ព័ត៌មានអន្ដរជាតិ

រដ្ឋាភិបាលរបស់ អានុទីន គ្មានលទ្ធភាពការពារខ្លួនទេ បើសភាបោះឆោ្នតដកសេចក្តីទុកចិត្ត

បានផុស

៨ ខែ មុន

នៅ

ថ្ងៃសៅរ៍ ៨ វិច្ឆិកា ២០២៥

ដោយ

នាយករដ្ឋមន្ត្រីថៃ លោក អានុទីន ឆានវីរៈគុល (Anutin Charnvirakul) បានចេញសេចក្តីថ្លែងការណ៍ដោយបញ្ជាក់ជំហរពីការំលាយសភាមុនកាលកំណត់ដែលបានព្រមព្រៀងជាមួយគណបក្សប្រជាជន ក្នុងករណីដាក់មានការដាក់ញត្តិចោទប្រកាន់និងបោះឆ្នោតដកសេចក្តីទុកចិត្តពីសមាជិកសភានៃគណបក្សផ្សេងនោះ។

នាយករដ្ឋមន្ត្រីថៃ លោក អានុទីន ឆានវីរៈគុល អំឡុងពេលចូលរួមកិច្ចប្រជុំកំពូលអាស៊ាននៅម៉ាឡេស៊ី។ REUTERS

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយដឹងច្បាស់ថា រដ្ឋាភិបាលរបស់លោកគ្មានលទ្ធភាពការពារខ្លួនពីការបោះឆ្នោតដកសេចក្តីទុកចិត្ត បើសិនជាកើតមានមែននោះ លោក អានុទីន បានរំឭកឡើងវិញនូវកិច្ចព្រមព្រៀងដែលខ្លួនបានធ្វើជាមួយគណបក្សប្រជាជន ដែលជាគណបក្សប្រឆាំងធំបំផុតក្នុងប្រទេសថៃ ដោយមានចេតនាបង្អាក់បំណងរបស់គណបក្សផ្សេងៗជាពិសេសគណបក្សភឿថៃដែលបង្ហាញចេតនាដាក់ញត្តិទៅកាន់សភាដើម្បីជជែកដេញដោល និងបោះឆ្នោតដកសេចក្តីទុកចិត្ត។

លោក អានុទីន បានលើកឡើងថា៖‍«ខ្ញុំសូមបញ្ជាក់ក្នុងនាមខ្ញុំជានាយករដ្ឋមន្ត្រីដែលឡើងកាន់អំណាចពីកិច្ចព្រមព្រៀងជាមួយនឹងគណបក្សប្រជាជនថា ខ្ញុំនឹងរំលាយសភាក្នុងរយៈពេល១២០ថ្ងៃ ដែលត្រូវកំណត់នៅថ្ងៃទី៣១ ខែមករា ឆ្នាំ២០២៦»។

តាមរយៈសារនោះ លោក អានុទីន បានរំឭកឡើងវិញនូវកិច្ចការសំខាន់ដែលខ្លួនត្រូវអនុវត្ត រួមមាន ១) ការធ្វើវិសោធនកម្មរដ្ឋធម្មនុញ្ញ និងការតាក់តែងច្បាប់រដ្ឋធម្មនុញ្ញថ្មី ២} ធ្វើប្រជាមតិលើវិសោធនកម្មរដ្ឋធម្មនុញ្ញនៅថ្ងៃនៃការបោះឆ្នោតសកលបន្ទាប់សម្រាប់សមាជិកសភា ៣) ការរំលាយសភាតំណាងរាស្រ្តក្នុងរយៈពេល១២០ថ្ងៃគិតចាប់ពីថ្ងៃប្រកាសគោលនយោបាយ។ និង ៤) គណបក្សប្រជាជនដើរតួជាបក្សប្រឆាំង ពិនិត្យនិងផ្តល់យោបល់ដល់រដ្ឋាភិបាល ជាតួនាទី និងការពិនិត្យដែលខ្ញុំទទួលយក ហើយសុខចិត្តកែតម្រូវ។

ប្រធានគណបក្សប្រជាជន ដែលព្រមព្រៀងគាំទ្រលោកអានុទីនឲ្យកាន់អំណាចរយៈពេល៤ខែ។ FB

សេចក្តីថ្លែងការណ៍របស់លោក អានុទីន បានកើតឡើងចំពេលដែលមានការកើនឡើងយ៉ាងខ្លាំងពីអំពីលទ្ធភាពនៃការប្រឈមការបោះឆ្នោតដកសេចក្តីទុកចិត្ត ហើយ រដ្ឋាភិបាលរបស់លោក គ្មានលទ្ធភាពតតាំងជាមួយសំឡេងគណបក្សប្រឆាំងដ៏ច្រើននោះទេ។

លោក អានុទីន លើកឡើងថា៖«ខ្ញុំដឹងជានិច្ចថា ខ្ញុំដឹកនាំរដ្ឋាភិបាលភាគតិច។ ដូច្នេះ ប្រសិនបើមានការដាក់ញត្តិចោទប្រកាន់ដកសេចក្តីទុកចិត្ត ត្រូវបានគេដាក់ដើម្បីកេងចំណេញនយោបាយ នោះរដ្ឋាភិបាលគ្មានឱកាសទទួលបានសំឡេងភាគច្រើនឡើយ»។

លោក អានុទីន បន្តថា៖«រដ្ឋាភិបាលនឹងត្រូវគិតគូរពីរបៀបបន្ត ព្រោះនេះមិនមានចែងក្នុងកិច្ចព្រមព្រៀងជាមួយគណបក្សប្រជាជនទេ។ យ៉ាងណាមិញ ប្រសិនបើសំណើនេះត្រូវបានគេដាក់ឲ្យបើកកិច្ចពិភាក្សាដើម្បីស្វែងរកដំណោះស្រាយរួមសម្រាប់បញ្ហាប្រទេសនោះ ខ្ញុំត្រៀមខ្លួនជាស្រេចក្នុងការសហការ»៕

រ៉ាន់ រើយ