ប្រមុខ UN សរសើរម៉ាឡេស៊ី សម្រាប់ការខិតខំ ជួយដោះស្រាយជម្លោះកម្ពុជា-ថៃ

ក្នុងកិច្ចប្រជុំកំពូលអាស៊ាន-UN កាលពីថ្ងៃចន្ទទី២៧ខែតុលាឆ្នាំ២០២៥ ប្រមុខស្ថាប័នកំពូលរបស់ពិភពលោកមួយនេះ បានកោតសរសើរប្រទេសម៉ាឡេស៊ី ចំពោះកិច្ចខិតខំប្រឹងប្រែងដោះស្រាយជម្លោះព្រំដែនកម្ពុជា-ថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Bernama, អគ្គលេខាធិការអង្គការសហប្រជាជាតិ Antonio Guterres ថ្លែងថា៖ «ខ្ញុំសូមកោតសរសើរតួនាទីរបស់ប្រទេសម៉ាឡេស៊ី ក្នុងការសម្របសម្រួលបទឈប់បាញ់រវាងកម្ពុជានិងថៃ ដែលបានចង្អុលបង្ហាញផ្លូវឆ្ពោះទៅរកដំណោះស្រាយជម្លោះដោយសន្តិវិធី»។

ទន្ទឹមនោះ លោក Guterres ក៏កោតសរសើរដល់ការរួមចំណែករបស់អាស៊ាន ចំពោះបេសកកម្មរក្សាសន្តិភាពរបស់ UN នៅទូទាំងពិភពលោកផងដែរ ដែលនេះបានឆ្លុះបញ្ចាំងពីភាពក្លាហាននិងការប្តេជ្ញាចិត្តរបស់អាស៊ាន ចំពោះសន្តិភាពនិងស្ថិរភាពសកលលោក។

ពាក់ព័ន្ធជម្លោះនៅមីយ៉ាន់ម៉ា លោក Guterres លើកឡើងថា សន្តិភាពនៅក្នុងប្រទេសនេះគឺ ពិបាកនឹងសម្រេចបានណាស់។ លោកក៏ថ្កោលទោសយ៉ាងដាច់អហង្ការផងដែរចំពោះការបង្ហូរឈាម ហើយជំរុញឲ្យគ្រប់ភាគីបញ្ឈប់ការប្រយុទ្ធ ការពារជនស៊ីវិល អនុញ្ញាតឲ្យមានការផ្តល់ជំនួយមនុស្សធម៌ដោយគ្មានឧបសគ្គ និងចូលរួមក្នុងដំណើរការនយោបាយប្រកបដោយបរិយាប័ន្ន។

សូមជម្រាបថា កិច្ចប្រជុំកំពូលអាស៊ាន-UN លើកទី១៥ ត្រូវបានប្រារព្ធឡើងនៅថ្ងៃទី២៧ខែតុលាឆ្នាំ២០២៥ ក្នុងទីក្រុង គូឡាឡាំពួ នៃប្រទេសម៉ាឡេស៊ី។

កិច្ចប្រជុំនេះ ធ្វើឡើងក្នុងគោលបំណង ពង្រឹងឡើងវិញនូវសារៈសំខាន់នៃភាពជាដៃគូដែលមិនអាចខ្លះបានរវាងអាស៊ាន និង UN៕

អត្ថបទ៖ សុខ សុវណ្ណ

ចុចអាន៖ កម្រណាស់! ត្រាំ សុខចិត្តបំពានពិធីសារសន្តិសុខ​ ដោយ​អញ្ជើញលោក អាន់វ៉ា មកជិះរថយន្ត «The Beast» ជាមួយគ្នា