វីរុសកូវីដ-១៩បំប្លែងខ្លួនឥណ្ឌា ទោះវ៉ាក់សាំងក៏មិនអាចទប់ទល់បាន

អ្នកជំនាញម្នាក់បានព្រមានថា វីរុសកូវីដ-១៩បំប្លែងខ្លួនរបស់ឥណ្ឌា អាចមានភាពធន់នឹងវ៉ាក់សាំង។

លោកវេជ្ជបណ្ឌិត Danny Altmann សាស្រ្តាចារ្យផ្នែកភាពស៊ាំនៅសកលវិទ្យាល័យ Imperial College London បាននិយាយថា ប្រទេសឥណ្ឌាគួរតែស្ថិតនៅក្នុង “បញ្ជីក្រហម” របស់រដ្ឋាភិបាលនៃបណ្តាប្រទេសនានា ដោយសារតែវីរុសបំប្លែងខ្លួនថ្មីនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេវាសុខភាពសាធារណៈអង់គ្លេសបានរាយការណ៍ថា វីរុសបំប្លែងខ្លួនឥណ្ឌាចំនួន៧៣ករណី ត្រូវបានរកឃើញនៅក្នុងប្រទេសអង់គ្លេស ហើយ៤ករណីរកឃើញនៅ ស្កុតឡែន។

យ៉ាងណាក្តី បច្ចុប្បន្ន ក្រុមមន្រ្តីបានកំណត់ ដាក់វីរុសនេះនៅក្រោមការស៊ើបអង្កេត ដោយមិនទាន់ចាត់ទុកថាវាជាវីរុសនៃការព្រួយបារម្ភ ដូចវីរុសបំប្លែងខ្លួនប្រេស៊ីលឬអាហ្វ្រិកខាងត្បូងនោះទេ។

ប៉ុន្តែសាស្រ្តាចារ្យ Altmann និយាយថា គាត់កំពុងសង្ស័យថា កំឡាយរបស់វីរុសបំប្លែងខ្លួនឥណ្ឌានឹងកើនឡើងដល់កម្រិតនៃការព្រួយបារម្ភ ព្រោះវាអាចគេចផុតពីវ៉ាក់សាំងដែលកំពុងអភិវឌ្ឍ។

លោកបន្ថែមថា វីរុសបំប្លែងខ្លួនថ្មីនេះត្រូវបានរកឃើញនៅក្នុង “សមាមាត្រដ៏ខ្ពស់” ក្នុងចំណោមករណីវិជ្ជមាននៅប្រទេស ឥណ្ឌា។

ស្របពេលជាមួយគ្នានោះ លោក Paul Hunter សាស្រ្តាចារ្យផ្នែកវេជ្ជសាស្ត្រនៅសាកលវិទ្យាល័យ East Anglia ក៏បាននិយាយផងដែរថា វីរុសបំប្លែងខ្លួនឥណ្ឌា កំពុងបង្កក្តីព្រួយបារម្ភ។

លោកបានប្រាប់កាសែត Times ថា “នៅពេលដែលអ្នកក្រឡេកមើលវីរុសបំប្លែងខ្លួនអាហ្វ្រិកខាងត្បូង វាមានសមត្ថភាពដែលអាចគេចផុតពីវ៉ាក់សាំង។ កំឡាយរបស់វា ធ្វើឲ្យវ៉ាក់សាំងផ្តល់ភាពស៊ាំបានតិចតួចបំផុត”៕

ប្រែសម្រួលដោយ៖ Vann Vann

ប្រភព៖ The Sun

ចុចអាន៖ ធ្ងន់ធ្ងរហើយ! អង់គ្លេសរកឃើញ ជំងឺកូវីដ ១៩ បំប្លែងខ្លួនថ្មី និងកាចសាហាវមួយប្រភេទទៀតមកពីឥណ្ឌា