ហ្សេលេនស្គី ត្រៀម​រៀបចំ​បោះឆ្នោតអំឡុង​ពេលសង្គ្រាម បន្ទាប់ពីការរិះគន់របស់លោក​ត្រាំ

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បាននិយាយ​ថា លោកបានត្រៀមខ្លួនជាស្រេច ដើម្បីរៀបចំការបោះឆ្នោតអំឡុង​ពេលសង្គ្រាមក្នុងរយៈពេលពី៦០ទៅ៩០ថ្ងៃ​ខាង​មុខ បើសភា និងដៃគូលោកខាងលិចយល់ព្រម។ នេះគឺជាការឆ្លើយតប​ទៅនឹងការចោទប្រកាន់របស់ប្រធានាធិបតីអាមេរិក លោក ដូណាល់ ត្រាំ ដែលថា លោក​ហ្សេលេនស្គី​កំពុងក្រាញ​អំណាចមិនលែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម​ការ​ចុះផ្សាយ​កាល​ពី​ថ្ងៃ​ទី​១០​ខែ​ធ្នូ​ឆ្នាំ​២០២៥របស់​សារព័ត៍មាន NBC ថ្លែងក្នុងអំឡុងពេលត្រឡប់មកពីកិច្ចប្រជុំជាមួយមេដឹកនាំសហភាពអឺរ៉ុបវិញ លោក​ហ្សេលេនស្គី បានសង្កត់ធ្ងន់ថា ការសម្រេចចិត្តត្រូវតែស្ថិតនៅលើប្រជាជនអ៊ុយក្រែន។ លោកបាន​រៀបរាប់​ថា «នេះគឺជាសំណួរសម្រាប់ប្រជាជនអ៊ុយក្រែន មិនមែនប្រជាជនពីបណ្តាប្រទេសផ្សេងទេ»។ យ៉ាង​ណា លោកបានបន្ថែមថា លោក «ត្រៀមខ្លួនរួចជាស្រេចសម្រាប់ការបោះឆ្នោត» បើសម្ព័ន្ធមិត្តជួយធានាសុវត្ថិភាព។

លោកបានអំពាវនាវដល់សហរដ្ឋអាមេរិក និងអឺរ៉ុប​ឲ្យ​ជួយគាំទ្រផ្នែកភស្តុភារ និងសុវត្ថិភាព ដោយ​លើក​ឡើង​ថា ប្រជាជនរាប់លាននាក់ដែលត្រូវបានផ្លាស់ទីលំនៅ ទាហានជួរមុខ និងអ្នករស់នៅក្នុងតំបន់ដែលកាន់កាប់ដោយរុស្ស៊ី នឹងតម្រូវ​ឲ្យ​មានការរៀបចំការបោះឆ្នោតពិសេស។ បច្ចុប្បន្ន រដ្ឋធម្មនុញ្ញរបស់អ៊ុយក្រែនហាមឃាត់ការបោះឆ្នោតក្រោមច្បាប់អាជ្ញាសឹក ដែលជំរុញ​​​លោកហ្សេលេនស្គី ត្រូវ​ស្នើសុំ​ឲ្យ​សភា​កែប្រែច្បាប់ ប្រសិន​បើចាំបាច់។

កាលពីពេល​ថ្មីៗ​នេះ លោកត្រាំ បានប្រាប់សារព័ត៌មាន Politico ថា ប្រជាធិបតេយ្យរបស់អ៊ុយក្រែនកំពុងរងការខូចខាត ដោយសារតែខ្លួនមិនបានរៀបចំការបោះឆ្នោតចាប់តាំងពីសង្រ្គាម​បាន​ចាប់ផ្តើម។ សេចក្តីអត្ថាធិប្បាយរបស់លោក ដែលត្រូវបានបន្ទរដោយកូនប្រុសរបស់លោក គឺលោក Donald Trump Jr. ដែលបាន​​លើក​ឡើង​ថា លោកហ្សេលេនស្គី កំពុងអូសបន្លាយសង្រ្គាមដើម្បីបន្តកាន់អំណាច បង្កឲ្យមានការខកចិត្តនៅ​ក្នុង​ទីក្រុងកៀវ។ ទោះជាយ៉ាងណាក៏ដោយ តំណាងរាស្ត្របក្សប្រឆាំងបានព្រមានម្តងហើយម្តងទៀតថា ការបោះឆ្នោតក្នុងអំឡុងពេលសង្រ្គាមសកម្មអាចបង្កគ្រោះថ្នាក់ដល់សន្តិសុខជាតិ និងផ្តល់ផលប្រយោជន៍ដល់រុស្ស៊ី។

លោកហ្សលេនេស្គី ក៏បានបញ្ជាក់ពីការត្រៀមខ្លួនដើម្បីបន្តផ្លូវការទូតផងដែរ ដោយនិយាយថា ទីក្រុងកៀវ​សង្ឃឹមថានឹងរៀបចំកិច្ចប្រជុំកម្រិតខ្ពស់ជាមួយទីក្រុងវ៉ាស៊ីនតោន ក្នុងរយៈពេលពីរខែខាងមុខលើកិច្ចព្រមព្រៀងសន្តិភាព​ដ៏​មាន​សក្ដានុពល ហើយនឹងពិចារណា«បទឈប់បាញ់​លើ​ប្រភព​ថាមពល» ប្រសិនបើទីក្រុងមូស្គូយល់ព្រម។ អាមេរិកបានបញ្ជាក់ជាលក្ខណៈឯកជនថា អ៊ុយក្រែនប្រហែលជាចាំបាច់ត្រូវបោះបង់ចោលតំបន់ Donbas (ដុនបាស) ដើម្បីឈានដល់កិច្ចព្រមព្រៀងមួយ ទោះបីជាមិនមានភស្តុតាងដែលបង្ហាញថា រុស្ស៊ីត្រៀមខ្លួនសម្រាប់ការចរចាក្រោមលក្ខខណ្ឌអំណោយផលដល់ទីក្រុងកៀវ​ក៏ដោយ៕

ប្រែសម្រួល៖ ឈាង