សូម្បី Google Maps ក៏បង្ហាញថា រូបសំណាកព្រះវិស្ណុ ស្ថិតក្នុងដីខ្មែរ ចម្ងាយ៤០០មែត្រពីព្រំដែន

ទង្វើរបស់ថៃ ដែលកម្ទេចរូបសំណាកព្រះវិស្ណុនៃសាសនាហិណ្ឌូក្នុងតំបន់ អានសេះ នៃប្រទេសកម្ពុជាបានបង្ហាញយ៉ាងច្បាស់អំពីការឈ្លានពាននិងបំផ្លាញតម្លៃសាសនា បង្កការថ្កោលទោសជុំវិញពិភពលោក ជាពិសេសប្រទេសឥណ្ឌា ដែលជាទឹកដីគោរពសាសនាយ៉ាងខ្ជាប់ខ្ជូន។

ឥឡូវនេះ សូម្បីសារព័ត៌មានដ៏ល្បីរបស់សិង្ហបុរី «The Straits Times» ក៏បានចុះផ្សាយដែរថា រូបសំណាកដែលថៃផ្តួលរំលំនោះ គឺស្ថិតក្នុងទឹកដីកម្ពុជា យ៉ាងច្បាស់ក្រឡែត។

ក្នុងខ្លឹមសារនៃអត្ថបទរបស់ The Straits Times បានសរសេរថា៖ «ការ Search តាមរយៈ Google Maps បានបង្ហាញថា ទីតាំងរបស់រូបសំណាកនោះ គឺស្ថិតនៅចម្ងាយប្រហែល ៤០០ ម៉ែត្រ ពីខ្សែបន្ទាត់ព្រំដែន ដែលស្ថិតនៅក្នុងទឹកដីខាងកម្ពុជា»។

ព័ត៌មាននេះបានលាតត្រដាងឲ្យអស់ការសង្ស័យថា រូបសំណាកព្រះវិស្ណុ គឺមិនមែនស្ថិតលើបន្ទាត់ព្រំដែនត្រួតស៊ីគ្នា ឬស្ថិតក្នុងទឹកដីថៃឡើយ ពោលគឺចូលមកក្នុងដីខ្មែរជម្រៅជិតកន្លះគីឡូម៉ែត្រឯណោះ។

ម្យ៉ាង ព័ត៌មាននេះ គឺមានសារៈសំខាន់ខ្លាំងសម្រាប់កម្ពុជា ក្នុងការប្រើប្រាស់ជាព័ស្តុតាងបច្ចេកទេស ដើម្បីឆ្លើយតបទៅនឹងការទាមទារ ឬការចោទប្រកាន់ណាមួយពីភាគីថៃ។

សូមជម្រាបជាថ្មី ទង្វើរបស់ថៃដែលបំផ្លាញរូបសំណាកព្រះវិស្ណុ ក្នុងទឹកដីកម្ពុជា​ បានបណ្តាលឲ្យផ្ទុះប្រតិកម្មនិងរិះគន់ ពេញពិភពលោក។ ទាំងសារព័ត៌មានឥណ្ឌានិងសារព័ត៌មានអន្តរជាតិជាច្រើន បានចុះផ្សាយជាមួយនឹងចំណងជើងធំៗ ដែលដាក់ការស្តីបន្ទោសថៃចំៗ ថា បានប្រព្រឹត្តទង្វើគ្មានការគោរពនិងឲ្យតម្លៃដល់សាសនា។

ជុំវិញរឿងនេះ ក្រសួងការបរទេសឥណ្ឌា បានចេញសេចក្តីថ្លែងការណ៍រួចហើយ ដោយថ្កោលទោសថៃ។ អ្នកនាំពាក្យក្រសួងការបរទេសឥណ្ឌា Shri Randhir Jaiswal និយាយថា៖ «យើងបានឃើញនូវរបាយការណ៍ស្តីពីការកម្ទេចរូបសំណាកព្រះនៃ ព្រហ្មញ្ញសាសនា ដែលទើបកសាងឡើងក្នុងពេលថ្មីៗ និងមានទីតាំងស្ថិតនៅតំបន់រងផលប៉ះពាល់ដោយសារជម្លោះព្រំដែនថៃ-កម្ពុជា ដែលកំពុងបន្តកើតមាន។ ទេវរូបនៃសាសនាព្រហ្មញ្ញ និងព្រះពុទ្ធ ត្រូវបានទទួលនូវការគោរពសក្ការៈយ៉ាងជ្រាលជ្រៅបំផុតពីសំណាក់ប្រជាជននៅទូទាំងតំបន់ ដែលនេះគឺជាផ្នែកមួយនៃបេតិកភណ្ឌអរិយធម៌រួមគ្នារបស់យើង។ ទោះបីជាមានការទាមទារកម្មសិទ្ធិលើទឹកដីក៏ដោយ ក៏សកម្មភាពដែលខ្វះការគោរពបែបនេះ បានធ្វើឲ្យប៉ះពាល់ដល់សេចក្តីថ្លៃថ្នូរ និងមនោសញ្ចេត​នារបស់អ្នកដើរតាមសាសនានៅជុំវិញពិភពលោក ហើយសកម្មភាពបែបនេះមិនគួរកើតមានឡើងនោះទេ។ យើងសូមទទូចម្តងទៀតដល់ភាគីទាំងពីរ ឲ្យត្រឡប់មករកកិច្ចសន្ទនា និងផ្លូវការទូតវិញ ដើម្បីស្តារសន្តិភាពនិងចៀសវាងការបាត់បង់ជីវិតមនុស្សបន្ថែមទៀត ក៏ដូចជាការខូចខាតដល់ទ្រព្យសម្បត្តិ និងបេតិកភណ្ឌផងដែរ»៕

អត្ថបទ៖ សុខ សុវណ្ណ