លោក ហ្សេលេនស្គី ចង់បានចម្លើយច្បាស់ៗ ពីសម្ព័ន្ធមិត្ត ក្នុងករណីរុស្ស៊ីវាយប្រហារជាថ្មី

ប្រធានាធិបតីអ៊ុយក្រែន វ៉ូឡូឌីមៀរ​ ហ្សេលេនស្គី បានលើកឡើងកាលថ្ងៃទី៧ ខែមករាថា មកទល់ពេលនេះខ្លួនមិនបានទទួលចម្លើយច្បាស់លាស់ពីសម្ព័ន្ធមិត្តអឺរ៉ុបអំពីរបៀបដែលពួកគេនឹងការពារអ៊ុយក្រែនទេ ក្នុងករណីដែលរុស្ស៊ីវាយប្រហារម្តងទៀត អំឡុងពេលមានកិច្ចព្រមព្រៀងបញ្ចប់សង្គ្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម straitstimes. កាលពីថ្ងៃទី ៦ ខែមករា មេដឹកនាំអឺរ៉ុប និងបេសកជនអាមេរិកបានប្រកាសថា ពួកគេបានព្រមព្រៀងគ្នាលើការធានាសន្តិសុខសំខាន់ៗសម្រាប់ទីក្រុងកៀវ រួមទាំងយន្តការត្រួតពិនិត្យដឹកនាំដោយសហរដ្ឋអាមេរិក និងកងកម្លាំងពហុជាតិអឺរ៉ុប ដែលនឹងត្រូវដាក់ពង្រាយ ប្រសិនបើបទឈប់បាញ់អាចសម្រេចបាន។

ប៉ុន្តែនៅពេលសួរថា តើលោកប្រាកដថា សម្ព័ន្ធមិត្តអឺរ៉ុបនឹងចូលអន្តរាគមន៍ និងការពារប្រទេសរបស់លោក ក្នុងករណីមានការឈ្លានពានរបស់រុស្ស៊ីម្តងទៀតឬអត់ មេដឹកនាំអ៊ុយក្រែនបានលើកឡើងនៅថ្ងៃដដែលថា លោកមិនមាន ចម្លើយច្បាស់លាស់លើរឿងនោះទេ។

លោកហ្សេលេនស្គីបានប្រាប់អ្នកយកព័ត៌មានថា «ខ្ញុំផ្ទាល់ចង់ទទួលបានចម្លើយសាមញ្ញមួយប៉ុណ្ណោះ បាទឬចាស៎ ប្រសិនបើមានការឈ្លានពានម្តងទៀត ដៃគូទាំងអស់នឹងផ្តល់ការឆ្លើយតបយ៉ាងមុតមាំចំពោះរុស្ស៊ី។ ហើយនោះជាសំណួរពិតប្រាកដដែលខ្ញុំបានដាក់ទៅដៃគូទាំងអស់របស់យើង។ ប៉ុន្តែរហូតមកដល់ពេលនេះ ខ្ញុំមិនទាន់ទទួលបានចម្លើយច្បាស់លាស់នូវឡើយទេ»។

គួររម្លឹកដែរថា បេសកជនមកពីសហរដ្ឋអាមេរិក និងអ៊ុយក្រែន កាលពីថ្ងៃទី ៧ ខែមករា បានបន្តការចរចានៅទីក្រុងប៉ារីសលើបញ្ហាដែលលោកហ្សេលេនស្គី បាននិយាយថាពិបាកបំផុតនោះគឺ ជោគវាសនារបស់រោងចក្រថាមពលនុយក្លេអ៊ែរ Zaporizhzhia ដែលកាន់កាប់ដោយរុស្ស៊ី និងការគ្រប់គ្រងទឹកដីនៅភាគខាងកើតអ៊ុយក្រែន៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

អង់គ្លេស-បារាំង-អ៊ុយក្រែន ចុះហត្ថលេខាកិច្ចព្រមព្រៀងបញ្ជូនកងកម្លាំងពហុជាតិ ក្រោយ​ចប់​សង្គ្រាម