អាល្លឺម៉ង់​ គ្រោង​ទិញ​យន្តហោះ​ចម្បាំង F-35 ផលិត​ដោយ​អាមេរិក​ ១៥ គ្រឿង​បន្ថែម​ទៀត

អាល្លឺម៉ង់កំពុងរៀបចំបញ្ជាទិញយន្តហោះចម្បាំង F-35 បន្ថែមចំនួន ១៥ គ្រឿងពីក្រុមហ៊ុនការពារជាតិអាមេរិក Lockheed Martin។ នេះបើយោងតាមប្រភពសភាដកស្រង់ដោយ Reuters កាលពីថ្ងៃ ទី ២០ ខែតុលា។

ការបញ្ជាទិញថ្មីនេះមានតម្លៃប្រហែល ២.៥ ពាន់លានអឺរ៉ូ (២.៩ ពាន់លានដុល្លារ) នឹងបន្ថែមទៅលើយន្តហោះ F-35 ចំនួន ៣៥ គ្រឿងដែលអាល្លឺម៉ង់បានទិញរួចហើយដើម្បីជំនួសយន្តហោះចម្បាំង Tornado ចាស់ៗរបស់ខ្លួន។

យន្តហោះ F-35 ត្រូវបានគេរំពឹងថានឹងជំនួសតួនាទីសំខាន់របស់ Tornado ក្នុងការដឹកគ្រាប់បែកនុយក្លេអ៊ែររបស់អាមេរិក ដែលរក្សាទុកក្នុងប្រទេសអាល្លឺម៉ង់ ជាផ្នែកនៃយុទ្ធសាស្ត្រការពាររបស់ណាតូ។ ទោះបីជាទីក្រុងប៊ែរឡាំងបានបដិសេធគម្រោងទិញយន្តហោះ F-35 បន្ថែមទៀតនៅក្នុងខែកក្កដាក៏ដោយ ប៉ុន្តែថវិកាការពារជាតិកាន់តែច្រើនឥឡូវនេះបានធ្វើឱ្យការទិញបន្ថែមអាចធ្វើទៅបាន។

ក្រុមមន្ត្រីអាល្លឺម៉ង់មិនទាន់បានបញ្ជាក់ពីបទបញ្ជានេះជាសាធារណៈនៅឡើយទេ ប៉ុន្តែការពិភាក្សាកំពុងបន្តនៅក្នុងក្រសួងការពារជាតិអាល្លឺម៉ង់ និងគណៈកម្មាធិការថវិការបស់សភា។

ក្រុមអ្នកវិភាគនិយាយថា ការផ្លាស់ប្តូរនេះអាចធ្វើអោយទំនាក់ទំនងជាមួយបារាំងដែលកំពុងធ្វើការជាមួយប្រទេស​អាល្លឺម៉ង់លើគម្រោងយន្តហោះចម្បាំងរួមគ្នានាពេលអនាគត (FCAS) ប្រឈមនឹងការពន្យារពេល និងការខ្វែងគំនិតគ្នាម្តងហើយម្តងទៀត។ លើសពីនេះផែនការទិញយន្តហោះចម្បាំង F-35 បន្ថែមទៀតនេះបង្ហាញថា អាល្លឺម៉ង់កំពុងពឹងផ្អែកកាន់តែខ្លាំងលើបច្ចេកវិទ្យាយោធារបស់សហរដ្ឋអាមេរិកដើម្បីធ្វើទំនើបកម្មកងកម្លាំងការពារជាតិរបស់ខ្លួន៕

អត្ថបទ៖ ប៊ុន សុភាព