ព័ត៌មានអន្ដរជាតិ

វេណេស៊ុយអេឡាខិតខំបង្កើនទំនាក់ទំនងជាមួយ រុស្ស៊ី ខណៈអាមេរិកគំរាមកាន់តែខ្លាំង

បានផុស

៧ ខែ មុន

នៅ

ថ្ងៃសុក្រ ២៨ វិច្ឆិកា ២០២៥

ដោយ

ស្របពេលដែលសហរដ្ឋអាមេរិកគំរាមធ្វើប្រតិបត្តិការយោធាលើប្រទេសវេណេស៊ុយអេឡា ដោយយកលេសបង្រ្កាបគ្រឿងញៀន រដ្ឋាភិបាលវេណេស៊ុយអេឡា បានបង្កើនទំនាក់ទំនាក់ជាមួយទីក្រុងមូស្គូ តាមរយៈការចុះហត្ថលេខាលើកិច្ចព្រមព្រៀងលើវិស័យជាច្រើនរហូតដល់១៨ឯកសារ។

លោក ឌីមីទ្រី ឈើនីសែនកូន (Dmitry Chernyshenko) និងអនុប្រធានាធិបតីប្រតិបត្តិវេណេស៊ុយអេឡា ដែលស៊ី រ៉ូឌ្រីហ្គែស (Delcy Rodriguez)។ TASS

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងការផ្សាយរបស់ទីភ្នាក់ងារព័ត័មានរុស្ស៊ី TASS ថ្នាក់ដឹកនាំរុស្ស៊ី និងវេណេស៊ុយអេឡា បានចុះហត្ថលេខាលើឯកសារចំនួន១៨ និងសេចក្តីថ្លែងការណ៍រួម បន្ទាប់ពីសម័យប្រជុំលើកទី១៩នៃគណៈកម្មការអន្តររដ្ឋាភិបាលកម្រិតខ្ពស់ទ្វេភាគី ដែលដឹកនាំដោយឧបនាយករដ្ឋមន្ត្រីរុស្ស៊ី លោក ឌីមីទ្រី ឈើនីសែនកូន (Dmitry Chernyshenko) និងអនុប្រធានាធិបតីប្រតិបត្តិវេណេស៊ុយអេឡា ដែលស៊ី រ៉ូឌ្រីហ្គែស (Delcy Rodriguez)។

ឯកសារដែលបានចុះហត្ថលេខានោះផ្តោតជាសំខាន់លើកិច្ចសហប្រតិបត្តិការមួយចំនួន ដូចជា ការរុករករ៉ែ អាតូមសន្តិភាព ការដឹកជញ្ជូន និងការស្រាវជ្រាវរួមគ្នា។

ឧបនាយករដ្ឋមន្ត្រីរុស្ស៊ី លោក ឌីមីទ្រី ឈើនីសែនកូន បានកត់សម្គាល់ថា៖«ភាគីរុស្ស៊ីកោតសរសើរចំពោះលទ្ធផលនៃការងារដែលបានធ្វើ និងកិច្ចព្រមព្រៀងដែលសម្រេចបាន។ យើងបានគូសបញ្ជាក់អំពីផ្លូវឆ្ពោះទៅមុខ និងកំណត់ជំហានបន្ទាប់របស់យើងលើគ្រប់ទិដ្ឋភាពសំខាន់ៗនៃរបៀបវារៈទ្វេភាគី»។

សារព័ត៌មានវេណេស៊ុយអេឡា MAZO DANDO ស្រង់សម្តីអនុប្រធានាធិបតីវេណេស៊ុយអេឡា ផ្សាយថា ទំនាក់ទំនងនៃកិច្ចសហប្រតិបត្តិការទ្វេភាគីក្នុងវិស័យជាច្រើននោះ នឹងបន្តពង្រឹងសម្រាប់ការអភិវឌ្ឍនៃប្រជាជនទាំងពីរប្រទេស។

តាមការចុះផ្សាយនោះ អនុប្រធានាធិបតីវេណេស៊ុយអេឡាបានលើកឡើងថា៖«យើងគ្មានការសង្ស័យសោះឡើយថា រុស្ស៊ីនិងវេណេស៊ុយអេឡានឹងបន្តប្រយុទ្ធរួមគ្នា និងផ្លូវល្អបំផុតដែលយើងជ្រើសរើសយក គឺកិច្ចសហប្រតិបត្តិការ»។

អនុប្រធានាធិបតីវេណេស៊ុយអេឡា បានលើកឡើងនូវការថ្លែងអំណរគុណដល់ប្រទេសនៅតំបន់អឺរ៉ាស៊ី (អឺរ៉ុបអាស៊ី) ដែលតែងនៅជាមួយប្រទេសវេណេស៊ុយអេឡាក្នុងកាលៈទេសៈដ៏លំបាកយ៉ាងណាក៏ដោយ។

រដ្ឋាភិបាលរបស់ប្រធានាធិបតី Nicolas Maduro បានរងការដាក់សម្ពាធយ៉ាងខ្លាំងពីរដ្ឋាភិបាលសហរដ្ឋអាមេរិករបស់ប្រធានាធិបតី ដូណាល់ ត្រាំ ដែលបានបញ្ជាឲ្យមានការចល័តកងទ័ព នាវាពិឃាត និងយន្តហោះចម្បាំងទៅកាន់តែកៀកប្រទេសវេណេស៊ុយអេឡា ដោយព្រលយពាក្យថា ប្រតិបត្តិការយោធា នឹងធ្វើឡើង«ឆាប់ៗនេះ»៕

រ៉ាន់ រើយ