ឧបនាយករដ្ឋមន្ត្រីថៃ សង្ស័យជាប់ពាក់ព័ន្ធបណ្តាញក្រុមឧក្រិដ្ឋកម្មអនឡាញ 

នៅក្នុងប្រទេសថៃចាប់ផ្តើមកើតការសង្ស័យថា ឧបនាយករដ្ឋមន្ត្រី និងជារដ្ឋមន្ត្រីក្រសួងកសិកម្មនិងសហករណ៍ Thamanat Prompow មានជាប់ពាក់ព័ន្ធបណ្តាញក្រុមឧក្រិដ្ឋជនអនឡាញ (Scam)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Bangkok Post នៅថ្ងៃពុធទី២២ខែតុលាឆ្នាំ២០២៥ ការចោទប្រកាន់នេះកើតចេញពីសមាជិកសភាគណបក្សប្រជាជនថៃ Rangsiman Rome ដែលបានឈ្លេចសួរលោក Thamanat ជុំវិញទំនាក់ទំនងដ៏គួរឲ្យសង្ស័យរបស់ឧបនាយករដ្ឋមន្ត្រីរូបនេះ ជាមួយមេក្រុមឧក្រិដ្ឋកម្មអនឡាញសញ្ជាតិអាហ្វ្រិកខាងត្បូងម្នាក់។

មិនត្រឹមប៉ុណ្ណឹង អ្វីដែលធ្វើឲ្យគេកាន់តែសង្ស័យនោះគឺ លោក Rangsiman ថែមទាំងបង្ហាញរូបថតប៉ុន្មានសន្លឹក ដែលលោក Thamanat នៅជាមួយបុរសសញ្ជាតិអាហ្វ្រិកខាងត្បូងក្នុងពិធីសាសនានាទៀតផង។

ម្យ៉ាងមុននេះ Thamanat ត្រូវបានកោះហៅឲ្យបង្ហាញខ្លួននៅចំពោះមុខគណៈកម្មាធិការសភាសន្តិសុខរដ្ឋ ដើម្បីបំភ្លឺពីទំនាក់ទំនងរបស់គាត់ជាមួយមេក្រុមឧក្រិដ្ឋកម្មម្នាក់នោះម្តងរួចមកហើយ។

ទោះបែបនេះ លោក Thamanat បានបដិសេធយ៉ាងដាច់អហង្ការ ដោយអះអាងថា ប្រព័ន្ធផ្សព្វផ្សាយមួយចំនួនបានចោទសួរអំពីប្រភពនៃទ្រព្យសម្បត្តិរបស់លោករួចទៅហើយ។ ពិតណាស់ លោកបានចូលរួមនៅក្នុង អាជីវកម្មជាច្រើនប្រភេទ មុនពេលចូលប្រឡូកក្នុងឆាកនយោបាយ ហើយលោកក៏ប្រកាសទ្រព្យសម្បត្តិ ទៅកាន់ទីភ្នាក់ងារប្រឆាំងអំពើពុករលួយរួចហើយដែរ នៅពេលឡើងកាន់តំណែង។

ទន្ទឹមនោះ លោកជំរុញឲ្យសាធារណជន កុំទាន់ប្រញាប់សន្និដ្ឋាន អំពីពាណិជ្ជករជនបរទេសដែលត្រូវបានចោទប្រកាន់ថាជាប់ពាក់ព័ន្ធនឹងប្រតិបត្តិការបោកប្រាស់តាមអនឡាញ៕

អត្ថបទ៖ សុខ សុវណ្ណ

ចុចអាន៖ ថៃ គំរាមមិនចុះកិច្ចព្រមព្រៀងសន្តិភាពជាមួយកម្ពុជា បើការប្រជុំ GBC-JBC អត់ទទួលជោគជ័យ