មូលហេតុ មន្ត្រីរុស្ស៊ីមួយចំនួនគាំទ្រលោកត្រាំ ស្វែងរកជ័យជម្នះលើ Greenland

មន្ត្រីរុស្ស៊ីជាច្រើនបានសម្ដែងការគាំទ្រ និងលើកទឹកចិត្តប្រធានាធិបតីលោក ដូណាល់ ត្រាំ ស្វែងរកការគ្រប់គ្រងកោះ Greenland ពីព្រោះទីក្រុងមូស្គូអាចទទួលបានអត្ថប្រយោជន៍ពីការបែកបាក់រវាងសហរដ្ឋអាមេរិក និងអឺរ៉ុបលើបញ្ហានេះ។ នោះបើយោងតាមការចុះផ្សាយពីសារព័ត៌មាន Interfax របស់រុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានដដែលនោះ បានដកស្រង់សម្តីអនុប្រធានក្រុមប្រឹក្សាសន្តិសុខលោក Dmitry Medvedev ថា វាទំនងជាថាក្នុងរយៈពេលប៉ុន្មានថ្ងៃខាងមុខនេះ ការធ្វើប្រជាមតិមិនធម្មតាមួយនឹងកើតឡើង ហើយប្រជាជនចំនួនជាង៥ម៉ឺននាក់នៅកោះ Greenland អាចបោះឆ្នោតចូលរួមជាមួយរុស្ស៊ី។

យោងតាមលោក Medvedev នេះជាមូលហេតុដែលលោកត្រាំ ត្រូវធ្វើសកម្មភាពយ៉ាងឆាប់រហ័សក្នុងកិច្ចខិតខំប្រឹងប្រែងដើម្បីបញ្ចូលកោះ Greenland ទៅក្នុងទឹកដីនេះ បើមិនដូច្នោះទេ នឹងលែងមានផ្កាយនៅលើទង់ជាតិអាមេរិកទៀតហើយ ហើយរុស្ស៊ីនឹងមានប្រធានបទសហព័ន្ធទី ៩០។ ប្រសិនបើអាមេរិកគ្រប់គ្រងកោះនេះ លោកត្រាំនឹងមានងារថ្មីជា ប្រធានាធិបតីបណ្តោះអាសន្ននៃកោះ Greenland។

សេចក្តីថ្លែងការណ៍នេះត្រូវបានធ្វើឡើងដោយអនុប្រធានក្រុមប្រឹក្សាសន្តិសុខរុស្ស៊ី បន្ទាប់ពីលោកត្រាំបានបង្កើនកិច្ចខិតខំប្រឹងប្រែងដើម្បីជួយអាមេរិកគ្រប់គ្រងកោះ Greenland ។ អាកប្បកិរិយារបស់ប្រធានសេតវិមានលើបញ្ហានេះកាន់តែធ្ងន់ធ្ងរ និងតឹងរ៉ឹងឡើងៗ សូម្បីតែលោកបានបញ្ជាក់ថា មិនច្រានចោលលទ្ធភាពនៃការប្រើប្រាស់កម្លាំងដើម្បីសម្រេចគោលដៅទេ។

លោក John Foreman អតីតអនុព័ន្ធការពារជាតិអង់គ្លេសប្រចាំប្រទេសរុស្ស៊ី និងអ៊ុយក្រែន បានលើកឡើងថា នេះគឺជាវិបត្តិមួយក្នុងកម្រិតគួរឲ្យព្រួយបារម្ភបំផុត ដែលបែងចែកអាមេរិកខាងជើង និងអឺរ៉ុប។ រុស្ស៊ីត្រូវតែអង្គុយមើល ហើយប្រាប់ខ្លួនឯងថា សំណាងនៅតែបន្តមករកពួកគេ។

រុស្ស៊ីបានចាត់ទុកអង្គការណាតូជាយូរមកហើយថា ជាការគំរាមកំហែងសន្តិសុខជាតិយ៉ាងធ្ងន់ធ្ងរ ដោយស្វែងរកការទប់ស្កាត់សម្ព័ន្ធភាពយោធាឆ្លងមហាសមុទ្រអាត្លង់ទិកពីការពង្រីកទៅខាងកើត។ នេះក៏ជាហេតុផលមួយដែលរុស្ស៊ីបានផ្តល់ដើម្បីចាប់ផ្តើមប្រតិបត្តិការនៅអ៊ុយក្រែន ខណៈដែលទីក្រុងកៀវ កំពុងស្វែងរកការចូលរួមជាមួយណាតូ។

ដោយឡែក រដ្ឋមន្ត្រីការបរទេសរុស្ស៊ី លោក Sergey Lavrov បានមានប្រសាសន៍ថា ណាតូកំពុងស្ថិតក្នុងវិបត្តិធ្ងន់ធ្ងរហើយ។ យ៉ាងណា រុស្ស៊ីគ្រាន់តែតាមដានស្ថានការណ៍ប៉ុណ្ណោះ ហើយមិនមានគម្រោងកាន់កាប់កោះ Greenland ទេ ប្រសិនបើអាមេរិកមិនចាត់វិធានការ ដូចដែលត្រាំបានអះអាង។ លោកក៏បានចូលរួមអបអរសាទរដោយប្រយោលទៅកាន់ត្រាំ ដោយប្រៀបធៀបកោះនេះទៅនឹង Crimea ដែលជាឧបទ្វីបរុស្ស៊ីបានបញ្ចូលក្នុងឆ្នាំ ២០១៤។

មិនតែប៉ុណ្ណោះ សូម្បីតែលោក លោក Kirill Dmitriev ដែលជាបេសកជនពិសេសរបស់ប្រធានាធិបតីរុស្ស៊ី ក៏បានចំអកឲ្យប្រទេសអឺរ៉ុបចំនួនប្រាំបី រួមមានចក្រភពអង់គ្លេស ដាណឺម៉ាក បារាំង អាល្លឺម៉ង់ ហ្វាំងឡង់ ហូឡង់ និងន័រវែស បន្ទាប់ពីពួកគេត្រូវបានលោកត្រាំ គំរាមកំហែងជាមួយនឹងពន្ធគយ ១០ ភាគរយ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ដាណឺម៉ាក ផ្ដាំអាមេរិកកុំឆ្លងដល់ «បន្ទាត់ក្រហម» Greenland ទោះមានសិទ្ធិក៏ដោយ