពីម្សិលមិញ។

អគ្គលេខាធិការរងនៃនាយកដ្ឋានប្រយុទ្ធប្រឆាំងជំងឺឆ្លង (DDC) លោក Sopon Iamsirithaworn បាននិយាយថា ផ្នែករោគរាតត្បាតរបស់ខ្លួនសហការជាមួយកម្មវិធីគោលនយោបាយសុខភាពអន្តរជាតិ បានធ្វើការព្យាករណ៍អំពីចំនួនមនុស្សដែលអាចឆ្លងរោគក្នុងមួយថ្ងៃ ប្រសិនបើវិធានការសុវត្ថិភាពមិនត្រូវបានអនុវត្តទេនោះ។

លោកនិយាយថា នៅក្នុងសេណារីយ៉ូអាក្រក់បំផុតបើគ្មានវិធានការគ្រប់គ្រងជំងឺ មនុស្សរហូតដល់ទៅ ២៨.៦៧៨នាក់អាចឆ្លងកូវីដក្នុងមួយថ្ងៃ។

លោកវេជ្ជបណ្ឌិត Sopon និយាយថា ការចម្លងថ្មីបំផុតភាគច្រើនរបស់ប្រទេសថៃ គឺទាក់ទងទៅនឹងចង្កោមរង្គសាល ដែលឥឡូវនេះ បានរាលដាលដល់ខេត្តចំនួន៧០ហើយ។

លោកបន្តថា​ កន្លែងកម្សាន្តនៅក្នុងខេត្តចំនួន៤១ ត្រូវបានបញ្ជាឲ្យបិទរយៈពេល២សប្តាហ៍ ហើយកន្លែងកម្សាន្តពេលរាត្រីនៅតាមខេត្តចំនួន៣៦ផ្សេងទៀត ក៏អាចត្រូវបានបញ្ជាឲ្យបិទផងដែរប្រសិន បើវាត្រូវបានវាយប្រហារដោយជំងឺរាតត្បាត។

លោកវេជ្ជបណ្ឌិតគូសបញ្ជាក់ថា ម្ចាស់ហាងស្រានៅក្នុងខេត្តចំនួន៣៦ ត្រូវតែតាមដានពិធីការត្រួតពិនិត្យជំងឺ ដែលរួមមានទាំងការពាក់ម៉ាស់និងការត្រួតពិនិត្យយ៉ាងតឹងរ៉ឹងផងដែរ៕

ប្រែសម្រួលដោយ៖ Vann Vann

ប្រភព៖ Bangkok Post

ចុចអាន៖ កូវីដនៅថៃ ហក់ឡើងខ្ពស់ ថ្ងៃនេះរកឃើញរហូតដល់ទៅ ៧៨៩ករណី