វិមានក្រឹមឡាំងរង់ចាំការបញ្ជាក់របស់អាមេរិក លើរឿង​តេស្តនុយក្លេអ៊ែររបស់លោកត្រាំ

អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីល្ងាចថ្ងៃអង្គារ​ទី​៤​ខែ​វិច្ឆិកា​ថា ប្រទេសរុស្ស៊ីនៅតែរង់ចាំការបំភ្លឺពីទីក្រុងវ៉ាស៊ីនតោន ស្តីពី​ការអត្ថាធិប្បាយថ្មីៗ​របស់ប្រធានាធិបតីអាមេរិក លោក ដូណាល់ ត្រាំ អំពី​ការបន្តការសាកល្បងអាវុធនុយក្លេអ៊ែរឡើងវិញ។ នេះ​បើយោង​តាម​ការ​ចុះ​ផ្សាយរបស់​សារព័ត៍មាន TASS។

លោកត្រាំ បានប្រកាសកាលពីចុងខែតុលាថា លោកបានបញ្ជា​ឲ្យ​មានការសាកល្បងនុយក្លេអ៊ែរថ្មីរបស់សហរដ្ឋអាមេរិក ដោយនិយាយថា ប្រទេសនេះមិនត្រូវ«នៅពីក្រោយរុស្ស៊ីនិងចិនទេ»។ លោក Peskov បានឆ្លើយតបថា ទាំងរុស្ស៊ី និងចិនមិនបានធ្វើតេស្តនុយក្លេអ៊ែរណាមួយឡើយ ហើយថា ទីក្រុងមូស្គូមិនប្រាកដថា​តើលោកត្រាំ​មានន័យយ៉ាងណានោះទេ។

លោក Peskov បានប្រាប់​ទូរទស្សន៍ RT ដែលត្រូវបានដកស្រង់ដោយ TASS ថា «យើងត្រូវការការបំភ្លឺពីភាគីអាមេរិក ពីព្រោះទាំងរុស្ស៊ី និងចិនមិនបានបន្តការសាកល្បងនុយក្លេអ៊ែរឡើងវិញទេ។ យើង​មិន​អាច​និយាយ​បាន​ទេ​នៅ​ត្រង់​ចំណុច​នេះ​ថាតើ​ប្រធានាធិបតី​អាមេរិក​មាន​អ្វី​ក្នុង​ចិត្ត»។

លោកបានបន្ថែមថា រុស្ស៊ី និងចិននៅតែប្តេជ្ញាចិត្ត ចំពោះ​សន្ធិសញ្ញាហាមឃាត់ការសាកល្បងនុយក្លេអ៊ែរគ្រប់ជ្រុងជ្រោយ (CTBT) ដែលហាមឃាត់រាល់ការ​បំផ្ទុះនុយក្លេអ៊ែរ។

ការអត្ថាធិប្បាយរបស់លោក Peskov ធ្វើតាមការអះអាងម្តងហើយម្តងទៀតរបស់​លោកត្រាំ ដែលថា ប្រទេសផ្សេងទៀតកំពុងសាកល្បងអាវុធនុយក្លេអ៊ែរ ដែល​ជា​ការអះអាងដែលទីក្រុងមូស្គូបានបដិសេធ។

ប្រធានាធិបតី ​វ្ល៉ា​ឌី​មៀរ ពូ​ទីន ធ្លាប់​បាន​ព្រមាន​ថា បើ​ប្រទេស​ណា​មួយ​បន្ត​ការ​សាកល្បង​នុយក្លេអ៊ែរ រុស្ស៊ី​នឹង​ឆ្លើយតប​ដូចគ្នា​។ ក្រោយសូវៀត រុស្ស៊ីមិនដែលធ្វើតេស្តនុយក្លេអ៊ែរទេ។ ការសាកល្បងចុងក្រោយរបស់សហភាពសូវៀត បានធ្វើឡើងក្នុងឆ្នាំ​១៩៩០។ សហរដ្ឋអាមេរិកបានសាកល្បងចុងក្រោយនៅឆ្នាំ​១៩៩២ និង​ប្រទេសចិននៅឆ្នាំ​១៩៩៦។

លោកត្រាំ បានប្រាប់អ្នកយកព័ត៌មានកាលពីថ្ងៃសុក្រសប្តាហ៍មុនថា ទីក្រុងវ៉ាស៊ីនតោននឹង«បន្តការសាកល្បងនុយក្លេអ៊ែរឡើងវិញ» ប៉ុន្តែមិនមានភាពច្បាស់លាស់ថាតើនេះសំដៅទៅលើការបំផ្ទុះក្រោមដីដែលត្រូវបានប្រើក្នុងអំឡុងសង្គ្រាមត្រជាក់ឬយ៉ាងណានោះទេ។

ក្រោយមក រដ្ឋមន្ត្រីថាមពលអាមេរិកលោក Chris Wright បាននិយាយថា ការធ្វើតេស្តដែលបានគ្រោងទុក នឹងមិនពាក់ព័ន្ធនឹងការបំផ្ទុះនុយក្លេអ៊ែរទេ ដោយពណ៌នាវាជំនួសវិញថាជា«ការធ្វើតេស្តប្រព័ន្ធ» សំដៅពិនិត្យមើលមុខងារនៃសមាសធាតុអាវុធនុយក្លេអ៊ែរ៕

ដោយ៖ ឈាង