UN ជំរុញឲ្យអ៊ីស្រាអែលបើកច្រកឆ្លងកាត់ហ្គាហ្សាបន្ថែមទៀត ដើម្បីទប់ស្កាត់វិបត្តិទុរ្ភិក្ស

យោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៦ខែតុលា ប្រធានផ្នែកមនុស្សធម៌របស់អង្គការសហប្រជាជាតិ លោក Tom Fletcher បានអំពាវនាវឱ្យអ៊ីស្រាអែលអនុញ្ញាត្តឲ្យមានការឆ្លងកាត់បន្ថែមទៀតចូលទៅក្នុងហ្គាហ្សាជាបន្ទាន់ ដើម្បីមានជំនួយហូរចូលគ្រប់គ្រាន់។

លោក Fletcher បាននិយាយថា មានតែឡានដឹកទំនិញតិចគ្រឿងប៉ុណ្ណោះបានចូលទៅក្នុងតំបន់ហ្គាហ្សា ខណៈដែលមនុស្សរាប់ពាន់នាក់ត្រូវការជំនួយជាចាំបាច់ប្រចាំសប្តាហ៍ដើម្បីទប់ស្កាត់គ្រោះទុរ្ភិក្សក្នុងចំណោមអ្នកផ្លាស់ទីលំនៅចំនួន២.២ លាននាក់ឯណោះ។

ស្បៀងអាហារ និងរបស់របរផ្គត់ផ្គង់ជាចាំបាជ់ជាង ១៩ ម៉ឺនតោនកំពុងជាប់គាំងនៅព្រំដែន។ លោក Fletcher បានព្រមានថា ស្ថានភាពកាន់តែអាក្រក់ទៅៗ ខណៈសង្រ្គាមរយៈពេលពីរឆ្នាំរបស់អ៊ីស្រាអែល បានបំផ្លិចបំផ្លាញតំបន់ហ្គាហ្សា និងសម្លាប់ប្រជាជនប៉ាឡេស្ទីនជិត ៦ ម៉ឺន ៨ពាន់នាក់ និងបំផ្លាញហេដ្ឋារចនាសម្ព័ន្ធសំខាន់ៗស្ទើរគ្មានសល់។

ទោះបីជាអ៊ីស្រាអែលបានយល់ព្រមអនុញ្ញាត្តឲ្យរថយន្តដឹកទំនិញចំនួន៦០០ គ្រឿងចូលក្រោមកិច្ចព្រមព្រៀងបទឈប់បាញ់ដែលសម្របសម្រួលដោយអាមេរិកបច្ចុប្បន្នក៏ដោយលោក Fletcher បាននិយាយថាចំនួននេះគឺទាបជាងចំនួនដែលត្រូវការ។ លោកបានជំរុញឱ្យមានការចូលដំណើរការដោយគ្មានការរារាំង ជាពិសេសចំពោះអង្គការមនុស្សធម៌ជាង ៥០។

ទន្ទឹមនឹងនេះ ជំនួយមិនទាន់ទៅដល់ទីក្រុង ហ្គាហ្សានៅឡើយទេ ព្រោះកងកម្លាំងអ៊ីស្រាអែលនៅតែបន្តគ្រប់គ្រងតំបន់សំខាន់ៗ ហើយផ្លូវថ្នល់នៅតែត្រូវបានរារាំងដោយកម្ទេចថ្ម។ ថ្វីបើមានបទឈប់បាញ់ក៏ដោយ ក៏ការវាយប្រហាររបស់អ៊ីស្រាអែលបានបន្តកើតមានជាបន្តបន្ទាប់ ដោយបានសម្លាប់មនុស្សយ៉ាងហោចណាស់បីនាក់ទៀតកាលពីថ្ងៃពុធ៕

អត្ថបទ៖ ប៊ុន សុភាព