ថៃ​ ដាក់គុកអ្នកគ្រប់គ្រងក្លិបរាត្រី ព្រោះបំពានវិធានការទប់ស្កាត់កូវីដ

ប៉ូលិសថៃបាននិយាយកាលពីថ្ងៃអាទិត្យម្សិលមិញថា អ្នកគ្រប់គ្រងក្លិប Krystal និង Emerald ក្នុងតំបន់ Thong Lor នៃទីក្រុងបាងកក ដែលជាចំណុចផ្ទុះជំងឺកូវីដ-១៩រលកទី៣របស់ប្រទេសថៃ ត្រូវបានផ្តន្ទាទោសឲ្យជាប់ពន្ធនាគាររយៈពេល២ខែ។

មន្ត្រីជាន់ខ្ពស់នៃប៉ូលិសក្រុងបាងកក លោក Sopon Sarapat បាននិយាយថា ការផ្តន្ទាទោសនេះត្រូវបានធ្វើឡើងដោយតុលាការក្រុងបាងកកខាងត្បូងកាលពីថ្ងៃសុក្រ បន្ទាប់ពីរកឃើញថា ពួកគេមានពិរុទ្ធពីបទរំលោភលើក្រឹត្យគ្រាអាសន្នរបស់រដ្ឋាភិបាល និងច្បាប់កន្លែងកម្សាន្ត។

លោក Sopon និយាយថា កន្លែងទាំងពីរ អាចត្រូវបានបញ្ជាឲ្យបិទរយៈពេល៥ឆ្នាំ ប្រសិនបើពួកគេត្រូវបានគេរកឃើញថា បានបើកហួសម៉ោងច្បាប់, បម្រើសេវាពេស្យាចារនិងប្រតិបត្តិការដោយគ្មានអាជ្ញាប័ណ្ណ។

ទោះបីជាយ៉ាងណាក៏ដោយ ការស៊ើបអង្កេតលើបញ្ហានេះកំពុងតែបន្ត។

ដោយមើលឃើញពីការកើនឡើងនៃចំនួនអ្នកឆ្លងយ៉ាងគំហុកនៅក្នុងរាជធានី រដ្ឋបាលក្រុងបាងកកបានបញ្ជាឲ្យមានហាងស្រា បារនិងក្លិបនានាដែលពាក់ព័ន្ធជាមួយនឹងការផ្ទុះឡើងនៃជំងឺកូវីដ-១៩រលកចុងក្រោយ ត្រូវបិទរយៈពេល១៤ថ្ងៃ។

ចាប់តាំងពីរលកទី៣បានផ្ទុះឡើង ប៉ូលិសចំនួន១៨នាក់នៅប៉ុស្តិ៍ Thong Lor បានឆ្លងជំងឺកូវីដ-១៩។ ពួកគេទាំងអស់ គឺជាអ្នកទទួលខុសត្រូវក្នុងការល្បាតតំបន់សាធារណៈ។

អ្នកជំនាញខ្លះបានលើកឡើងថា ថ្វីបើមន្រ្តីទាំងនោះពាក់ម៉ាស់ក្នុងអំឡុងពេលល្បាតក៏ដោយ ពួកគេអាចនឹងមិនយកចិត្តទុកដាក់ពាក់ស្រោមដៃពេលចេញទៅបំពេញកាតព្វកិច្ច ដែលជាហេតុបង្កើនឱកាសនៃការឆ្លងវីរុស៕

ប្រែសម្រួលដោយ៖ Vann Vann

ប្រភព៖ Bangkok Post

ចុចអាន៖ ធ្ងន់ធ្ងរ! ថៃ ព្រមានថា អ្នកឆ្លងកូវីដ អាចកើនដល់ជិត ៣ម៉ឺនករណី ក្នុងមួយថ្ងៃ